ସୁନ୍ଦରଗଡ଼, ୧୫।୧ (ଡି.ଏନ୍.ଏ.)- ଆଗାମୀ ଦିନରେ ପଶ୍ଚିମ ଓଡ଼ିଶାରେ ହାଇକୋର୍ଟ ବେଞ୍ଚ ସ୍ଥାପନ ନ ହେବା ପର୍ଯ୍ୟନ୍ତ ଓକିଲଙ୍କ ଆନ୍ଦୋଳନ ଚାଲୁ ରହିବ। ମଙ୍ଗଳବାର ସୁନ୍ଦରଗଡ଼ଠାରେ ପଶ୍ଚିମ ଓଡ଼ିଶା ଓକିଲ ସଂଘ ସମୂହ କେନ୍ଦ୍ରୀୟ କ୍ରିୟାନୁଷ୍ଠାନ କମିଟିର ସାଧାରଣ ବୈଠକରେ ଏହି ନିଷ୍ପତ୍ତି ହୋଇଛି। କେନ୍ଦ୍ରୀୟ କ୍ରିୟାନୁଷ୍ଠାନ କମିଟିର ଆବାହକ ଅଶୋକ କୁମାର ଦାଶ ଏହା ପ୍ରକାଶ କରିଛନ୍ତି। ୩୧ ତାରିଖ ଯାଏ ସାମଗ୍ରିକ ଭାବେ ଏହି ଆନ୍ଦୋଳନ ଚାଲୁ ରହିବା ସହ ସ୍ଥାନୀୟ କ୍ଷେତ୍ରରେ ଓକିଲ ସଂଘର ସଭାପତିମାନେ ବିଚାର କରି ଆନ୍ଦୋଳନ କିଭଳି ଆଗକୁ ନେଇ ହେବ ସେ ସମ୍ପର୍କରେ ନିଷ୍ପତ୍ତି ନେବେ ବୋଲି କହିଛନ୍ତି। ସୁପ୍ରିମ କୋର୍ଟକୁ ଯେଉଁ ବିଭ୍ରାନ୍ତିକର ତଥ୍ୟ ଦିଆଯାଇଛି ଓ ସୁପ୍ରିମ କୋର୍ଟ ଯେଉଁ ନିଷ୍ପତ୍ତି ନେଇଛନ୍ତି ଆମେ ଏ ସମ୍ପର୍କରେ ସୁପ୍ରିମ କୋର୍ଟକୁ ଜଣାଇବୁ। ସୁପ୍ରମକୋର୍ଟ ଆମକଥା ଶୁଣି ପଶ୍ଚିମ ଓଡ଼ିଶାରେ ହାଇକୋର୍ଟ ବେଞ୍ଚ ସ୍ଥାପନ ପାଇଁ ପଥ ସୁଗମ କରିବେ ବୋଲି ଆମେ ଆଶା ପ୍ରକାଶ କରୁଛୁ। ଆନ୍ଦୋଳନରତ ଓକିଲମାନଙ୍କର ଲାଇସେନ୍ସ ବାତିଲ କରିବା ଅଧିକାର କୌଣସି ଓକିଲମାନଙ୍କର ନାହିଁ। ଆମକୁ କାରଣ ଦର୍ଶାଅ ନୋଟିସ ପରେ ଆମେ ଏହାର ଜବାବ ଦେବୁ। ଅତୀତରେ ବହୁତ ଥର ବାର କାଉନସିଲ ଅଫ୍ ଇଣ୍ଡିଆ ଆମକୁ ନୋଟିସ ଦେଇଛି ଆମେ ତାର ଜବାବ୍ ଦେଇଛୁ ବୋଲି ସେ କହିଛନ୍ତି। କେନ୍ଦ୍ରୀୟ କ୍ରିୟାନୁଷ୍ଠାନ କମିଟିର ଆବାହକ ଦାଶଙ୍କ ଅଧ୍ୟକ୍ଷତାରେ ସ୍ଥାନୀୟ ପ୍ରଗତି ମଣ୍ଡପ ଠାରେ ଏ ବୈଠକରେ କେନ୍ଦ୍ରୀୟ କ୍ରିୟାନୁଷ୍ଠାନ କମିଟିର ସହ ଆବାହକ ସୁରେଶ୍ୱର ମିଶ୍ର, ରଘୁମଣି ପଟେଲ, ସତ୍ୟ ନାରାୟଣ ପଣ୍ଡା, ପ୍ରମୋଦ ଦାଶ, ନିରଞ୍ଜନ ତ୍ରିପାଠୀ, ସମ୍ବଲପୁର ଜିଲା ଓକିଲ ସଂଘ ସଭାପତି ବିଜିୟେନ୍ଦ୍ର ପ୍ରଧାନ, ସୁନ୍ଦରଗଡ଼ ଜିଲା ଓକିଲ ସଂଘ ସଭାପତି ଦୁଷ୍ମନ୍ତ ନାଏକ, ସମ୍ପାଦକ ଅଶୋକ କୁମାର ସ୍ବାଇଁ, ନିମାଇଁ ନାଏକ, ଝାରସୁଗୁଡା ଓକିଲସଂଘର ସ୍ନ୍ୀପ ଅଗସ୍ତି, କୁଚିଣ୍ଡା ସଂଘର ପ୍ରମୋଦ ଛୁରିଆ, ରାଜଗାଙ୍ଗପୁର ସଭାପତି ଲବୀନ୍ଦ୍ର ବେହେରା, ପଦ୍ମପୁର ସଂଘର କିଶୋର ମୋହନ, ବରପାଲି ସଂଘର ସଭାପତି ବକ୍ତବ୍ୟ ରଖି ଆନ୍ଦୋଳନର ରୂପରେଖ ସମ୍ପର୍କରେ ମତ ରଖିଥିଲେ। ଅନ୍ୟମାନଙ୍କ ମଧ୍ୟରେ ସୁନ୍ଦରଗଡ ଓକିଲ ସଂଘର କିଶୋର ନାଏକ, ସ୍ବରାଜ ପଟେଲ, ନରେଶ ନାଏକ, ଉମାଶଙ୍କର ପଟେଲ, ପ୍ରେମ କୁମାର, ପ୍ରତିମା ମିଶ୍ର, ବୁଦ୍ଧଦେବ ନାଏକ, ସୁକାନ୍ତ ପାଣିଗ୍ରାହୀ, ସୁବୋଧ ପାଣିଗ୍ରାହୀ ପ୍ରମୁଖ ଉପସ୍ଥିତ ରହି ଆଲୋଚନାରେ ଭାଗ ନେଇଥିଲେ।
