ଛତ୍ରପୁର,୨୬ା୨(ଡି.ଏନ.ଏ.)ସାଉଥ୍କୋ ୟୁଟିଲିଟି ପକ୍ଷରୁ ଛତ୍ରପୁର ଅଞ୍ଚଳରେ ମଙ୍ଗଳବାର ସ୍ବତନ୍ତ୍ର ସ୍କ୍ବାଡ୍ ଦ୍ୱାରା ବିଦ୍ୟୁତ୍ ବିଚ୍ଛିନ୍ନ ଆରମ୍ଭ ହୋଇଛି। ଏହି ସବ୍ଡିଭିଜନ ଅଧୀନରେ ବିଭିନ୍ନ ଗ୍ରାହକଙ୍କ ଉପରେ ୨ କୋଟି ୪୧ ଲକ୍ଷ ୧୪ ହଜାର ଟଙ୍କା ବକେୟା ବିଦ୍ୟୁତ୍ ବିଲ୍ ରହିଛି ା ଘରୋଇ ଗ୍ରାହକଙ୍କ ଉପରେ ୧.୨୬ କୋଟି ଟଙ୍କା ବାକି ରହିଥିବା ବେଳେ ବ୍ୟବସାୟୀ ଗ୍ରାହକଙ୍କ ଉପରେ ୧.୦୧ କୋଟି ଟଙ୍କା ଓ ଶିଳ୍ପାୟନ ଉପରେ ୧୪.୧୪ ଲକ୍ଷ ଟଙ୍କା ବାକିଥିବା ଜଣାପଡିଛି। ଏହି ପରିପ୍ରେକ୍ଷୀରେ ମଙ୍ଗଳବାରଠାରୁ ବିଦ୍ୟୁତ୍ ବିଭାଗ ପକ୍ଷରୁ ଏକ ୭ ଜଣିଆ ସ୍ବତନ୍ତ୍ର ସ୍କ୍ବାଡ୍ ଗଠନ କରାଯାଇ ବିଲ୍ ବକେୟା ଥିବା ୨୯ ଗ୍ରାହକଙ୍କ ସଂଯୋଗ ବିଚ୍ଛିନ୍ନ କରାଯାଇଛି ା
ପ୍ରଥମ ଦିନରେ ୨.୮୨ ଲକ୍ଷ ଟଙ୍କାର ରାଜସ୍ବ ଆଦାୟ କରାଯାଇଥିବା ବିଦ୍ୟୁତ୍ ବିଭାଗ ପକ୍ଷରୁ ସୂଚନା ଦିଆଯାଇଛି ା ଉକ୍ତ ସ୍କ୍ବାଡ୍ ଛତ୍ରପୁର ସହରର ରିକାପଲ୍ଲୀ, ଭାଗ୍ୟଲକ୍ଷ୍ମୀନଗର, ମଝି ବଜାର, କଣମଣା ପଞ୍ଚାୟତ ଅଧୀନ ଟାକିରିଆ ବ୍ରହ୍ମପୁର, ଅଗସ୍ତୀନୂଆଗଁା, ଭିକାରିପଲ୍ଲୀ ପଞ୍ଚାୟତ ଅଧୀନ ଲଣ୍ଡା ବାଉଁଶ, ଦନେଇ ବ୍ରହ୍ମପୁର ସମେତ ଆଖପାଖ ଅଞ୍ଚଳରୁ ବକେୟା ବିଲ୍ ମଗାଯାଇଥିଲା ା ଛତ୍ରପୁର ସବ୍ଡିଭିଜନରେ ଘରୋଇ ଗ୍ରାହକ ୩୩୫୪୦ ଜଣ ଥିବା ବେଳେ ବ୍ୟବସାୟୀ ଗ୍ରାହକ ୧୮୬୩ ଜଣ ଓ ଶିଳ୍ପାୟନ ଗ୍ରାହକ ୧୦୫ ରହିଥିବା ଛତ୍ରପୁର ସବ୍ଡିଭିଜନ ଏସ୍ଡିଓ ରାଜ କିଶୋର ବଲ୍ଲଭ ସୂଚନା ଦେଇଛନ୍ତିି। ପୂର୍ବରୁ ସାଉଥ୍ କୋ ପକ୍ଷରୁ ଗ୍ରାହକଙ୍କୁ ଡାକବାଜି ଯନ୍ତ୍ର ଯୋଗେ ବିଲ୍ ପୈଠ ନ କଲେ ସଂଯୋଗ କଟାଯିବ ବୋଲି ସୂଚନା ଦିଆଯାଇଥିଲା। ଏଥିସହ କେତେକ ଗ୍ରାହକଙ୍କୁ ମଧ୍ୟ ବକେୟା ବିଲ୍ ପୈଠ କରିବାକୁ ବିଭାଗ ପକ୍ଷରୁ ନୋଟିସ୍ ଦିଆଯାଇଥିବା ସୂଚନା ଦିଆଯାଇଛି ା ଅପରପକ୍ଷରେ ଚଳିତ ମାସ ୧୨ରୁ ଏ ପର୍ଯ୍ୟନ୍ତ ୨୨୦ ଜଣଙ୍କ ବିଦ୍ୟୁତ୍ ସଂଯୋଗ କଟାଯିବା ସହ ୨୦ଲକ୍ଷ ଟଙ୍କା ଆଦାୟ ହୋଇଥିବା କୁହାଯାଇଛି। ଯଦି କୌଣସି ଗ୍ରାହକ ବିଲ୍ ବାକି ରଖିଥିବା ଏବଂ କହିବା ସତ୍ତ୍ୱେ ଏହା ପୈଠ କରୁନାହାନ୍ତି, ଏପରି କି ବିଦ୍ୟୁତ୍ ବିଚ୍ଛିନ୍ନ ସମୟରେ କର୍ମଚାରୀଙ୍କ ସହ ପାଟିତୁଣ୍ଡ କରନ୍ତି ସେମାନେ ଆଇନ ଅନୁଯାୟୀ ଦଣ୍ଡିତ ହେବେ ବୋଲି ଏସ୍ଡିଓ ସୂଚନା ଦେଇଛନ୍ତିି। ଏପରି କି ଯେଉଁ ଗ୍ରାହକମାନଙ୍କ ବିଲରେ କୌଣସି ତ୍ରୁଟି ରହିଥିବ ସେ ସମ୍ପର୍କରେ ଛତ୍ରପୁର ବିଦ୍ୟୁତ୍ କାର୍ଯ୍ୟାଳୟକୁ ଆସି ସଂଶୋଧନ କରିବାକୁ ପରାମର୍ଶ ଦିଆଯାଇଛି ା
