ବର୍ତ୍ତମାନ ଇଣ୍ଟରନେଟ୍ ଯୁଗରେ ଯୁବପିଢ଼ୀ ନୂଆ ନୂଆ ଟେକ୍ନିକ୍ ସହିତ ବେଶ୍ ଜଡିତ। ଅନେକ ସମୟରେ ସେମାନେ ସୋସିଆଲ ମିଡିଆରେ ବନ୍ଧୁ ତିଆରି କରି ତାଙ୍କ ସହ ସମ୍ପର୍କକୁ ଆଗକୁ ନେବାକୁ ଚାହାନ୍ତି । ବନ୍ଧୁଙ୍କ ସହ କିଛି କଥାବାର୍ତ୍ତା ପରେ ସେ ଯଦି ପସନ୍ଦ ଆସିଥାନ୍ତି, ତେବେ ତାଙ୍କ ସହ ସମୟ କଟାଇବାକୁ ଡେଟ୍ରେ ଯିବାକୁ ସ୍ଥିର ହୋଇଥାଏ। ବର୍ତ୍ତମାନର ଏହି ଟ୍ରେଣ୍ଡ୍କୁ ନେଇ ଅନେକ ସମୟ ଯୁବପିଢ଼ୀ ଅଡୁଆରେ ପଡ଼ୁଥିବା ନଜିର ମଧ୍ୟ ରହିଛି। ତେବେ କାହା ସହ ଅନ୍ଧ ଭାବରେ ଡେଟ୍ରେ ଯିବା ପୂର୍ବରୁ କେତେକ ଗୁରୁତ୍ୱପୂର୍ଣ୍ଣ ଦିଗ ଉପରେ ଧ୍ୟାନ ଦେବାକୁ ପଡିଥାଏ। ଜାଣନ୍ତୁ ସେ ସମ୍ପର୍କରେ….
ଫୋନ୍ରେ କଥା
ଡେଟ୍ରେ ଯିବା ପୂର୍ବରୁ ଆପଣ ବନ୍ଧୁଙ୍କ ସହ ଫୋନ୍ରେ କଥା ହୋଇଯାଆନ୍ତୁ। ଆପଣ ଯେତେବି ଅନ୍ଲାଇନ୍ରେ କଥା ହୁଅନ୍ତୁ ନା କାହିଁକି ମାତ୍ର ଡେଟ୍ ପୂର୍ବରୁ ଆପଣ ତାଙ୍କ ସହ ଥରେ ଫୋନ୍ରେ କଥା ହେବା ଜରୁରୀ। ଏଥିରୁ ତାଙ୍କ ବ୍ୟକ୍ତିତ୍ୱ ସମ୍ପର୍କରେ ଜାଣିହେବ। ଏପରି କଥା ହେବା ଆବଶ୍ୟକ ଯେପରି, ଆପଣ ଅନ୍ଲାଇନ୍ରେ ଯାହା ସହ କଥା ହୋଇଥିଲେ ସେ ଲୋକ ବୋଲି ଜାଣି ପାରିବେ।
ଉପଯୁକ୍ତ ସ୍ଥାନ
ଡେଟ୍ ଲାଗି ଯାଉଥିବା ସ୍ଥାନ ଆପଣଙ୍କ ଲାଗି ପରିଚିତ ହୋଇଥିବା ଜରୁରୀ। ନିଜ ସୁରକ୍ଷା ଲାଗି ଏପରି ସ୍ଥାନ ବାଛନ୍ତୁ ଯେଉଁ ଜାଗାକୁ ଆପଣ ଅନେକ ଥର ଯାଇଛନ୍ତି। ଏହା ଜନଗହଳିପୂର୍ଣ୍ଣ ହୋଇଥିବା ଆବଶ୍ୟକ। ଏ ନେଇ ନିଛାଟିଆ ସ୍ଥାନ ବାଛିବା ଭୁଲ୍ ହୋଇଥାଏ। ତେବେ ଡେଟ୍ରେ ଯିବା ପୂର୍ବରୁ ଆପଣଙ୍କ ନିକଟତର ବନ୍ଧୁଙ୍କୁ କହିଯିବା ଉଚିତ।
ଠିକ୍ ତଥ୍ୟ ସଂଗ୍ରହ
ପ୍ରୋଫାଇଲ୍ରେ ଭୁଲ୍ ସୂଚନା ଦେଉଥିବା ଲୋକ ଅନେକଥାନ୍ତି। ତେଣୁ ଏପରି କିଛି ପଦକ୍ଷେପ ନେବା ପୂର୍ବରୁ ଆପଣ ପାର୍ଟନରଙ୍କ ବିଷୟରେ ସବୁ ତଥ୍ୟ ସଂଗ୍ରହ କରନ୍ତୁ। ସେ ବ୍ୟକ୍ତି ଠିକ୍ କି ନାହିଁ ଜାଣିବା ଲାଗି ତାଙ୍କର କିଛି ସାଙ୍ଗଙ୍କଠାରୁ ପଚାରି ବୁଝିବା ସହ ସେ ଦେଇଥିବା ପ୍ରୋଫାଇଲ୍ରେ ସୂଚନା ଭୁଲ୍ କି ଠିକ୍ ଜାଣନ୍ତୁ।
ବ୍ୟକ୍ତିଗତ କଥା
ଡେଟ୍ରେ ଯାଉଥିବା ବେଳେ ନିଜର ବ୍ୟକ୍ତିଗତ କଥା ବନ୍ଧୁଙ୍କ ସହ ବାଣ୍ଟନ୍ତୁ ନାହିଁ। ଏହା ଆଗାମୀ ଦିନରେ ଆପଣଙ୍କୁ ସମସ୍ୟାରେ ପକାଇପାରେ।
