ନୂଆଦିଲ୍ଲୀ,୨୭ା୭(ପି.ଟି.): ସାରଦା ଚିଟ୍ଫଣ୍ଡ ଦୁର୍ନୀତି ମାମଲାର ତଦନ୍ତରେ ସାମିଲ ହେବା ଲାଗି ତୃଣମୂଳ କଂଗ୍ରେସ (ଟିଏମ୍ସି) ଏମ୍ପି ଡେରେକ୍ ଓ’ବ୍ରିଏନ୍ଙ୍କୁ ସିବିଆଇ ସମନ ଜାରି କରିଛି। ଅଗଷ୍ଟ ପ୍ରଥମ ସପ୍ତାହରେ ତାଙ୍କୁ ସିବିଆଇ ଟିମ୍ ଆଗରେ ହାଜର ହେବାକୁ କୁହାଯାଇଛି। ଟିଏମ୍ସି ମୁଖପାତ୍ର ଥିବା ଡେରେକ୍ଙ୍କୁ ଗତ ଜାନୁୟାରୀରେ ସମନ କରାଯାଇଥିବାବେଳେ ପାର୍ଲାମେଣ୍ଟର ଶୀତ ଅଧିବେଶନ ଚାଲୁଥିବା ଦର୍ଶାଇ ସେ ସିବିଆଇକୁ ସମୟ ମାଗିଥିଲେ। ଟିଏମ୍ସି ମୁଖପତ୍ର ‘ଜାଗୋ ବାଂଲା’ ବ୍ୟାଙ୍କ ଆକାଉଣ୍ଟରେ କେତେକ ଆର୍ଥତ୍କ କାରବାରକୁ ନେଇ ସିବିଆଇ ସନ୍ଦେହ ପ୍ରକଟ କରିଥିବାବେଳେ ଏହା ଉପରେ ଡେରେକ୍ଙ୍କୁ ଜେରା କରିପାରନ୍ତି। ଡେରେକ୍ ଉକ୍ତ ଦଳୀୟ ସମ୍ବାଦପତ୍ରର ପ୍ରକାଶକ ଅଛନ୍ତି।
ବେଙ୍ଗଲୀ ଚଳଚ୍ଚିତ୍ର ପ୍ରଯୋଜକ ଶ୍ରୀକାନ୍ତ ମହତା ରୋଜ ଭ୍ୟାଲି ପ୍ରମୋଟରମାନଙ୍କ ସହ ୨୫ କୋଟି ଟଙ୍କାର ଡିଲ୍ କରିଥିଲେ। ଉକ୍ତ ଅର୍ଥର କିଛି ଭାଗ ଜାଗୋ ବାଂଲା ଆକାଉଣ୍ଟକୁ ଆସିଥିବା ସିବିଆଇ ସନ୍ଦେହ କରୁଛି। ଏହା ବ୍ୟତୀତ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ କେତେକ ପେଣ୍ଟିଂକୁ ଚିଟ୍ଫଣ୍ଡ କମ୍ପାନୀ ମାଲିକମାନେ ଅତ୍ୟଧିକ ଦାମ୍ ଦେଇ କିଣିବା ଘଟଣାରେ ମଧ୍ୟ ସିବିଆଇ ଡେରେକ୍ଙ୍କୁ ଜେରା କରିପାରେ। ପୂର୍ବରୁ ଏହି ମାମଲାରେ ଟିଏମ୍ସି ସାଧାରଣ ସମ୍ପାଦକ ସୁବ୍ରତ ବକ୍ସିଙ୍କୁ ସିବିଆଇ ଜେରା କରିଥିଲା। ଅନ୍ୟପକ୍ଷରେ ଟିଏମ୍ସି ସୂଚନା ଅଧିକାର ସଂଶୋଧନ ବିଲ୍କୁ ବିରୋଧ କରିବାରୁ ସିବିଆଇ ନୋଟିସ ଜାରି କରିଥିବା ଡେରେକ୍ ଅଭିଯୋଗ କରିଛନ୍ତି। ସାରଦା ଚିଟ୍ଫଣ୍ଡ ସଂସ୍ଥାରେ ଟଙ୍କା ରଖି ହଜାର ହଜାର ଜମାକାରୀ ଠକାମିର ଶିକାର ହୋଇଥିବାବେଳେ ଏନେଇ ଟିଏମ୍ସିର କେତେଜଣ ନେତା ଓ ମନ୍ତ୍ରୀଙ୍କୁ ଗିରଫ କରାଯାଇଥିଲା।
