ଭୁବନେଶ୍ୱର, ୨୮।୫(ବ୍ୟୁରୋ): କରୋନା ଭାଇରସ ମୁକାବିଲା ପାଇଁ ସାମାଜିକ ଦୂରତା ନିୟମ ଏବଂ ମାସ୍କ ପିନ୍ଧିବାକୁ ବାଧ୍ୟତାମୂଳକ କରାଯାଇଛି। ତେବେ କିଛି ଲୋକ ଏହାକୁ ପାଳନ କରୁ ନ ଥିବା ଦେଖିବାକୁ ମିଳୁଛି। ତେଣୁ କଟକ ଓ ଭୁବନେଶ୍ୱର ଅଞ୍ଚଳରେ ଡ୍ରୋନ୍ ଦ୍ୱାରା ଲୋକଙ୍କୁ ସଚେତନ କରିବ କମିଶନରେଟ ପୋଲିସ। ଏପରିକି ଡ୍ରୋନ୍ ମାଧ୍ୟମରେ ପ୍ରଚାର କରିଯିବ ଓ ମାସ୍କ ପିନ୍ଧିବା ପାଇଁ ବୁଝାଯିବ। ଏ ନେଇ ଗୁରୁବାର ଡ୍ରୋନ୍କୁ ଟେଷ୍ଟ କରାଯାଇଛି। ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ ଏହି ସୂଚନା ଦେଇଛନ୍ତି ।
ସେ କହିଛନ୍ତି ଯେ, ରାଜଧାନୀରେ ଲୋକଙ୍କୁ ସାମାଜିକ ଦୂରତାକୁ ପାଳନ କରିବାକୁ ହେବ। ଏଥିପାଇଁ ଟିମ୍ ମୁତୟନ ହେବେ । ଏମାନେ ବଜାର ଓ ମୁଖ୍ୟ ରାସ୍ତାଗୁଡ଼ିକ ଉପରେ ନଜର ରଖିବେ । କୋଭିଡ-୧୯ ନିୟମ ଉଲ୍ଲଂଘନ କରୁଥିବା ଅର୍ଥାତ ମାସ୍କ ପିନ୍ଧୁ ନଥିବା ଲୋକଙ୍କଠାରୁ ଏହି ଟିମ୍ ଜରିମାନା ଆଦାୟ କରିବ ।
