ଭୁବନେଶ୍ୱର,୧୪।୨(ବ୍ୟୁରୋ): ରାଜ୍ୟରେ ଶିଳ୍ପ ବିକାଶ ଏବଂ ନିଯୁକ୍ତି କ୍ଷେତ୍ରରେ ଅଧିକ ସୁଯୋଗ ସୃଷ୍ଟି କରିବା ପାଇଁ ପୁଞ୍ଜି ନିବେଶ କରିବାକୁ ଥିବା ୮ଟି ନୂତନ ପ୍ରସ୍ତାବିତ ପ୍ରକଳ୍ପକୁ ଅନୁମୋଦନ ଦେଇଛନ୍ତି ରାଜ୍ୟ ସରକାର। ଲୋକସେବା ଭବନଠାରେ ଗୁରୁବାର ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଅନୁଷ୍ଠିତ ସିଙ୍ଗଲ ଓ୍ବିଣ୍ଡୋ କର୍ତ୍ତୃପକ୍ଷ ବୈଠକରେ ପ୍ରକଳ୍ପଗୁଡ଼ିକୁ ଅନୁମୋଦନ ମିଳିଛି। ଏହି ପ୍ରକଳ୍ପଗୁଡ଼ିକ ଦ୍ୱାରା ରାଜ୍ୟରେ ଅଧିକ ୧୬୦୯.୪୯ କୋଟି ଟଙ୍କାର ପୁଞ୍ଜି ନିବେଶ ହେବା ସହ ୧୪୫୦ ଲୋକଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହେବ। ଓ୍ବେବ୍ ପୋର୍ଟାଲ ମାଧ୍ୟମରେ ଶିଳ୍ପ ବିଭାଗରୁ ଯାଉଥିବା ବିଭିନ୍ନ ପୁଞ୍ଜିନିବେଶ ପ୍ରକଳ୍ପ ସମ୍ବନ୍ଧିତ ଅନୁମୋଦନ ନିର୍ଦ୍ଧାରିତ ସମୟସୀମା ମଧ୍ୟରେ ଅପଲୋଡ୍ କରିବାକୁ ବିଭିନ୍ନ ବିଭାଗକୁ କୁହାଯାଇଛି। ଏହାସହ ପ୍ରକଳ୍ପ ପାଇଁ ଆବଶ୍ୟକ ଜମି ଓ ଜଳର ବାସ୍ତବ ଆକଳନ କରିବା ଲାଗି ମଧ୍ୟ ନିର୍ଦ୍ଦେଶ ଦିଆଯିଇଛି। ଏହାଛଡ଼ା ଶିଳ୍ପ ପାଇଁ ଆବଶ୍ୟକ ଜମିର ଏକ ନିର୍ଦ୍ଦିଷ୍ଟ ମାନକ ନିର୍ଦ୍ଧାରଣ କରିବାକୁ ଉନ୍ନୟନ କମିଶନରସୁରେଶ ମହାପାତ୍ର କହିଛନ୍ତି।
ଅନୁମୋଦିତ ପ୍ରକଳ୍ପଗୁଡ଼ିକ ମଧ୍ୟରେ ଗଞ୍ଜାମ ଜିଲାର ଗୋପାଳପୁର ଶିଳ୍ପାଞ୍ଚଳରେ ଟାଟା କମ୍ପାନୀର ଚା’ ବ୍ଲେଣ୍ଡିଂ ଏବଂ ପ୍ୟାକେଜିଂର ଖାଦ୍ୟ ପ୍ରକ୍ରିୟାକରଣ ପ୍ରକଳ୍ପ ହେବ। ଏଥିପାଇଁ ୮୩.