ଢେଙ୍କାନାଳ ଅଫିସ, ୨।୬-ଢେଙ୍କାନାଳ ଜିଲା ବେଲଟିକିରିସ୍ଥିତ ଗୁଡ ନିଉଜ୍ ଇଣ୍ଡିଆ ଡ୍ରିମ୍ ସେଣ୍ଟର ସେଲଟର ହୋମ୍ ଯୌନଶୋଷଣ ମାମଲାର ମୁଖ୍ୟ ଅଭିଯୁକ୍ତ ତଥା ଅନୁଷ୍ଠାନର ଚେୟାରମ୍ୟାନ ଫୟାଜ୍ ରେହମନ୍ (୬୩) ଏବଂ ପ୍ରକଳ୍ପ ନିର୍ଦ୍ଦେଶକ ସୀମାଞ୍ଚଳ ନାୟକ (୩୯) ମଙ୍ଗଳବାର ସନ୍ଧ୍ୟାରେ ଜାମିନରେ ମୁକୁଳିଛନ୍ତି। ଉଭୟଙ୍କୁ ସର୍ତ୍ତମୂଳକ ଜାମିନ ମିଳିଛି। ମାମଲା ପରିଚାଳନା ସମୟରେ କେହି ଦେଶ ବାହାରକୁ ଯାଇପାରିବେ ନାହିଁ। ସାକ୍ଷୀଙ୍କ ଉପରେ ଚାପ ପ୍ରୟୋଗ କରିପାରିବେ ନାହିଁ ବୋଲି ସର୍ତ୍ତ ରହିଛି। ଜଣଙ୍କୁ ୨୦ହଜାର ଟଙ୍କା ଲେଖାଏ ସିଓରିଟି ଓ ଦୁଇଜଣ ଲେଖାଏ ଜାମିନଦାର ଜରିଆରେ ଜାମିନ ମିଳିଥିବା ଅଭିଯୁକ୍ତଙ୍କ ମାମଲା ପରିଚାଳନା କରୁଥିବା ଓକିଲ ଅମ୍ରିତ କୁମାର ଦାସ ସୂଚନା ଦେଇଛନ୍ତି। ୨୦୧୮ ନଭେମ୍ବର ୨୭ରେ ଅନ୍ତେବାସୀଙ୍କୁ ଯୌନ ନିର୍ଯାତନା ଦେବା ଅଭିଯୋଗ ଆସିବା ପରେ ଫୟାଜ, ସୀମାଞ୍ଚଳ ଏବଂ ସହଯୋଗୀ ଅଧିକାରୀ ଉଦିତ କୁମାର ଲିମା ଗିରଫ ହୋଇଥିଲେ। ସେମାନଙ୍କ ନାମରେ ବିଭିନ୍ନ ଦଫାରେ ସଙ୍ଗୀନ ଅଭିଯୋଗ ରହିଥିବାବେଳେ ସମସ୍ତେ ଢେଙ୍କାନାଳ ଜିଲା କାରାଗାରରେ ଥିଲେ।
ବେଲଟିକିରି ଯୌନ କେଳେଙ୍କାରୀ ମାମଲା ପଦାକୁ ଆସିବା ପରେ ଚର୍ଚ୍ଚାର ଶିରୋନାମା ପାଲଟିଥିଲେ ଫୟାଜ୍। ତାଙ୍କ ପରିବାର ଆମେରିକାରେ ରହୁଥିବାରୁ ଏହାର ଲିଙ୍କ୍ ବିଦେଶ ଯାଏ ବ୍ୟାପିଥିବା ଚର୍ଚ୍ଚା ହୋଇଥିଲା। ଫୟାଜଙ୍କ ଘର କୋଲକାତା ପାକ୍ଷ୍ଟ୍ରିଟ୍ ଥାନା-୩୦ ମେନରୋଡ ଲେନ୍ରେ। ସେ କଟକ ସଦର ଥାନା ଫୁଲନଖରା ଅନନ୍ତପୁରରେ ରହୁଥିଲେ। ତାଙ୍କ ପରିଚାଳନାରେ ଓଡ଼ିଶା, ପଶ୍ଚିମବଙ୍ଗ, ଝାଡ଼ଖଣ୍ଡ ସମେତ ବିଭିନ୍ନ ସ୍ଥାନରେ ୮ରୁ ଊର୍ଦ୍ଧ୍ୱ ସେଲ୍ଟର ହୋମ୍ ଥିବା ଜଣାପଡ଼ିଥିଲା। ଅନ୍ୟତମ ଅଭିଯୁକ୍ତ ସୀମାଞ୍ଚଳଙ୍କ ଘର କଳାହାଣ୍ଡି ଜିଲା ମଦନପୁର ରାମପୁର ଥାନା ଖଲିଆମୁଣ୍ଡା ଅଞ୍ଚଳରେ। ଘଟଣା ପରେ ଅନୁଷ୍ଠାନକୁ ସିଲ୍ କରାଯାଇଥିଲା। ଜିଲା ଶିଶୁ ସୁରକ୍ଷା ଅଧିକାରୀ ଅନୁରାଧା ଗୋସ୍ବାମୀଙ୍କ ଅଭିଯୋଗକ୍ରମେ ନଂ. ୫୩୭/୧୮, ଦଫା ୩୫୪ (ଏ), ୧୦ ପୋକ୍ସୋ ଆକ୍ଟ ଏବଂ ଶିଶୁ କଲ୍ୟାଣ କମିଟି ପକ୍ଷରୁ ନଂ. ୫୩୯ ଓ ୫୪୦/୧୮ରେ ସଦର ଥାନାରେ ମାମଲା ରୁଜୁ ହୋଇଥିଲା।
