ଧର୍ମଶାଳା,୧୨।୮(ଡି.ଏନ୍.ଏ.)- ଧର୍ମଶାଳା ବ୍ଲକ ଜାରକାସ୍ଥିତ ସିଭିକ ସେଣ୍ଟର ପରିସରରେ ଗୋକର୍ଣ୍ଣିକା ସାହିତ୍ୟ ସମାଜର ୪୪ତମ ବାର୍ଷିକ ଉତ୍ସବ, ଗୋକର୍ଣ୍ଣିକା ପୁରସ୍କାର ଓ ପୁସ୍ତକ ଉନ୍ମୋଚନ ଉତ୍ସବ ରବିବାର ଅନୁଷ୍ଠିତ ହୋଇଯାଇଛି। ବିଶିଷ୍ଠ ଗାଳ୍ପିକ ଓ ସ୍ତମ୍ଭକାର ଅଧ୍ୟାପକ ବିଶ୍ୱରଞ୍ଜନ ପ୍ରଦୀପ ପ୍ରଜ୍ୱଳନ କରି କାର୍ଯ୍ୟକ୍ରମ ଉଦ୍ଘାଟନ କରିଥିଲେ। ସାହିତ୍ୟ ମାଧ୍ୟମରେ ଜାତିର ପ୍ରଗତି ଓ ପ୍ରତିଷ୍ଠା ଭରିଥାଏ। ଦୀର୍ଘ ୪୦ ବର୍ଷ ଧରି ଗ୍ରାମାଞ୍ଚଳରୁ ଗୋକର୍ଣ୍ଣିକା ପ୍ରକାଶ ପାଇ ରାଜ୍ୟରେ ଏକ ସ୍ବତନ୍ତ୍ର ସ୍ଥାନ ବଜାୟ ରଖି ପାରିଛି। ଏଥିପାଇଁ ଉଦ୍ୟକ୍ତାମାନଙ୍କ ଉଦ୍ୟମ ପ୍ରଶଂସନୀୟ ବୋଲି ବିଶ୍ୱରଞ୍ଜନ କହିଥିଲେ। ପ୍ରଖ୍ୟାତ ଗାଳ୍ପିକ ତଥା ଅତିବଡି ଜଗନ୍ନାଥ ଦାଶ ପୁରସ୍କାର ପ୍ରାପ୍ତ ସାହିତି୍ୟକ ଅଚ୍ୟୁତାନନ୍ଦ ପତି ମୁଖ୍ୟ ଅତିଥି ଭାବେ ଯୋଗଦେଇ ସ୍ରଷ୍ଟା ତାର ଅନୁଭବ, ଅନୁଭୂତି ଓ ଦର୍ଶନକୁ ତାର ସୃଷ୍ଟି ମାଧ୍ୟମରେ ପ୍ରକାଶ କରିବାକୁ ଜୀବନ ବ୍ୟାପି ସାଧନାରେ ମଗ୍ନ ରହିଥାଏ ବୋଲି କହିଥିଲେ। ମୁଖ୍ୟ ବକ୍ତା ଭାବେ ଗୀତି କବି ଧନଞ୍ଜୟ ସ୍ବାଇଁ ଯୋଗଦେଇ ସାହିତ୍ୟର ଅଭିବୃଦ୍ଧି ପାରିପାର୍ଶ୍ୱିକ ଅବସ୍ଥା ଉପରେ ନିର୍ଭର କରେ ଓ ଭାଷା ସାହିତ୍ୟର ଏକ ଅଙ୍ଗ ବୋଲି କହିଥିଲେ। ଗୋକର୍ଣ୍ଣିକା ସାହିତ୍ୟ ସମାଜ ସଭାପତି ରମାକାନ୍ତ ଜେନା ଉତ୍ସବରେ ସଭାପତିତ୍ୱ କରିଥିଲେ। ଏହି ଅବସରରେ ଗାଳ୍ପିକ ରୁଦ୍ରନାରାୟଣ ପୃଷ୍ଟିଙ୍କ ଗଳ୍ପ ପୁସ୍ତକ ”ଭିନ୍ନ ଏକ ବନଫୁଲ“ ଓ ଅନୁଷ୍ଠାନ ପକ୍ଷରୁ ପ୍ରକାଶିତ ସ୍ମରଣିକାକୁ ଅତିଥିମାନେ ଉନ୍ମୋଚନ କରିଥିଲେ। ଏଥିସହ ଚଳିତ ବର୍ଷର ମର୍ଯ୍ୟାଦାଜନକ ଗୋକର୍ଣ୍ଣିକା ପୁରସ୍କାର ଜଗତସିଂହପୁର ଜିଲାପାଳ ତଥା ବିଶିଷ୍ଟ ଗାଳ୍ପିକ ସଂଗ୍ରାମ କେଶରୀ ମହାପାତ୍ରଙ୍କୁ ପ୍ରଦାନ କରାଯାଇଛି। ଅତିଥିମାନେ ତାଙ୍କୁ ୧୦ ହଜାର ଟଙ୍କା ସହ ମାନପତ୍ର ଓ ଉପଢ଼ୌକନ ଦେଇ ସମ୍ବର୍ଦ୍ଧିତ କରିଛନ୍ତି। ଗୋକର୍ଣ୍ଣିକା କବିତା ସମ୍ମାନ ୨୦୧୮ ପାଇଁ କବି ସର୍ବେଶ୍ୱର ଶତପଥୀ, ୨୦୧୯ ବର୍ଷ ପାଇଁ ନିରାକାର ଦାସ, ଗୋକର୍ଣ୍ଣିକା ଗଳ୍ପ ସମ୍ମାନ କବିତା ବାରିକ, ଗୋକର୍ଣ୍ଣିକା ପ୍ରବନ୍ଧ ସମ୍ମାନ ରବୀନ୍ଦ୍ର ବିହାରୀ, ଗୀତି କବିତା ସମ୍ମାନ ଅଧ୍ୟାପିକା ରୀନା ମହାପାତ୍ରଙ୍କୁ ମାନପତ୍ର, ଉପଢ଼ୌକନ ପ୍ରଦାନ କରାଯାଇ ସମ୍ବର୍ଦ୍ଧିତ କରାଯାଇଛି। ମାନପତ୍ରଗୁଡ଼ିକୁ ପ୍ରତାପରୁଦ୍ର ପଣ୍ଡା, ବ୍ରଜ କିଶୋର ଦାଶ, ଇନ୍ଦୁପ୍ରଭା ସାମଲ, ପ୍ରଦୀପ ସାମଲ, ମହେଶ୍ୱର ପାଢ଼ୀ ପାଠ କରିଥିଲେ। ସମ୍ପାଦକ ବିଜୟ କୁମାର ନାୟକ ବାର୍ଷିକ ବିବରଣୀ ପାଠ, ତୁହିନାଂଶୁ ରଥ ଅତିଥି ପରିଚୟ ପ୍ରଦାନ, ଜ୍ୟେତି ରଞ୍ଜନ ବିଶ୍ୱାଳ ଜଗନ୍ନାଥ ଜଣାଣ ଗାନ ଓ ପଣ୍ଡିତ ବ୍ରଜକିଶୋର ଦାଶ ବେଦ ପାଠ କରିଥିଲେ। ଅତିଥିମାନଙ୍କୁ ଉପଦେଷ୍ଟା ବିଜୟ କୁମାର ଶତପଥୀ, ଶିଶୁ ସାହିତି୍ୟକ ବିଦ୍ୟାଧର ସାହୁ ଓ ବରିଷ୍ଠ ଉପଦେଷ୍ଟା ବଟକୃଷ୍ଣ ଓଝା ସମ୍ବର୍ଦ୍ଧିତ କରିଥିଲେ। ଉପସଭାପତି ସୁନାକର ସାହୁ ଧନ୍ୟବାଦ ଦେଇଥିଲେ।
