ପୁରୀ ଅଫିସ,୧୭।୫: ଦୀର୍ଘବର୍ଷ ହେଲା ସ୍ନାନପୂର୍ଣ୍ଣିମା ଦିନ ମହାପ୍ରଭୁଙ୍କ ଅଣସର ନୀତି ହୋଇପାରୁନାହିଁ। ଦାରୁବିଗ୍ରହ ସ୍ନାନମଣ୍ଡପରୁ ଅଣସର ପିଣ୍ଡିକୁ ବିଜେ କରିବାରେ ବିଳମ୍ବ ଯୋଗୁ ସେହିଦିନ ଅଣସର ନୀତି କରିବା ସମ୍ଭବହୋଇ ନ ଥାଏ। ତା’ ପରଦିନଠାରୁ ଅଣସର ଘରେ ଦାରୁଦିଅଁଙ୍କ ଅଣସର ଗୁପ୍ତ ସେବା ଆରମ୍ଭ ହୋଇଥାଏ। ହେଲେ ଏଥର କରୋନା ଯୋଗୁ ଭକ୍ତଙ୍କ ଆଗମନ ହେବାର ସମ୍ଭାବନା ନ ଥିବାରୁ ଠାକୁରଙ୍କ ସ୍ନାନ ନୀତିକାନ୍ତି ସଅଳ ସରିବ ବୋଲି ଆଶା ରଖିଛି ଦଇତାପତି ନିଯୋଗ। ତେଣୁ ସ୍ନାନପୂର୍ଣ୍ଣିମା ଦିନ ଶୀଘ୍ର ଠାକୁରଙ୍କୁ ଅଣସର ପିଣ୍ଡିକୁ ଯଦି ବିଜେ କରାଯାଇପାରିଲା ତେବେ ସେହିଦିନ ଅଣସର ନୀତି ହୋଇପାରିବ। ଏଥିପାଇଁ ନିଯୋଗ ପକ୍ଷରୁ ଶ୍ରୀମନ୍ଦିର ପ୍ରଶାସନକୁ ପ୍ରସ୍ତାବ ଦିଆଯାଇଥିବା ବରିଷ୍ଠ ଦଇତାପତି ସେବକ ବିନାୟକ ଦାସମହାପାତ୍ର କହିଛନ୍ତି।
ପରମ୍ପରା ଅନୁଯାୟୀ ଅଣସର ୧୫ଦିନ ରହିଥିବାବେଳେ ପ୍ରତିବର୍ଷ ୧୪ଦିନ ହେଉଛି। ଏଥର ୧୫ଦିନ କରିବା ଲାଗି ପ୍ରଚେଷ୍ଟା ଚାଲିଛି। ସ୍ନାନ ପୂର୍ଣ୍ଣିମା ଦିନଠାରୁ ହିଁ ଅଣସର ନୀତି ଆରମ୍ଭ କରାଯିବ। ମାତ୍ର ପ୍ରତିବର୍ଷ ନୀତିକାନ୍ତିରେ ବିଳମ୍ବ ଏବଂ ମହାପ୍ରଭୁଙ୍କ ହାତୀବେଶ ଦର୍ଶନ ଲାଗି ଭକ୍ତଙ୍କ ଉତ୍କଣ୍ଠାକୁ ଦେଖି ବେଶ ଓଲାଗିରେ ବି ଡେରି ହୋଇଥାଏ। ତେଣୁ ବିଳମ୍ବିତ ରାତିରେ ଠାକୁର ଅଣସର ପିଣ୍ଡିକୁ ବିଜେ କରୁଥିବାରୁ ସେହିଦିନ ଅଣସର ନୀତି ହୋଇପାରେ ନାହିଁ। ଏଥର ଜୁନ୍ ୫ରେ ପଡୁଛି ସ୍ନାନଯାତ୍ରା। ୪ତାରିଖ ରାତ୍ର ୧/୨ଟାରୁ ସ୍ନାନ ନୀତି ଆରମ୍ଭ ହେବାକୁ ଯୋଜନା କରାଯାଇଛି। ଫଳରେ ସକାଳ ୫ଟାରୁ ୬ଟା ମଧ୍ୟରେ ଠାକୁରମାନଙ୍କ ପହଣ୍ଡି ଶେଷ ହୋଇଯିବ। ଏହାପରେ ସ୍ନାନମଣ୍ଡପରେ ସ୍ନାନ ନୀତି ସରି ହାତୀବେଶରେ ଭକ୍ତଙ୍କୁ ଦର୍ଶନ ଦେବେ ମହାପ୍ରଭୁ। ଯେହେତୁ ଭକ୍ତଙ୍କ ଉପରେ କଟକଣା ରହିବ ତେଣୁ ସଅଳ ହାତୀବେଶ ଓଲାଗି ହୋଇ ଦାରୁବିଗ୍ରହଙ୍କୁ ଅଣସର ପିଣ୍ଡିକୁ ବିଜେ କରାଯିବ। ଏହାପରେ ଶ୍ରୀମସ୍ତକରୁ ମୂଲ୍ୟବାନ ଚିତା, ରାହୁରେଖା ଓଲାଗି କରାଯିବ। ଅଣସର ନୀତି ପାଇଁ ଯଥେଷ୍ଟ ସମୟ ମିଳିବ। ଏହାକୁ ନଜରରେ ରଖି ଦଇତାପତି ନିଯୋଗ ମନ୍ଦିର ପ୍ରଶାସନକୁ ପ୍ରସ୍ତାବ ଦେଇଛି। ମନ୍ଦିର ପ୍ରଶାସନ ଛତିଶା ନିଯୋଗ ସହ ଆଲୋଚନା କରି ଏଦିଗରେ ନିଷ୍ପତ୍ତି ନେବ ବୋଲି କହିଛନ୍ତି ବିନାୟକ।
