ନୂଆଦିଲ୍ଲୀ,୨୨।୮: ଭାରତର ଅର୍ଥନୀତି ଧିମା ହେବାର ପ୍ରଭାବ ଏବେ ଦେଶର ସର୍ବବୃହତ୍ ବିସ୍କୁଟ ନିର୍ମାତା କମ୍ପାନୀ ପାର୍ଲେ ଜି ଉପରେ ପଡିଛି। ଏହି କାରଣରୁ ଆଗାମୀ ଦିନରେ କମ୍ପାନୀ ପ୍ରାୟ ୧୦ ହଜାର କର୍ମଚାରୀଙ୍କୁ ଛଟେଇ କରିବାକୁ ନିଷ୍ପତ୍ତି ନେଇଛି।
କମ୍ପାନୀର କ୍ୟାଟେଗରି ମୁଖ୍ୟ ମୟଙ୍କ ଶାହ କହିଛନ୍ତି ଯେ, ଦେଶରେ ସାମଗ୍ରୀ ଏବଂ ସେବା ଟିକସ(ଜିଏସ୍ଟି) ଲାଗୁ ହେବା ପରେ ବିସ୍କୁଟ ଉଦ୍ୟୋଗ ଧିମା ହୋଇଯାଇଛି। ବିସ୍କୁଟ୍ ଉପରୁ ଜିଏସ୍ଟି କମାଇବା ଲାଗି ସରକାରଙ୍କ ବାରମ୍ବାର କୁହାଯାଇଛି। ସରକାର ବିସ୍କୁଟ ଉଦ୍ୟୋଗ ଜଗତର ଗୁହାରି ନ ଶୁଣିଲେ କମ୍ପାନୀ ନିକଟରେ ଆଉ କୌଣସି ବିକଳ୍ପ ରହିବ ନାହିଁ। ବାଧ୍ୟ ହୋଇ କମ୍ପାନୀ ଆଗାମୀ ଦିନରେ ୮ରୁ ୧୦ ହଜାର କର୍ମଚାରୀଙ୍କୁ ଛଟେଇ କରିବ। ଶାହ କହିଛନ୍ତି ଯେ, ୧୦୦ ଟଙ୍କା ପ୍ରତି କେଜି ମୂଲ୍ୟ ଥିବା ବିସ୍କୁଟ ଉପରେ ଜିଏସ୍ଟି ହ୍ରାସ ଲାଗି ସରକାରଙ୍କୁ ଅନୁରୋଧ କରାଯାଇଛି। ବାସ୍ତବରେ ଜିଏସ୍ଟି ଲାଗୁ ହେବା ପୂର୍ବରୁ ୧୦୦ ଟଙ୍କା ପ୍ରତି କେଜିରୁ କମ୍ ମୂଲ୍ୟର ବିସ୍କୁଟ ଉପରେ ୧୨% ଟିକସ ଆଦାୟ ହେଉଥିଲା। କିନ୍ତୁ ସରକାର ଦୁଇ ବର୍ଷ ପୂର୍ବେ ଲାଗୁ କରିଥିବା ଜିଏସ୍ଟିରେ ୧୮ ପ୍ରତିଶତ ଟିକସ ଆଦାୟ କରାଯାଉଛି। ୫ ଟଙ୍କାର ପ୍ୟାକେଟ ଉପରେ ଅଧିକ ଜିଏସ୍ଟି ଲାଗୁ ହେଉଛି। ଫଳରେ ବିସ୍କୁଟ କମ୍ପାନୀଗୁଡ଼ିକ ଦର ବଢ଼ାଇବାକୁ ବାଧ୍ୟ ହୋଇଛନ୍ତି। ଦରକୁ ନେଇ ଭାରତୀୟ ଗ୍ରାହକ ଅତ୍ୟନ୍ତ ସମ୍ବେଦନଶୀଳ। ସେମାନେ ଗୋଟିଏ ପ୍ୟାକେଟରେ ଥିବା ବିସ୍କୁଟ ଗଣୁଛନ୍ତି। ଦରବୃଦ୍ଧି କାରଣରୁ ବିକ୍ରି ଦିନକୁ ଦିନ ହ୍ରାସ ପାଇଚାଲିଛି। ସୂଚନାଥାଉ କି, ୯୦ ବର୍ଷ ପୁରୁଣା ପାର୍ଲେ ଜିର ନିଜସ୍ବ ୧୦ କାରଖାନା ରହିଥିବା ବେଳେ ସାରା ଦେଶରେ କଣ୍ଟ୍ରାକ୍ଟରେ ୧୨୫ କାରଖାନା ରହିଛି। ଏଥିରେ ପ୍ରାୟ ୧ ଲକ୍ଷ କର୍ମଚାରୀ ନିଯୁକ୍ତ ହୋଇଛନ୍ତି। କମ୍ପାନୀର ବାର୍ଷିକ ରାଜସ୍ବ କାରବାର ପ୍ରାୟ ୯୯୪୦ କୋଟି ଟଙ୍କା ରହିଛି। ଉଲ୍ଲେଖଥାଉ କି, ନିକଟରେ ପାର୍ଲେର ବଡ଼ ପ୍ରତିଦ୍ୱନ୍ଦ୍ୱୀ ବ୍ରିଟାନିଆ ଇଣ୍ଡଷ୍ଟ୍ରିଜର ଏମ୍ଡି ବରୁଣ ବେରୀ ମଧ୍ୟ ବିସ୍କୁଟ ବିକ୍ରି ହ୍ରାସ ପାଉଥିବା ସ୍ବୀକାର କରିଥିଲେ। ସେ କହିଥିଲେ ଯେ, ଦରବୃଦ୍ଧି କାରଣରୁ ଲୋକେ ୫ ଟଙ୍କାର ବିସ୍କୁଟ ପ୍ୟାକେଟ ମଧ୍ୟ କିଣିବାକୁ ଚାହୁଁନାହାନ୍ତି। ବ୍ରିଟାନିଆର କାରବାର ଅଭିବୃଦ୍ଧି ମାତ୍ର ୬% ରହିଛି। ମାର୍କେଟ ରିସର୍ଚ୍ଚ ଫାର୍ମ ନିଲସେନ ପକ୍ଷରୁ ପ୍ରସ୍ତୁତ ରିପୋର୍ଟରେ କୁହାଯାଇଥିଲା ଯେ, ଆର୍ଥିକ ମାନ୍ଦାବସ୍ଥା କାରଣରୁ କଞ୍ଜ୍ୟୁମର ଗୁଡ୍ସ ଉଦ୍ୟୋଗ ଧିମା ହେଲାଣି।
