ଜଳେଶ୍ୱର, ୧୯ା୮-ଜଳେଶ୍ୱର ଜି.କେ. ଭଟ୍ଟର ହସ୍ପିଟାଲରେ ଗଣ୍ଡଗୋଳ, ଭଙ୍ଗାରୁଜା ଓ ଡାକ୍ତରଙ୍କୁ ମାଡ ଘଟଣାରେ ବାଲେଶ୍ୱର ସିଡିଏମଓ ଡା.କମଳାକାନ୍ତ ନାୟକ ପଦକ୍ଷେପ ନେବା ଆରମ୍ଭ କରିଛନ୍ତି। ସେହିପରି ପୋଲିସ ପକ୍ଷରୁ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ୬ ଜଣଙ୍କୁ ଗିରଫ କରାଯାଇଛି। ସିଡିଏମଓ ଡା.କମଳାକାନ୍ତ ନାୟକଙ୍କ ପଦକ୍ଷେପ ଅନୁଯାୟୀ, ଡା. ଗଣେଶ ଚନ୍ଦ୍ର ପାଳଙ୍କୁ ଭୋଗରାଇ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ବଦଳି କରାଯାଇଥିବା ବେଳେ ସେଠାରୁ ଡା. ଉତ୍ତମ ଦଣ୍ଡପାଟଙ୍କୁ ଭଟ୍ଟର ହସପିଟାଲକୁ ବଦଳି କରାଯାଇଛି। ସେହିପରି ଭଟ୍ଟର ହସପିଟାଲର ସ୍ତ୍ରୀ ରୋଗ ଓ ପ୍ରସୂତି ବିଶେଷଜ୍ଞ ଡା. ଦିଲୀପ ପାତ୍ରଙ୍କୁ ହାତୀଗଡ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ, ହାତୀଗଡ ସ୍ବାସ୍ଥ୍ୟକେନ୍ଦ୍ରର ଡା. ଅଜୟ କୁମାର ସାହୁଙ୍କୁ ଭଟ୍ଟର ହସପିଟାଲକୁ ବଦଳି କରାଯାଇଛି। ଭଟ୍ଟର ହସପିଟାଲର ଡା. ବିନୟ କୁମାର ପ୍ରଧାନ ଓ ଡା. ସସ୍ମିତା ସିଂଙ୍କୁ କମର୍ଦ୍ଦା ଡାକ୍ତରଖାନାକୁ ବଦଳି କରାଯାଇଛି। ସେହିପରି କମର୍ଦ୍ଦା ଡାକ୍ତରଖାନାର କାର୍ଯ୍ୟରତ ୨ଜଣ ଡାକ୍ତରଙ୍କୁ ବଦଳି କରାଯାଇଛି। ମାତ୍ର ସେମାନେ ଭଟ୍ଟର ହସ୍ପିଟାଲରେ କାର୍ଯ୍ୟରେ ଯୋଗ ଦେଇ ନ ଥିବା ଜଣାଯାଇଛି। ଅନ୍ୟପକ୍ଷେ ପୋଲିସ୍ ଗିରଫ ୬ଜଣଙ୍କୁ ରବିବାର କୋର୍ଟଚାଲାଣ କରିଛି। ସେମାନଙ୍କ ଜାମିନ ନାମଞ୍ଜୁର ହେବାରୁ ଜଳେଶ୍ୱର ଉପ କାରାଗାରକୁ ପଠାଯାଇଛି। ଗିରଫ ଯୁବକମାନେ ହେଲେ ଶାସନବାଡ ଗ୍ରାମର ସେକ ଗଫିର(୩୩), ସେକ ହନିଫ (୩୫), ରାଜପୁର ଗ୍ରାମର ସେକ ଜାହାଙ୍ଗିର(୨୬), ସେକ ରାଜା(୧୯), ରାଜପୁର ଗ୍ରାମର ଅବଦୁଲ ସବିର ଖାଁ(୨୧) ଓ ପଥରପୁରା ଗ୍ରାମର ମୀର ସାମସେର (୨୨)। ପୋଲିସ ସିସିଟିଭି, ଭିଡିଓ ଫୁଟେଜ ଓ ମୋବାଇଲ ଦ୍ୱାରା ଉତ୍ତେଳିତ ଚିତ୍ରକୁ ଭିତ୍ତି କରି ଅନ୍ୟମାନଙ୍କୁ ଗିରଫ କରିବା ପାଇଁ ଉଦ୍ୟମ ଜାରି ରଖିଛି। ଏହି ଘଟଣାରେ ପ୍ରାୟ ୧୫୦ଜଣ ବ୍ୟକ୍ତିଙ୍କର ସମ୍ପୃକ୍ତି ଥିବା ସନ୍ଦେହ କରି ପୋଲିସ ଏକ ତାଲିକା ପ୍ରସ୍ତୁତ କରୁଛି।
