ଥିରୁଭାନନ୍ତପୁରମ୍, ୧୮।୪: ୧୫ଦିନ ଶିଶୁର ଜୀବନ ବଞ୍ଚାଇବା ପାଇଁ କେରଳ ସରକାର ଓ ସାଧାରଣ ଲୋକେ ମିଶି ଏକ ନିଆରା ଉଦାହରଣ ସୃଷ୍ଟି କରିଛନ୍ତି। ଜନ୍ମରୁ ହୃଦ୍ରୋଗରେ ପୀଡିତ ଶିଶୁଙ୍କୁ ଉପଯୁକ୍ତ ଚିକିତ୍ସା ଯୋଗାଇଦେବା ପାଇଁ କେରଳ ମୁଖ୍ୟମନ୍ତ୍ରୀ ପିନାରାଇ ବିଜୟନଙ୍କ ନିର୍ଦ୍ଦେଶରେ ଏକ ଗ୍ରୀନ କରିଡର ନିର୍ମାଣ କରାଯାଇଥିଲା। ଏହି କରିଡରରେ ୫ଘଣ୍ଟା ୫୦ମିନିଟରେ ୪୦୦ କିଲୋମିଟର ଆମ୍ବୁଲାନ୍ସ ଚାଲିଥିଲା। ସୂଚନାଯୋଗ୍ୟ, ଉତ୍ତର କାସରଗୋଡ ଜିଲାର ଏକ ଡାକ୍ତରଖାନାରେ ୧୫ଦିନ ତଳେ ଶିଶୁଟିଏ ଜନ୍ମ ନେଇଥିଲେ। ଜନ୍ମ ପରେ ଶିଶୁଟିକୁ ନିଃଶ୍ୱାସ ନେବାରେ କଷ୍ଟ ହେବା ସହ ସେ ନିମୋନିଆ, କିଡନୀଜନିତ ରୋଗରେ ପୀଡିତ ଥିଲେ। ପରେ ତାଙ୍କୁ ମାଙ୍ଗାଲୋର ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା। କିନ୍ତୁ ଏଠାରେ ଉପଯୁକ୍ତ ଚିକିତ୍ସା ଉପଲବ୍ଧ ନ ଥିବାରୁ ଖୁବଶୀଘ୍ର ଶିଶୁଟିକୁ କୋଚି ହସ୍ପିଟାଲରେ ଭର୍ତ୍ତି କରିବା ପାଇଁ ଡାକ୍ତରମାନେ ପରାମର୍ଶ ଦେଇଥିଲେ। କିନ୍ତୁ ଏତେ ବାଟ ଶିଶୁଟିକୁ ଆମ୍ବୁଲାନ୍ସରେ ନେବା ସହଜ ନ ଥିବାରୁ ଶିଶୁଟିର ମାତାପିତା ମୁଖ୍ୟମନ୍ତ୍ରୀଙ୍କ ନିକଟରେ ଗୁହାରି କରିଥିଲେ। ମୁଖ୍ୟମନ୍ତ୍ରୀ ତୁରନ୍ତ ଏହାର ପଦକ୍ଷେପ ନେଇ ଫେସବୁକରେ କେରଳ ଜନତାଙ୍କୁ ରାସ୍ତାରେ ବେଶୀ ଭିଡ ନ ଜମାଇବା ପାଇଁ ଅପିଲ କରିଥିଲେ। ଶେଷରେ ପୋଲିସ ପ୍ରଶାସନ, ସ୍ଥାନୀୟ ଲୋକେ ଓ ସରକାରଙ୍କ ଉପଯୁକ୍ତ ତାଳମେଳରେ ଏହି ମିଶନ ସଫଳ ହୋଇଥିଲା।
