ଭଦ୍ରକ ଅଫିସ, ୧୯।୫(ବ୍ୟୁରୋ): ସାମୁଦ୍ରିକ ଝଡ଼ ‘ଅମ୍ପନ’ ସହ ମୁକାବିଲା ପାଇଁ ସରକାରଙ୍କ ପକ୍ଷରୁ ପ୍ରସ୍ତୁତି ଚାଲିଛି । ଏ ନେଇ ଭଦ୍ରକ ଜିଲା ଚାନ୍ଦବାଲି ଓ ବାସୁଦେବପୁର ବ୍ଲକରେ ହାଇଆଲର୍ଟ ଜାରି କରିଛନ୍ତି ଜିଲା ପ୍ରଶାସନ। ଏହି ସ୍ଥାନଗୁଡ଼ିକରେ ପବନର ବେଗ ଅଧିକ ରହିବାର ଆଶଙ୍କା କରାଯାଉଛି। ତେବେ ଏହି ସ୍ଥାନଗୁଡ଼ିକରୁ ସ୍ଥାନାନ୍ତରଣ ପ୍ରକ୍ରିୟା ଆରମ୍ଭ ହୋଇସାରିଛି। ସାମାଜିକ ଦୂରତାକୁ ଦୃଷ୍ଟିରେ ରଖି ପ୍ରାୟ ୧୦୪ ଆଶ୍ରୟସ୍ତଳୀ ମଧ୍ୟରୁ ୧୪ଟି ଆଶ୍ରୟସ୍ଥଳୀ ଏବଂ ୫୫୮ଟି ସ୍କୁଲରେ ଲୋକଙ୍କର ରହିବା ବ୍ୟବସ୍ଥା କରାଯାଉଛି। ହାଇଆଲର୍ଟ ଅଞ୍ଚଳଗୁଡ଼ିକରେ ଅଗ୍ନିଶମ ବିଭାଗ ତଥା ଏନ୍ଡିଆର୍ଏଫ୍ ଓ ଓଡ୍ରାଫ୍ ଟିମ୍ ପଠାଇ ଦିଆଯାଇଛି।
ସେହିପରି ଧାମରା ଏବଂ ଚାନ୍ଦବାଲିରେ ଗୋଟିଏ ଲେଖାଏଁ ଏନ୍ଡିଆର୍ଏଫ୍ ଟିମ ବାତ୍ୟାକାଳୀନ ଉଦ୍ଧାର ନିମନ୍ତେ ସଜାଗ ଥିବା ବେଳେ ବାସୁଦେବପୁରରେ ଗୋଟିଏ ଓଡ୍ରାଫ୍ ଟିମ୍ ପ୍ରସ୍ତୁତ ରହିଛି। ଏହା ବ୍ୟତୀତ ମହାବାତ୍ୟାର ମୁକାବିଲା ପାଇଁ ୧୭ଟି ଅଗ୍ନିଶମ ଟିମ୍ ପ୍ରସ୍ତୁତ ରହିଛି। ସମୁଦ୍ର ଉପକୂଳବର୍ତ୍ତୀ ଅଞ୍ଚଳଗୁଡ଼ିକରେ ମାଇକ ଯୋଗେ ଲୋକମାନଙ୍କୁ ସଚେତନ କରାଯିବା ସହ ବାତ୍ୟା ଆଶ୍ରୟସ୍ଥଳୀକୁ ପଳାଇଯିବାକୁ କୁହାଯାଉଛି।
ବଙ୍ଗୋପସାଗରରେ ସୃଷ୍ଟି ହୋଇଥିବା ମହାବାତ୍ୟା ‘ଅମ୍ପନ’ ଉତ୍ତର ଦିଗରେ ପଶ୍ଚିମବଙ୍ଗ ଆଡକୁ ମୁହାଁଉଛି। ଏହା ବର୍ତ୍ତମାନ ପାରାଦୀପଠାରୁ ୪୮୦ କିମି ଦୂରରେ ରହିଛି। ଏହାସହ ପଶ୍ଚିମବଙ୍ଗଠାରୁ ୬୩୦ କିଲୋମିଟର ଦୂରରେ ରହିଛି ମହାବାତ୍ୟା। ୨୦ ତାରିଖ ଅପରାହ୍ନରେ ଏହା ସୁନ୍ଦରବନରେ ଲ୍ୟାଣ୍ଡଫଲ କରିବ।
