ପୁରୁଷୋତ୍ତମପୁର,୪ା୫(ଡି.ଏନ୍.ଏ.): ସୁରଟ ଓ କେରଳରୁ ଫେରୁଥିବା ପ୍ରବାସୀ ଓଡ଼ିଆଙ୍କୁ ନେଇ ଚିନ୍ତା ବଢ଼ିଛି। ଏଭଳି ସ୍ଥିତିରେ ଫେରୁଥିବା ଏହି ଓଡ଼ିଆଙ୍କୁ ତତ୍କ୍ଷଣାତ୍ କ୍ବାରାଣ୍ଟାଇନ୍ ସେଣ୍ଟରରେ ନେଇ ରଖି ବାହାରକୁ ନ ଛାଡ଼ିବା ଲାଗି ଅଞ୍ଚଳର ଲୋକେ ଦାବି କରୁଥିବା ବେଳେ ଗଞ୍ଜାମ ଜିଲା ପୁରୁଷୋତ୍ତମପୁର ବ୍ଲକ ପ୍ରଶାସନ ଏଥିପ୍ରତି ଗୁରୁତ୍ୱ ଦେଉ ନଥିବା ଭଳି ଅଭିଯୋଗ ହେଉଛି। ଏହାକୁ ନେଇ ଅଞ୍ଚଳବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଯାହାକି ରବିବାର ରାତି ୧୧ଟାରୁ ସୁରଟରୁ ଏକ ବସ୍ ୪ ଶିଶୁ, ୪ ମହିଳାଙ୍କ ସମେତ ୫୬ ଜଣଙ୍କୁ ନେଇ ପୁରୁଷୋତ୍ତମପୁରରେ ପହଞ୍ଚିଥିଲା। ମାତ୍ର ଏମାନଙ୍କୁ ନେଇ କ୍ୱାରାଣ୍ଟାଇନ୍ ସେଣ୍ଟରରେ ରଖିବା ଲାଗି ବ୍ଲକ ପ୍ରଶାସନର ଆଦୌ ଦେଖା ମିଳି ନ ଥିଲା। ଫଳରେ ବସ୍ରେ ଦୀର୍ଘ ସମୟ ଭୋକ ଉପାସରେ ରହିବା ପରେ ଲୋକେ ବାହାରକୁ ଚାଲି ଆସିଥିଲେ। ଏହା ଦେଖି ସ୍ଥାନୀୟ ଲୋକେ ତହସିଲଦାର ଅରୁଣ କୁମାର ନାୟକଙ୍କୁ ଜଣାଇଥିଲେ। ମାତ୍ର ବ୍ଲକ ପ୍ରଶାସନର ଦେଖା ମିଳି ନ ଥିଲା। ସ୍ଥାନୀୟ ଲୋକେ, ତହସିଲଦାର ଓ ଥାନାଧିକାରୀ ଜଗନ୍ନାଥ ମଲ୍ଲିକ କିଛି ଶୁଖିଲା ଖାଦ୍ୟ,ପାଣି ଯୋଗାଇବା ସହ ସୁରକ୍ଷା ଦେଇ ସହର ଉପକଣ୍ଠ ରାସ୍ତା ପାର୍ଶ୍ୱରେ ରଖି ସୋମବାର ସକାଳେ ପ୍ରତାପୁର କ୍ବାରାଣ୍ଟାଇନ୍ ସେଣ୍ଟରକୁ ନେଇଥିଲେ। ସେହିପରି ସୋମବାର ସକାଳେ ବିଭିନ୍ନ ଗାଡ଼ିରେ ପୁରୁଷୋତ୍ତମପୁର ବ୍ଲକକୁ ଆସିଥିବା ବ୍ୟକ୍ତିମାନଙ୍କୁ ବ୍ଲକ ପ୍ରଶାସନ ପକ୍ଷରୁ କ୍ୱାରାଣ୍ଟାଇନ୍ ସେଣ୍ଟରକୁ ନେବା ଲାଗି ଜରୁରୀ ପଦକ୍ଷେପ ନିଆଯାଉ ନ ଥିବାରୁ ସହର ମଧ୍ୟରେ ଗାଡ଼ିଗୁଡ଼ିକ ଘଣ୍ଟା ଘଣ୍ଟା ଧରି ଠିଆ ହୋଇରହୁଛି। ଫଳରେ ଲୋକେ ଗାଡ଼ିରୁ ଓହ୍ଲାଇ ବିଭିନ୍ନ ଦୋକାନରୁ କିଣି ଖାଉଛନ୍ତି। ଏନେଇ ସ୍ଥାନୀୟ ଅଞ୍ଚଳରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି।
