ଥିରୁଭାନନ୍ତପୁରମ,୬।୧: କେରଳର ୧୦୫ ବର୍ଷର ଜଣେ ବୃଦ୍ଧା ଚତୁର୍ଥ ଶ୍ରେଣୀ ପାସ୍ କରିଛନ୍ତି। ଭଗୀରଥି ଆମ୍ମା ନାମ୍ନୀ ଏହି ବୃଦ୍ଧା ଜଣଙ୍କ ଭାରତର ସବୁଠୁ ବୟସ୍କ ବିଦ୍ୟାର୍ଥୀ ହେବାର ସୌଭାଗ୍ୟ ଅର୍ଜନ କରିଛନ୍ତି। ଗତବର୍ଷ ରାଜ୍ୟ ସାକ୍ଷରତା ଅଭିଯାନ ଦ୍ୱାରା କୋଲ୍ଲମରେ ଆୟୋଜିତ ପରୀକ୍ଷାରେ ସେ ସାମିଲ ହୋଇଥିଲେ। ଏହି ପରୀକ୍ଷାର ଫଳାଫଳ ବୁଧବାର ପ୍ରକାଶ ପାଇଛି। ୨୭୫ରୁ ସେ ୨୦୫ ନମ୍ବର ରଖି ପାସ୍ କରିଛନ୍ତି। ପିଲାଦିନରୁ ଆମ୍ମାଙ୍କ ପଢିବାର ନିଶା ଥିଲା। କିନ୍ତୁ ମା’ଙ୍କ ମୃତ୍ୟୁ ହୋଇଯିବାରୁ ତାଙ୍କ ପାଠପଢାରେ ଡୋରି ବନ୍ଧା ହୋଇଥିଲା। ଭାଇ-ଭଉଣୀଙ୍କ ଲାଳନପାଳନରେ ତାଙ୍କ ସମୟ ବିତିଯାଇଥିଲା। ଫଳରେ ତୃତୀୟ ଶ୍ରେଣୀରୁ ପଢା ଛାଡିଦେଇଥିଲେ। ବିବାହ ପରେ ମଧ୍ୟ ପାରିବାରିକ ଜୀବନରେ ବ୍ୟସ୍ତ ରହିଯାଇଥିଲେ। ନାତୁଣୀ ନାତି ଦେଖିବା ପରେ ଆମ୍ମା ପୁଣି ଥରେ ପାଠ ପଢିବା ପାଇଁ ମନ ବଳାଇଲେ। ସେମାନଙ୍କ ପ୍ରେରଣାରେ ପାଠ ପଢି ପରୀକ୍ଷା ଦେବା କଥା ଚିନ୍ତା କରିଥିଲି ବୋଲି କହନ୍ତି ଆମ୍ମା। ଏବେ ତାଙ୍କର ୧୪ଜଣ ଅଣ ଏବଂ ପଣ ନାତୁଣୀ ନାତି ଅଛନ୍ତି।
