ପୁରୀ ଅଫିସ,୧୯ା୨:ଓଡ଼ିଶାର ପ୍ରଥିତଯଶା ଶାସ୍ତ୍ରୀୟ କଣ୍ଠଶିଳ୍ପୀ ତଥା ଭାରତୀୟ ସଙ୍ଗୀତ ଦୁନିଆର ମହାନ୍ ପ୍ରତିଭା ଡ. ସୁନନ୍ଦା ପଟ୍ଟନାୟକଙ୍କ ବଳିଆପଣ୍ଡା ଦାମୋଦର ରୋଡ଼ସ୍ଥିତ ବାସଭବନକୁ ସ୍ମୃତି ସଦନ ଭାବେ ବିକଶିତ କରାଯିବ। ତାଙ୍କ ଦ୍ୱାରା ବ୍ୟବହୃତ ବାଦ୍ୟଯନ୍ତ୍ର ଏବଂ ଅନ୍ୟାନ୍ୟ ସାମଗ୍ରୀକୁ ଉତ୍କଳ ସଙ୍ଗୀତ ମହାବିଦ୍ୟାଳୟ ପରିସରରେ ଏକ ସ୍ବତନ୍ତ୍ର ଗ୍ୟାଲେରିରେ ସଂରକ୍ଷିତ କରି ରଖାଯିବ। ସୁନନ୍ଦାଙ୍କ ସ୍ମୃତିରକ୍ଷା ଉଦ୍ଦେଶ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏମିତି ଅନେକ କାର୍ଯ୍ୟକ୍ରମ କରିବାକୁ ଘୋଷଣା କରିଛନ୍ତି। ସେହି ଅନୁଯାୟୀ, ଓଡ଼ିଆ ଭାଷା ସାହିତ୍ୟ ଓ ସଂସ୍କୃତି ବିଭାଗ ପକ୍ଷରୁ ପ୍ରାରମ୍ଭିକ ଉଦ୍ୟମ ଆରମ୍ଭ ହୋଇଛି।
ସୋମବାର ବିଭାଗର ଅଧିକାରୀମାନେ ପୁରୀରେ ଥିବା ସୁନନ୍ଦାଙ୍କ ଘର ପରିଦର୍ଶନ କରିଛନ୍ତି। ଘରଟି ଏବେ ପରିତ୍ୟକ୍ତ ହୋଇପଡ଼ିିଛି। ବାହାର ପାଚେରି ଏବଂ ଘରର କେତେକ ଅଂଶ ଭାଙ୍ଗି ଗଛ ଉଠିଯାଇଛି। ବାହାର ଗ୍ରୀଲ ଖୋଲାଥିବାବେଳେ ୨ଟି ବଖରାରୁ ଗୋଟିଏରେ ତାଲା ପଡ଼ିଛି। ଛାତ ଉପର ଶିଡ଼ି କବାଟ ସମ୍ପୂର୍ଣ୍ଣ ଭାଙ୍ଗିଯାଇଛି। ଏସବୁକୁ ଦେଖି ଅଧିକାରୀମାନେ ରିପୋର୍ଟ ପ୍ରସ୍ତୁତ କରିଛନ୍ତି। ସେହିପରି ଆସନ୍ତା ୨୦ ତାରିଖରେ ଅଧିକାରୀମାନେ ତାଙ୍କ କଟକ ବାସଭବନ ପରିଦର୍ଶନରେ ଯିବେ ବୋଲି ଜଣାପଡ଼ିିଛି। ଦୁଇଟିଯାକ ବାସଭବନ ବୁଲିବା ପରେ ସେମାନେ ବିଭାଗୀୟ ଶାସନ ସଚିବଙ୍କୁ ରିପୋର୍ଟ ଦେବେ। ରିପୋର୍ଟକୁ ଆଧାର କରି ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ଅନୁଯାୟୀ ପଦକ୍ଷେପ ନିଆଯିବ। ସୋମବାର ପୁରୀ ଆସିଥିବା ଅଧିକାରୀଙ୍କ ମଧ୍ୟରେ ରାଜ୍ୟ ସଂଗ୍ରହାଳୟର କ୍ୟୁରେଟର ତଥା ଓଡ଼ିଶା ସାହିତ୍ୟ ଏକାଡେମୀ ସଚିବ ସୁଚିସ୍ମିତା ମନ୍ତ୍ରୀ, ଉତ୍କଳ ସଙ୍ଗୀତ ମହାବିଦ୍ୟାଳୟ ଅଧ୍ୟାପକ ପ୍ରଦୀପ କୁମାର ଦାସ, ସଂଗ୍ରହାଳୟର ଏମ୍. ସଞ୍ଜୀବ କୁମାର ସାମିଲ ଥିଲେ। ସେମାନଙ୍କ ସହିତ ସୁନାବେଶ ଭଜନ ସମାରୋହ ସମିତି ସାଧାରଣ ସମ୍ପାଦକ ମନୋଜ କୁମାର ଦାସମହାପାତ୍ର, ଅଭିନନ୍ଦିନିକା ସମ୍ପାଦକ ଶ୍ୟାମପ୍ରକାଶ ସେନାପତି ଉପସ୍ଥିତ ଥିଲେ।
ସୂଚନାଥାଉ କି, ପ୍ରବାଦ ପୁରୁଷ ବିଜୁ ପଟ୍ଟନାୟକ ସୁନନ୍ଦାଙ୍କୁ ସଙ୍ଗୀତ ସାଧନା ପାଇଁ ପୁରୀରେ ପ୍ରାୟ ୨ ଏକର ଜମି ପ୍ରଦାନ କରିଥିଲେ। ସୁନନ୍ଦାଙ୍କ ବିୟୋଗ ପରେ ପୁରୀର ବିଭିନ୍ନ ଅନୁଷ୍ଠାନ ପକ୍ଷରୁ ରାଜ୍ୟ ସରକାରଙ୍କ ନିକଟରେ ଏକାଧିକ ଦାବି ରଖାଯାଇଥିଲା। ସୁନନ୍ଦାଙ୍କୁ ମରଣୋତ୍ତର ପଦ୍ମଶ୍ରୀ ପ୍ରଦାନ, ପୁରୀ ବାସଗୃହକୁ ଜବରଦଖଲ ମୁକ୍ତ କରି ସରକାର ତାହାକୁ ସଙ୍ଗୀତ ସ୍ମାରକୀ ଘୋଷଣା କରିବା, ଉତ୍କଳ ସଙ୍ଗୀତ ମହାବିଦ୍ୟାଳୟରେ ତାଙ୍କ ନାମରେ ଚେୟାର ପ୍ରତିଷ୍ଠା କରାଯିବା ଆଦି ଦାବି ହୋଇଥିଲା।
