ନୂଆଦିଲ୍ଲୀ,୧୧-୧୦:(ଆଇଏଏନ୍ଏସ୍):ଅର୍ଦ୍ଧସାମରିକ ବାହିନୀ ମୁତୟନ ଲାଗି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ଗୁଡିକ ୧୦ ପ୍ରତିଶତ ଅଧିକ ଦେୟ ପୈଠ କରିବେ। କେନ୍ଦ୍ରୀୟ ସଶସ୍ତ୍ର ପୋଲିସ ବଳ (ସିଏପିଏଫ୍) ଓ ତ୍ୱରିତ୍ କାର୍ଯ୍ୟାନୁଷ୍ଠାନ ବାହିନୀ (ଆର୍ଏଏଫ୍)ର ସେବା ପାଇବାକୁ ହେଲେ ୨୦୨୪ ପର୍ଯ୍ୟନ୍ତ ପ୍ରତିବର୍ଷ ସମ୍ପୃକ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡିକ ଅଧିକ ଦେୟ ପୈଠ କରିବେ ବୋଲି ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ କୁହାଯାଇଛି। ଏଥିପାଇଁ ରାଜ୍ୟଗୁଡିକୁ ବଜେଟରେ ଆବଶ୍ୟକ ବ୍ୟବସ୍ଥା କରିବାକୁ ହେବ। ତେବେ ଉତ୍ତରପୂର୍ବାଞ୍ଚଳ ରାଜ୍ୟ, ଜମ୍ମୁ-କଶ୍ମୀର, ହିମାଚଳପ୍ରଦେଶ, ଉତ୍ତରାଖଣ୍ଡ ଏବଂ ମାଓବାଦୀ ପ୍ରବଣ ରାଜ୍ୟ ପାଇଁ ଏହି ନୀତି ଲାଗୁ ହେବ ନାହିଁ। ସେମାନେ ମୋଟ ବ୍ୟୟର ମାତ୍ର ୧୦ ପ୍ରତିଶତ ପ୍ରଦାନ କରିବେ।
ସିଏପିଏଫ୍ ଅଧୀନରେ ସୀମା ସୁରକ୍ଷା ବଳ (ବିଏସ୍ଏଫ୍), କେନ୍ଦ୍ରୀୟ ରିଜର୍ଭ ପୋଲିସ ବଳ (ସିଆର୍ପିଏଫ୍), କେନ୍ଦ୍ରୀୟ ଶିଳ୍ପାଞ୍ଚଳ ସୁରକ୍ଷା ବଳ (ସିଆଇଏସ୍ଏଫ୍), ଇଣ୍ଡୋ-ତିବ୍ବତୀୟ ସୀମା ପୋଲିସ (ଆଇଟିବିପି), ଆସାମ ରାଇଫଲ୍ସ, ଜାତୀୟ ସୁରକ୍ଷା ଗାର୍ଡ ଏବଂ ସଶସ୍ତ୍ର ସୀମା ବଳ ରହିଛି। ଆତଙ୍କବାଦୀ ଓ ମାଓବାଦୀ ପ୍ରଭାବିତ ରାଜ୍ୟ ସମେତ ଅନ୍ୟ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ସ୍ବରାଷ୍ଟ୍ର ମନ୍ତ୍ରଣାଳୟ ଆଇନଶୃଙ୍ଖଳା, ଉଦ୍ଧାର, ରିଲିଫ ଓ ସୁରକ୍ଷା ବ୍ୟବସ୍ଥା ଲାଗି ଅର୍ଦ୍ଧସାମରିକ ବଳ ଯୋଗାଇଦେଇଥାଏ। ବର୍ତ୍ତମାନର ନୀତିକୁ ସମୀକ୍ଷା କରିବା ପରେ ସିଏପିଏଫ୍ର ପ୍ରତି ବାଟାଲିୟନ୍ ପାଇଁ ଦର ଧାର୍ଯ୍ୟ କରିବାକୁ ନିଷ୍ପତ୍ତି ନିଆଯାଇଛି। ଏଥିସହିତ ଆଗାମୀ ୫ ବର୍ଷ ପର୍ଯ୍ୟନ୍ତ ଅର୍ଦ୍ଧସାମରିକ ବଳ ପଠାଇବା ଓ ସେମାନଙ୍କୁ ବିଭିନ୍ନ ସ୍ଥାନରେ ନିୟୋଜିତ କରିବା ଲାଗି ପରିବହନ ଖର୍ଚ୍ଚ ରାଜ୍ୟମାନଙ୍କୁ ବହନ କରିବାକୁ ହେବ।
ସଂଶୋଧିତ ଦେୟ ଅନୁଯାୟୀ ୨୦୧୯-୨୦ ବର୍ଷରେ ସାଧାରଣ ଅଞ୍ଚଳରେ ମୁତୟନ ଲାଗି ପ୍ରତି ବାଟାଲିୟନ ନିମନ୍ତେ ସ୍ବରାଷ୍ଟ୍ର ମନ୍ତ୍ରଣାଳୟ ରାଜ୍ୟଠାରୁ ବର୍ଷକୁ ୧୩.୭୦ କୋଟି ଟଙ୍କା ଆଦାୟ କରିବ। ସେହିପରି ଅଧିକ ବିପଦପୂର୍ଣ୍ଣ ଅଞ୍ଚଳ ପାଇଁ ୨୫.୧୮ କୋଟି ଏବଂ ଅତ୍ୟଧିକ ବିପଦ ଓ କଷ୍ଟକର ଜୋନ୍ ପାଇଁ ୩୪.୨୬ କୋଟି ଟଙ୍କା ସଂଗ୍ରହ କରିବାକୁ ନିଷ୍ପତ୍ତି ହୋଇଛି। ପରବର୍ତ୍ତୀ ବର୍ଷଗୁଡିକରେ ଏହି ଦେୟକୁ ବୃଦ୍ଧି କରାଯିବ। ଏହା ସହ ଯବାନମାନଙ୍କ ରହିବା ଓ ଅନ୍ୟାନ୍ୟ ଆନୁଷଙ୍ଗିକ ସୁବିଧା ମଧ୍ୟ ରାଜ୍ୟ ସରକାର ଯୋଗାଇଦେବେ। ବିଧାନସଭା ନ ଥିବା କେନ୍ଦ୍ରଶାସିତ ଅଞ୍ଚଳଗୁଡିକୁ ଦେୟ ଦେବାକୁ ପଡିବନି।
