ମନମୁଣ୍ଡା, ୨୪।୧୦ (ଡି.ଏନ.ଏ)-
ବୌଦ୍ଧ ଜିଲା କଣ୍ଟାମାଳ ବ୍ଲକ ବିଲାସପୁର ପଁଚେତ୍ ଅଧୀନ ନରସିଂହପୁର ଗଁାର ଗଣ୍ଡା ପଧାନ(୮୯)। ପରିବାର କହେଲେ ମାଏକିନା ଆର ଗୁଟେ ବଲି ଝି’କେ ନେଇ ସଁସାର। ପରିବାରଟା ନିହାତି ଗରିବ। ଦୁଖ୍ ସୁଖ କରି ଗଣ୍ଡା ଝି’କେ ବିହାଚୁରା କରିଛନ୍। ଏହେଦେ ଘରେ ବୁରୁଧ୍ ଦମ୍ପତି ଏକଲା ରହୁଛନ୍। ଡୁଂଗି ଦେଖ୍ବାକେ କେହି ନାଇଁ। ଝି’ ବି ବହୁତ ଦୂରେ ବିହା ହେଇଛନ୍। ସବୁବେଲେ ଯାଆସ କରି ନାଇଁପାରବାର। ଏନ୍ତାଥି ବୁରୁଧ୍ ଦମ୍ପତି ଭତା ଆଶ୍ରେ ଓ୍ବାର୍ଡମେମ୍ବର, ସମିତିସଭ୍ୟ, ସରପଁଚ୍କୁଁ ଗୁହାରି କରି ନିରାଶ ହେଇଥିବାର କହିଛନ୍। ବଏସ୍ ଅଧ୍କା ଲାଗି ଗୋଡ଼ହାତ ବି ଠିକ୍ ସେ ନାଇଁ ଚଲବାର। ଏନ୍ତାଥି ଭତାର ଲାଗି କେନ୍କେ ନରଦିମୁ, କାହାକେ ଆର ଗୁହାରି କରମୁ। ଭତା ମିଲ୍ଲେ ଟିକେ ଭଲ ସେ ଚଲିପାରତୁଁ, ନାଇଁ ମିଲ୍ଲେ କାଣା କରମୁ ବଲି ବୁରୁଧ୍ ଦମ୍ପତି ମନ୍ଦୁଖ୍ କରି କହିଥିଲେ। ଜିଲାପାଳ ଇ ବୁରୁଧ୍ ଦମ୍ପତି ଉପରେ ଦୁରୁଷ୍ଟି ଦେଇ ଯେତେ ଜଲଦି ହେବା ଭତା ଯୁଗେଇ ଦେବାକେ ବୁଧିଜୀବୀ ମହଲରେ ଦାବି ହେଉଛେ।
