କପ୍ତିପଦା,୨୬ା୮(ଡ଼ି.ଏନ୍.ଏ.)- ମୟୂରଭଞ୍ଜ ଜିଲା କପ୍ତିପଦା ବ୍ଲକ୍ ଅଧୀନ ଶିମିଳିପାଳ ପାଦଦେଶ ଆଦିବାସୀ ଅଧ୍ୟୁଷିତ କୁଳିଅଳମ୍ ପଞ୍ଚାୟତର ନଛିପୁରଠାରେ ୧୯୯୦ରେ ଖୋଲିଥିବା ନୂତନ ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଥାଇ ନ ଥିଲା ପରି ଚାଲିଛି। କପ୍ତିପଦା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ଥିବା ଏହି ସ୍ବାସ୍ଥ୍ୟକେନ୍ଦ୍ରରେ ବିଭିନ୍ନ ସମସ୍ୟା ଲାଗି ରହିଥିଲେ ବି ଏହାର ପ୍ରତିକାର ହେଉ ନାହିଁ ା ଫଳରେ ସ୍ବାସ୍ଥ୍ୟକେନ୍ଦ୍ର ଉପରେ ନିର୍ଭର କରୁଥିବା ଜେ.ଏସ୍. ଜାମଡ଼ିହା, ଚକ୍ରଧରପୁର, କୁଳିଅଳମ ଓ ଦେବଳା ଆଦି ପଞ୍ଚାୟତ ଅନ୍ତର୍ଗତ ୨୫ଟି ରାଜସ୍ବ ଗ୍ରାମର ଲୋକେ ଚିକିତ୍ସା ସେବାରୁ ବଞ୍ଚିତ ହେଉଥିବା ଅଭିଯୋଗ କରୁଛନ୍ତି।
ଆରମ୍ଭରୁ ଏହି ଡାକ୍ତରଖାନାରେ ବିଭିନ୍ନ ସମସ୍ୟା ଲାଗି ରହିଛି। ଭିତ୍ତିଭୂମି ବିକାଶର ଅଭାବ ଓ ସ୍ବାସ୍ଥ୍ୟସେବା ପ୍ରତି ଅବହେଳା କରାଯାଉଥିବା ନେଇ ଅଞ୍ଚଳବାସୀ ଅଭିଯୋଗ କରି ପ୍ରତିକାର ଦାବି କରି ଆସୁଛନ୍ତି। ଏହି ଉପାନ୍ତ ଅଞ୍ଚଳକୁ କେହି ଡ଼ାକ୍ତର ଆସିବାକୁ ଚାହଁୁ ନ ଥିବା ବେଳେ କେହି ଆସିଲେ ଅଳ୍ପ ଦିନ ରହି ଏଠାରୁ ଖସିବାକୁ ବାଟ ଖୋଜିଥାନ୍ତି। ବର୍ତ୍ତମାନ ଜଣେ ଆୟୁଷ ଡ଼ାକ୍ତରଙ୍କ ସମେତ ୨ ଜଣ ଡାକ୍ତର ଓ ଜଣେ ଫାର୍ମାସିଷ୍ଟ କାର୍ଯ୍ୟ କରୁଛନ୍ତି। କିନ୍ତୁ ରୋଗୀମାନେ ଡ଼ାକ୍ତରଖାନା ଉପର ଭରସା ରଖି ନ ପାରି ଉଦଳା ଓ ପୋଡ଼ାଡ଼ିହା ଡ଼ାକ୍ତରଖାନାକୁ ଯାଇ ଚିକିତ୍ସିତ ହେଉଥିବା କହିଛନ୍ତି। ସରକାରଙ୍କ ପକ୍ଷରୁ ସବୁ ପ୍ରକାର ଔଷଧ ଦିଆଯିବାର ବ୍ୟବସ୍ଥା ହୋଇଥିଲେ ମଧ୍ୟ ଏଠାରେ ରୋଗୀଙ୍କୁ ବାହାରୁ ଔଷଧ କିଣିବାକୁ କୁହାଯାଉଛି। ଡାକ୍ତରଖାନାରେ ପାଚରି ନ ଥିବାରୁ ଏହା ପରିସର ବୁଲା ଗୋରୁଙ୍କ ଚାରଣଭୂଇଁ ପାଲଟୁଛି। ଡ଼ାକ୍ତରଖାନାରେ ପିଇବା ପାଣିର ସ୍ଥାୟୀ ବ୍ୟବସ୍ଥା ନ ହେବା ଏକ ବିଡମ୍ବନା। ଗ୍ରାମ୍ୟ ଜଳ ଯୋଗାଣ ସଂସ୍ଥାରୁ ପାଣି ଅଣାଯାଇ ଏକ ଟାଙ୍କିରେ ଗଚ୍ଛିତ ରଖାଯାଇ ବ୍ୟବହାର କରାଯାଉଛି ା କର୍ମଚାରୀଙ୍କ ଲାଗି ନିର୍ମିତ କ୍ୱାର୍ଟର୍ସ ନିମ୍ନମାନର ହୋଇଥିବାରୁ ସେଠାରେ କେହି ରହୁ ନ ଥିବା ଅଭିଯୋଗ ହେଉଛି। ଏହି ଅଞ୍ଚଳରେ ଥରେ ବିଜୁଳି କଟିଲେ କେବେ ଆସିବ ତା’ର କିଛି ଠିକଣା ରହୁ ନାହିଁ ା ଏଥିଲାଗି ସ୍ବାସ୍ଥ୍ୟସେବା ମଧ୍ୟ ପ୍ରଭାବିତ ହେଉଛି। ଏ ସମ୍ପର୍କରେ ଉପଖଣ୍ଡ ସ୍ବାସ୍ଥ୍ୟ ଅଧିକାରୀ ଡ. ଶିବାନନ୍ଦ ମହାନ୍ତିଙ୍କୁ ପଚାରିବାରୁ ଡାକ୍ତରଖାନା ସମସ୍ୟାର ପ୍ରତିକାର ଲାଗି ଗୁରୁତ୍ୱ ଦିଆଯିବ ବୋଲି କହିଛନ୍ତି ।