୫୩ କୋଟି ଖର୍ଚ୍ଚରେ କରାଯିବାକୁ ଥିବାବେଳେ ଏଥିରେ ୨୯୪ ଜଣ ନିଯୁକ୍ତି ପାଇବେ। ଝାରସୁଗୁଡ଼ା ଜିଲାରେ ରୁନାୟା ମେଟ୍ସୋର୍ସର କୋଇଲା ତା’ର ପିଚ୍ ସମ୍ପର୍କିତ ପେଟ୍ରୋକେମିକାଲ ପ୍ରକଳ୍ପ ହେବ। ଏଥିଲାଗି ୨୧୧ କୋଟି ଟଙ୍କା ଖର୍ଚ୍ଚ ହେବ ଏବଂ ଏଥିରେ ୨୧୨ଜଣଙ୍କୁ ନିଯୁକ୍ତି ମିଳିବ। କଟକ ଜିଲାର ରାମଦାସପୁର ଶିଳ୍ପାଞ୍ଚଳରେ ଏଚ୍ଡିପିଇ ଥର୍ମୋପ୍ଲାଷ୍ଟିକ୍ ପାଇପ୍ କାରଖାନା କରାଯିବ। ଏଥିରେ ୬୦.୦୬ କୋଟି ଖର୍ଚ୍ଚ ହେବ ଏବଂ ୧୫୦ ଜଣଙ୍କୁ ନିଯୁକ୍ତି ମିଳିବ। ଭୁବନେଶ୍ୱରରେ ଆପିଜେ ସୁରେନ୍ଦ୍ର ପାର୍କ ହୋଟେଲ ଶିଳ୍ପ କରାଯିବ। ଏଥିପାଇଁ ୧୫୦ କୋଟି ଟଙ୍କା ଖର୍ଚ୍ଚ ହେବାକୁ ଥିବାବେଳେ ୧୫୦ ଜଣଙ୍କୁ ନିଯୁକ୍ତି ମିଳିବ। ଖୋର୍ଦ୍ଧାରେ କମାତ ହୋଟେଲ ଶିଳ୍ପ ୫୨ କୋଟି ଟଙ୍କା ଖର୍ଚ୍ଚରେ ହେବ। ଏଥିରେ ୧୬୦ଜଣ ନିଯୁକ୍ତି ପାଇବେ। କେନ୍ଦୁଝର ଜିଲାରେ ତ୍ରିବେଣୀ ଆର୍ଥ ମୁଭର୍ସ ଦ୍ୱାରା ଭୂତଳ ସ୍ଲରି ପାଇପ୍ ଲାଇନ ୯୪୮ କୋଟି ଟଙ୍କା ଖର୍ଚ୍ଚରେ ସ୍ଥାପନ ହେବ ଏବଂ ଏଥିରେ ୨୧୭ଜଣ ନିଯୁକ୍ତି ପାଇବେ। ଅନୁଗୋଳ ଜିଲାରେ ସିଡିଇଟି ଏକ୍ସପ୍ଲୋସିଭ୍ ପ୍ରାଇଭେଟ ଲିମିଟେଡ ଦ୍ୱାରା ଏକ କ୍ୟାଟ୍ରିଜ୍ ଏକ୍ସପ୍ଲୋସିଭ ଉତ୍ପାଦନ କାରଖାନା ୫୫କୋଟି ଟଙ୍କା ଖର୍ଚ୍ଚରେ ହେବାକୁ ଥିବାବେଳେ ଏଥିରେ ୧୭୭ ଜଣଙ୍କୁ ନିଯୁକ୍ତି ମିଳିବ। ସେହିପରି ଯାଜପୁର ଜିଲାର କଳିଙ୍ଗନଗର ଶିଳ୍ପାଞ୍ଚଳରେ ୫୦କୋଟି ଟଙ୍କା ଖର୍ଚ୍ଚରେ ଆପିଜେ ଲଜିଷ୍ଟିକ୍ ପାର୍କର ସମ୍ପ୍ରସାରଣ କରାଯିବ ଏବଂ ଏଥିରେ ୯୦ ଜଣ ନିଯୁକ୍ତି ପାଇବେ।
