ଗଣ୍ଡତୁରୁମ, ୯ା୧(ଡି.ଏନ୍.ଏ.)- ବରଗଡ଼ ଜିଲା ଭେଡ଼େନ ବ୍ଲକ ମହୁଲପାଲି ପଁଚେତ୍ ଅଧୀନ ବ୍ରାହ୍ମଣତୁରୁମ ଗଁାର ସୁରେଖା ମେହେର(୪୫)। ସେ ଦୁଇ ବଛର ହେଲା ମେରୁହାଡ଼ ସମସିଆରେ ଖଟେ ପଡ଼ିରହିଛନ୍। ଇ ବାବ୍ଦେ ଗଲା ଡିସେମ୍ବର ୩୦ ତାରିଖ ଧରିତ୍ରୀ ସମ୍ବଲପୁର ସଂସ୍କରଣରେ ‘ଅର୍ଥାଭାବରୁ ହୋଇପାରୁନି ଚିକିସତ୍ା, ଜୀବନ ଯନ୍ତ୍ରଣାରେ ଛଟପଟ ସୁରେଖା’ ଶୀରଷକ୍ରେ ଟିକିନିଖିନୁ ଖବର ବାହାରିଥିଲା। ଖବର ବାହାରଲା ଉତାରୁ ବୁଧୁବାର ଜିଲାପାଳ ଜ୍ୟୋତିରଞ୍ଜନ ପଧାନକଁର ନିରଦେଶରେ ଭେଡ଼େନ ତହସିଲଦାର ସୀମା ସୁନିତା କୁଲୁ, ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଚିକିଛା ଅଧ୍କାରୀ ଡା.ସୁଶାନ୍ତ କର, ପିଏଚ୍ଇଓ ବିହାରୀ ବାରିକ, ଗଣ୍ଡତୁରୁମ ରାଜସ୍ବ ନିରୀକ୍ଷକ ଇନ୍ଦ୍ର କୁମାର ବାଦୀ, ଅମିନ ରୂପକ ଭୋଇ ସୁରେଖାକଁର ଘରେ ପୁହୁଁଚିଥିଲେ। ଡାକ୍ତରୀ ଦଲ ସୁରେଖାକଁର ହାଲ୍ଚାଲ, ଦିହିପା ପଚାରି ବୁଝ୍ବାର ସଂଗେ ସେ ଭଲ ହେବାର ତକ୍ ସବୁ ଚିକିଛା ଖରଚ୍ ପରଶାସନ ବହନ କରବା ବଲି କଥା ଦେଇଥିବାର ଜନାଯାଇଛେ।
ପୂବର ସୂଚନା ଅନ୍ସାରେ ବ୍ରାହ୍ମଣତୁରୁମ ଗଁାର ସରଜୁ ମେହେରକଁର ପରିବାର କହେଲେ ମାଏକିନା ସୁରେଖା, ଦୁଇ ଝି’ ଆର ଗୁଟେ ପୁଓକେ ନେଇ ସଁସାର। ପରିବାରଟା ନିହାତି ଗରିବ୍। ସରଜୁ ଦୁଖ୍ସୁଖ୍ କରି କୁଟୁମ ପୁଷୁଛନ୍। ଏନ୍ତାଥି ୨୦୧୭ ଜୁନ୍ ୨୮ ତାରିଖ୍ ସୁରେଖା ନିଜର ଢବା ଉପରକେ ଧାନ ଶୁଖାବାକେ ଯାଇଥିଲେ। ଉତିରଲାବେଲେ ମାଟି ପାଉଚ୍ରୁ ତାକର ଗୋଡ଼ ଖସ୍ରି ଯାଇ ଅଚେତ୍ ହେଇ ତଲେ ପଡ଼ିଯାଇଥିଲେ। ପରିବାର ଲୋକ୍ ତାହାକୁ ଚିକିଛା ଲାଗି ବୁର୍ଲା ବଡ଼ ଡାକ୍ତରଖାନା ନେଇଥିଲେ। ହେଲେ ସେଠାନେ ଡାକ୍ତର ସୁରେଖାକଁର ଉଚ ଚିକିଛା ଲାଗି କଟକ ବଡ଼ ଡାକ୍ତରଖାନାକେ ନେବାକେ ପରାମଶ ଦେଇଥିଲେ। ଏନ୍ତାଥି ସରଜୁ ମାଏକିନାର ଜୀବନ୍ ବଁଚାବାକେ ଘରର ଜିନିଷପାତି ବିକାଭଂଗା, ଜମି ଗହନା କରି ଟଁକା ଯୁଗାଡ଼ କଲେ। ସୁରେଖା ଜଲ୍ଦି ଭଲ ହେବେ ଭାବି ସରଜୁ ତାହାକୁ କଟକର ଗୁଟେ ନର୍ସିଂହୋମରେ ଭରତି କଲେ। ହେଲେ ସେଠାନେ ବି ଡାକ୍ତରମାନେ ସୁରେଖାକଁର ଉଚ ଚିକିଛା ଦରକାର ଆର ଇଥିରଲାଗି ବହୁତ୍ ଟଁକା ଦରକାର ବଲି କହିଥିଲେ। ଏନ୍ତାଥି ସରଜୁ ଟଁକା ପଏସା ଅଭାବୁ ମୁହୁକାନ ଶୁଖେଇ ସୁରେଖାକୁଁ ଧରି ଘରକେ ଫିରିଆଏଲେ। ସେଦିନ୍ଠାନୁ ସୁରେଖା ଅକରମା ହେଇ ଖଟେ ପଡ଼ିରହିଥିଲେ।
