ନୂଆଦିଲ୍ଲୀ,୩।୫(ପି.ଟି.): ଧଳା ବଲ୍ କ୍ରିକେଟ ବା ସୀମିତ ଓଭର ଫର୍ମାଟରେ ଅଧିନାୟକ ବିରାଟ କୋହଲିଙ୍କ ତୁଳନାରେ ଓପନର ରୋହିତ ର୍ଶମା ଅଧିକ ପ୍ରଭାବୀ ବୋଲି ପୂର୍ବତନ କ୍ରିକେଟର ଗୌତମ ଗମ୍ଭୀର କହିଛନ୍ତି। ପରିସଂଖ୍ୟାନ ଦୃଷ୍ଟିକୋଣରୁ ଦେଖିବାକୁ ଗଲେ କୋହଲି ଆଗରେ ରହିବେ। ଏହା ସତ୍ତ୍ୱେ ରୋହିତ ଦିନିକିଆ ଓ ଟି୨୦ରେ ଅଧିକ ପ୍ରଭାବଶାଳୀ ବୋଲି ସେ କହିଛନ୍ତି। ତେବେ ସୀମିତ ଓଭରରେ କୋହଲି ରୋହିତଙ୍କ ଅପେକ୍ଷ ଅଧିକ ରନ ସଂଗ୍ରହ କରିଛନ୍ତି। ତେବେ ଇମ୍ପାକ୍ଟ ବା ପ୍ରଭାବ ଦୃଷ୍ଟିକୋଣରୁ ଦେଖିବାକୁ ଗଲେ ରୋହିତ ଆଗରେ ରହିବେ। ସୀମିତ ଓଭରରେ କୋହଲି ଏବେ ସର୍ବଶ୍ରେଷ୍ଠ ବିବେଚିତ ହେଉଛନ୍ତି। ତେବେ ଧଳା ବଲ୍ରେ ରୋହିତ ଅଧିକ ପ୍ରଭାବ ପକାଇବାରେ ସମର୍ଥ ହୋଇଥାନ୍ତି ବୋଲି ସ୍ପୋଟର୍ସ ଟକ୍କୁ ସାକ୍ଷାତକାର ଦେଇ କହିଛନ୍ତି।
ଏବେ ରୋହିତ ବିଶ୍ୱରେ ଶ୍ରେଷ୍ଠ ହ୍ବାଇଟ୍ ବଲ୍ କ୍ରିକେଟର। ମୋଟାମୋଟି ଉପରେ ଶ୍ରେଷ୍ଠ ହୋଇ ନ ଥିଲେ ମଧ୍ୟ ବର୍ତ୍ତମାନ ପାଇଁ ସେ ଶ୍ରେଷ୍ଠ। ବିଶ୍ୱର ଏକାମାତ୍ର ଖେଳାଳି ଭାବେ ସେ ଦିନିକିଆରେ ୩ଟି ଦ୍ୱିଶତକ ଅର୍ଜନ କରି ରେକର୍ଡ କରିଛନ୍ତି। ସେ ମଧ୍ୟ ଗତ ବିଶ୍ୱକପ୍ରେ ୫ଟି ଶତକ ହାସଲ କରିଥିଲେ। ବିଶ୍ୱକପ୍ର ଗୋଟିଏ ସଂସ୍କରଣରେ ୫ଟି ଶତକ ହାସଲକରି ରେକର୍ଡ କରିଥିଲେ। ୧୦୦ ରନ ସଂଗ୍ରହ କରିବା ପରେ ସେ ବଡ଼ ଇନିଂସ ସବୁବେଳେ ଖେଳିଥାନ୍ତି। କୋହଲି ଓ ରୋହିତଙ୍କ ମଧ୍ୟ କିଏ ଶ୍ରେଷ୍ଠ ତାହା ବିଚାର କରିବା ନିଶ୍ଚିତ ଭାବେ କଷ୍ଟକର ବୋଲି ସେ କହିଛନ୍ତି।
୩୩ ବର୍ଷୀୟ ରୋହିତ ୨୨୪ଟି ଦିନିକିଆ ଖେଳି ୪୯.୨୭ ରନ ହାରରେ ୮୮.୯୨ ଷ୍ଟ୍ରାଇକ୍ରେଟ୍ରେ ୯୧୧୫ ରନ ସଂଗ୍ରହ କରିଛନ୍ତି। ଏଥିରେ ୨୯ଟି ଶତକ ଓ ୪୩ଟି ଅର୍ଦ୍ଧଶତକ ସାମିଲ ରହିଛି। ସେହିପରି ଟି୨୦ରେ ସେ ୧୦୮ଟି ମ୍ୟାଚ୍ ଖେଳି ୩୨.୬୨ ରନହାରରେ ୧୩୮.୭୮ ରନ ହାରରେ ୨୨୭୩ ରନ ସଂଗ୍ରହ କରିଛନ୍ତି। ଅପରପକ୍ଷରେ କୋହଲି ୨୪୮ଟି ଦିନିକିଆ ଖେଳି ୫୯.୩୩ ରନ ହାରରେ ୧୧,୮୬୭ ରନ ସଂଗ୍ରହ କରିଛନ୍ତି। ଏଥିରେ ୪୩ଟି ଶତକ ଓ ୫୮ଟି ଅର୍ଦ୍ଧଶତକ ସାମିଲ ରହିଛି। ୮୨ଟି ଟି୨୦ ମ୍ୟାଚ୍ ଖେଳି କୋହଲି ୫୦.୮୦ ରନ ହାରରେ ୧୩୮.୨୪ ଷ୍ଟ୍ରାଇକ୍ରେଟ୍ରେ ୨୭୯୪ ରନ ସଂଗ୍ରହ କରିଛନ୍ତି। ରୋହିତଙ୍କ ସଫଳତା ପାଇଁ ଗମ୍ଭୀର ମହେନ୍ଦ୍ର ସିଂ ଧୋନୀଙ୍କୁ ଶ୍ରେୟ ଦେଇଛନ୍ତି।
