ମାଲକାନଗିର,୩୦।୭ (ଦୁର୍ଯ୍ୟୋଧନ ପାତ୍ର): ଜଣେ ବିବାହିତ ଯୁବକ ବିବାହର ପ୍ରତିଶ୍ରୁତି ଦେଇ ସମ୍ପର୍କ ଓ ପରେ ପ୍ରତାରଣା ବିରୋଧରେ ବିବାହିତ ପ୍ରେମିକା ଗତ ତିନି ଦିନ ଧରି ପ୍ରେମିକଙ୍କ ଘର ବାରଣ୍ଡାରେ ଧାରଣା ଦେଇଛନ୍ତି। ମାଲକାନଗିରି ଜିଲା ମାଥିଲି ବ୍ଲକ ଅନ୍ତର୍ଗତ ଚାଉଳମେନ୍ଦି ସଦରରେ ଏଭଳି ଅଭାବନୀୟ ଘଟଣା ସାମ୍ନାକୁ ଆସିଛି। ନ୍ୟାୟ ଦାବିରେ ମହିଳା ମହିଳା ଜଣକ ଦିନରାତି ବର୍ଷାକୁ ଖାତିର ନ କରି ଧାରଣାରେ ବସିଥିବା ଦେଖିବାକୁ ମିଳିଛି।
ସୂଚନା ଅନୁଯାୟୀ, ଉଭୟ ଯୁବତୀ ଓ ଯୁବକ ବିବାହିତ । ଏହାପରେ ମଧ୍ୟ ସେମାନଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ିଉଠିଥିଲା। ପରେ ଯୁବକ ଜଣକ ବିବାହ କରିବାର ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ରଖିଥିଲେ। ବର୍ତ୍ତମାନ ଉକ୍ତ ଯୁବତୀ ଜଣକ ନିଜର ପ୍ରଥମ ପତିକୁ ଛାଡି ବିବାହ ପାଇଁ କହିବାରୁ ଅଭିଯୁକ୍ତ ଯୁବକ ଫେରାର୍ ହୋଇଯାଇଛନ୍ତି।
ଯୁବତୀଙ୍କ ଅଭିଯୋଗ ଅନୁସାରେ, ଯୁବକ ଜଣଙ୍କ ବିବାହର ପ୍ରତିଶ୍ରୁତି ଦେଇ ସମ୍ପର୍କ ସ୍ଥାପନ ପରେ ଅନ୍ୟ ଜଣେ ମହିଳାଙ୍କ ସହ ସମ୍ପର୍କ ରଖିଥିଲେ। ଏହାକୁ ନେଇ ପୂର୍ବରୁ ମାମଲା ରୁଜୁ ହୋଇଥିଲା ଏବଂ ଅଭିଯୁକ୍ତ କିଛିଦିନ ଜେଲ୍ରେ ରହିବା ପରେ ଏବେ ବେଲ୍ରେ ଆସିଛନ୍ତି। ବେଲ୍ରେ ବାହାରିବା ପରେ ତାଙ୍କୁ ବିବାହ କରିବେ ବୋଲି ଯୁବକ ତାଙ୍କୁ ପୁଣି ଆଶ୍ୱାସନ ଦେଇଥିଲେ। କିନ୍ତୁ ବର୍ତ୍ତମାନ ସେ ଘର ଛାଡ଼ି ଚାଲିଯାଇଥିବାରୁ ନ୍ୟାୟ ପାଇଁ ସେ ପ୍ରେମିକଙ୍କ ଘର ବାରାଣ୍ଡାରେ ୩ ଦିନ ଧରି ଧାରଣାରେ ବସି ରହିଛନ୍ତି। ପ୍ରେମିକଙ୍କ ପରିବାର ଏବଂ ଗାଁର କିଛି ସାମାଜିକ କର୍ମୀ ତାଙ୍କୁ ନ୍ୟାୟ ମିଳିବ ବୋଲି ପୂର୍ବରୁ କଥା ଦେଇଥିଲେ। ସେମାନଙ୍କ କଥାବାର୍ତ୍ତାର ରେକର୍ଡିଂ ମଧ୍ୟ ତାଙ୍କ ପାଖରେ ଥିବା ଯୁବତୀ ଜଣକ ଦାବି କରିଛନ୍ତି। ହେଲେ ବର୍ତ୍ତମାନ କେହି ଫୋନ ଉଠାଉନାହାନ୍ତି କିମ୍ବା ସହଯୋଗ କରୁନାହାନ୍ତି ବୋଲି ସେ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ।
