ମୁମ୍ବାଇ: ସୁଶାନ୍ତ ସିଂ ରାଜପୁତ। ବଲିଉଡ୍ର ଏହି ପରିଚିତ ନାଁଟି ଏବେ ଅତିତ ହୋଇଯାଇଛି। ଅସମୟରେ ଦୁନିଆରୁ ବିଦାୟ ନେଇଥିବା ବଲିଉଡ୍ ନାୟକ ସୁଶାନ୍ତ ସିଂ ରାଜପୁତଙ୍କ ପରଲୋକ ସମସ୍ତଙ୍କୁ ଏକ ପ୍ରକାର ଚମକାଇ ଦେଇଛି। ହେଲେ କାହିଁକି ମାତ୍ର ୩୪ ବର୍ଷ ବୟସରେ ସୁଶାନ୍ତ ଏତେବଡ ନିଷ୍ପତ୍ତି ନେଲେ ତାକୁ ନେଇ ଏବେ ସମସ୍ତଙ୍କ ମନରେ ଉଠିଛି ପ୍ରଶ୍ନ। ପ୍ରକୃତରେ ସେ ଆତ୍ମହତ୍ୟା କରିଛନ୍ତି ନା ତାଙ୍କୁ ହତ୍ୟା କରାଯାଇଛି ଏବେବି ଏହାକୁ ନେଇ ଅନେକଙ୍କ ମନରେ ସନ୍ଦେହ ଉପୁଜୁଛି। ଇତିମଧ୍ୟରେ ରବିବାର ସୁଶାନ୍ତ ମୃତ୍ୟୁ ହୋଇଥିବା ବେଳେ ସୋମବାର ତାଙ୍କର ଶେଷକୃତ୍ୟ ସମ୍ପନ୍ନ କରାଯିବ। ଏହାରି ଭିତରେ ତାଙ୍କ ପ୍ରିୟ ବାନ୍ଧବୀ ରିଆ ଚର୍କବର୍ତ୍ତୀ ସୁଶାନ୍ତଙ୍କୁ ଶେଷ ଦର୍ଶନ କରିବାକୁ ହସ୍ପିଟାଲ ପହଞ୍ଚିଥିଲେ। ଏହି ସମୟରେ ରିଆ ଖୁବ୍ ଅପସେଟ୍ ଜଣାପଡୁଥିବା ବେଳେ ସୁଶାନ୍ତଙ୍କ ମୃତ୍ୟୁକୁ ନେଇ ପୋଲିସ ରିଆଙ୍କୁ ଜେରା କରିପାରେ ବୋଲି କୁହାଯାଉଛି। ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଥିବା ବହୁ ଦିନରୁ ଆଲୋଚନା ହେଉଥିଲେ ମଧ୍ୟ ଏହାକୁ ଏମାନେ କେବେ ଖୋଲାଖୋଲି ଭାବେ କହି ନାହାନ୍ତି। ଅନ୍ୟପଟେ ଶେଷଥର ପାଇଁ କୁଆଡେ ସୁଶାନ୍ତ ବାନ୍ଧବୀ ରିଆଙ୍କ ସହ ଫୋନରେ କଥା ହୋଇଥିଲେ। ତେଣୁ ପୋଲିସ ସୁଶାନ୍ତଙ୍କ ମୃତ୍ୟୁକୁ ନେଇ ରିଆଙ୍କୁ ଜେରା କରିପାରେ।
