ଅଙ୍ଗଦାନ କରି ୬ ଜୀବନ ବଞ୍ଚାଇଥିଲେ: ମୁଖ୍ୟମନ୍ତ୍ରୀଙ୍କୁ ଭେଟିବେ ସୁରଜଙ୍କ ପରିବାର
8:27 amNovember 10, 2019

ଭଞ୍ଜନଗର,୧୦।୧୧(ଡି.ଏନ.ଏ)- ଭଞ୍ଜନଗର ସହରତଳି ଲଣ୍ଡେଇସାହି ଚ୍ଛେଦାଭୁମି ରୋଡ଼ର ବାବୁଲି ସେଠୀଙ୍କ ପୁଅ ସୁରଜ ଗୁଜରାଟରେ ଏକ ସଡ଼କ ଦୁର୍ଘଟଣାରେ ଗୁରୁତର ହୋଇଥିଲେ। ତାଙ୍କ ବ୍ରେନ କୋମାକୁ ଚାଲିଯାଇଥିଲା। ସେଠାରେ ଚିକିତ୍ସା ପାଇଁ ଅର୍ଥ ଅଭାବ ଓ ସେ ସମୟରେ କେତେଜଣ ଲୋକଙ୍କ ପରାମର୍ଶକ୍ରମେ ସୁରଜଙ୍କ ବିଭିନ୍ନ ଅଙ୍ଗକୁ ଦାନ କରିବା ପାଇଁ ତାଙ୍କ ବାପା ହୋଇଥିଲେ। ମୃତ୍ୟୁ ପୂର୍ବରୁ ସୁରଜଙ୍କ ବିଭିନ୍ନ ଅଙ୍ଗକୁ ୬ ଜଣଙ୍କ ଶରୀରରେ ଗତ ୨ ତାରିଖରେ ରୋପଣ କରାଯାଇଥିଲା। ସେମାନେ ନୂଆ ଜୀବନ ପାଇଛନ୍ତି। ପରେ ସୁରଜଙ୍କ ମୃତଦେହ ବ୍ୟବଚ୍ଛେଦ କରାଯାଇ ସେଠାରେ ସତ୍କାର ହୋଇଥିଲା। ବିଭିନ୍ନ ଗଣମାଧ୍ୟମରେ ଏଭଳି ମହାନ କାର୍ଯ୍ୟକୁ ପ୍ରଶଂସା କରାଯାଇଥିଲା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଏଭଳି ମହାନତା ପାଇଁ ସୁରଜଙ୍କ ପରିବାରକୁ ଟୁଇଟରରେ ଧନ୍ୟବାଦ ଜଣାଇଥିଲେ। ଏଭଳି ସ୍ଥିତିରେ ସୋମବାର ସୁରଜଙ୍କ ପରିବାର ମୁଖ୍ୟମନ୍ତ୍ରୀଙ୍କୁ ଭେଟିବା ଯୋଜନା ଅଛି। ସ୍ଥାନୀୟ ବିଧାୟକ ତଥା ମନ୍ତ୍ରୀ ବିକ୍ରମ କେଶରୀ ଆରୁଖଙ୍କ ପକ୍ଷରୁ ସୁରଜଙ୍କ ପରିବାର ସହ ଯୋଗାଯୋଗ ହୋଇଛି। ସୁରଜଙ୍କ ଦାଦା କୋକ ସେଠୀ ଶନିବାର ଏହି ସୂଚନା ଦେଇଛନ୍ତି। ସୋମବାର ମନ୍ତ୍ରୀ ଆରୁଖଙ୍କ ଉପସ୍ଥିତିରେ ସୁରଜଙ୍କ ବାପା ବାବୁଲି ଓ ପରିବାରର ଅନ୍ୟ ସଦସ୍ୟମାନେ ମୁଖ୍ୟମନ୍ତ୍ରୀଙ୍କୁ ଭେଟିବା ସମ୍ଭାବନା ଅଛି। ସୂଚନାଯୋଗ୍ୟ, ବାବୁଲି ପ୍ରାୟ ୨୫ ବର୍ଷ ହେବ ସୁରଟରେ ସୁତାକଳରେ କାମ କରୁଛନ୍ତି। ଦୀର୍ଘଦିନ ସୁରଟରେ ରହିଥିଲେ ମଧ୍ୟ ସେଠାରେ ସେ ରାଶନ କାର୍ଡ଼ ପାଇପାରି ନ ଥିଲେ। ଦୁର୍ଘଟଣାରେ ଆହତ ପୁଅର ଚିକିତ୍ସା ପାଇଁ ପାଖରେ କୌଣସି ସ୍ବାସ୍ଥ୍ୟବୀମା କାର୍ଡ଼ ନଥିବାରୁ ମେଡ଼ିକାଲ ଖର୍ଚ୍ଚ ଧାରଉଧାର କରି ଭରିଥିଲେ। ପୁଅ ଅଙ୍ଗଦାନ କରି ମହାନତା ଦେଖାଇଥିତ୍ବା ବାବୁଲିଙ୍କ ପରିବାରକୁ ଗୁଜରାଟ, ଓଡ଼ିଶା କିମ୍ବା କେନ୍ଦ୍ର ସରକାର ଏ ପର୍ଯ୍ୟନ୍ତ ସାମାନ୍ୟ ସହାୟତା ଯୋଗାଇନାହାନ୍ତି। କୌଣସି ପ୍ରଶାସନିକ ଅଧିକାରୀ ମଧ୍ୟ ସୁରଜଙ୍କ ପରିବାରକୁ ଏ ଯାଏ ଭେଟିନାହାନ୍ତି। କେବଳ ବିଭିନ୍ନ ଗଣମାଧ୍ୟମରେ ପରିବାର ଚର୍ଚ୍ଚାରେ ରହିଛନ୍ତି। ଭଞ୍ଜନଗର କିମ୍ବା ସୁରାଟରେ ବାବୁଲିଙ୍କ ଘର ଖଣ୍ଡେ ନାହିଁ। ଭଞ୍ଜନଗରରେ ପୈତୃକ ଏକ ଛୋଟିଆ ଘରେ ଅନ୍ୟଭାଇମାନେ ରହୁଛନ୍ତି। ପରିବାର ଆର୍ଥିକ ସ୍ଥିତି ବହୁତ ଖରାପ। ହେଲେ ବାବୁଲିଙ୍କ ମହାନତାକୁ ଚାରିଆଡ଼େ ପ୍ରଶଂସା କରାଯାଉଛି।