ଅନୁଗୋଳ ଅଫିସ, ୨୧।୫- ରାତି ପାହିଲେ ସାବିତ୍ରୀ ବ୍ରତ ଥିବାରୁ ଗୁରୁବାର ଲୋକମୟ ହୋଇଉଠିଥିଲା ଅନୁଗୋଳ ବଜାର। କରୋନା ପାଇଁ ଜାରି ସବୁ କଟକଣାକୁ ଭୁଲି ଲୋକେ ବଜାରରେ ପ୍ରବଳ ଭିଡ଼ ଜମାଇଥିବା ଦେଖିବାକୁ ମିଳିଥିଲା। ବିଭିନ୍ନ ଦୋକାନରେ ଲୋକେ ଜିନିଷ କିଣିବାକୁ ଠେଲାପେଲା ହେଉଥିବା ବେଳେ ପୋଲିସ ସେମାନଙ୍କୁ ତାଗିଦ୍ ମଧ୍ୟ କରୁଥିଲା। ହେଲେ ଏସବୁକୁ ଖାତିର ନ କରିି ସେମାନେ ଜିନିଷପତ୍ର କିଣିବା ସହ ଅନେକେ ଫାଇନ ମଧ୍ୟ ଭରିଥିବା ଜଣାଯାଇଛି।
ସହର ମଝିରେ ଥିବା ଡେଲି ମାର୍କେଟରେ ଶାଢୀ, ଫଳ, ପୂଜା ସାମଗ୍ରୀ, ବହି ଆଦି ବିଭିନ୍ନ ଦୋକାନରେ ଲୋକଙ୍କ ଗହଳି ହୋଇଥିଲା। ଭିଡ଼ ନିୟନ୍ତ୍ରଣ ପାଇଁ ଅନୁଗୋଳ ପୋଲିସ ପକ୍ଷରୁ ପଇଁତରା ମରାଯିବା ସହ ସାମାଜିକ ଦୂରତା ରଖିବାକୁ ତାଗିଦ ମଧ୍ୟ କରାଯାଇଥିଲା। ହେଲେ ଲୋକେ ଏହାକୁ ନ ମାନି ଗହଳି କରିଥିଲେ। ବହୁ ସଂଖ୍ୟାରେ ଲୋକଙ୍କ ସହ ବ୍ୟବସାୟୀ ଏଥିପାଇଁ ଜରିମାନା ମଧ୍ୟ ଗଣିଥିଲେ। ସାବିତ୍ରୀ ବ୍ରତ ସହ ପ୍ରଶାସନ ପକ୍ଷରୁ ନିୟମ କୋହଳ କରାଯାଇଥିବାରୁ ସେମାନେ ବଜାରକୁ ଆସି ଜିନିଷପତ୍ର କିଣୁଥିବା କେତେଜଣ ଗ୍ରାହକ ପ୍ରକାଶ କରିଛନ୍ତି। ଅନୁଗୋଳ ଥାନାର ଜଣେ ବରିଷ୍ଠ ଅଧିକାରୀ କହିଛନ୍ତି, ମାସ୍କ ପିନ୍ଧି ନ ଥିବା ଏବଂ ସାମାଜିକ ଦୂରତା ରକ୍ଷା କରି ନ ଥିବା ଲୋକ ଏବଂ ବ୍ୟବସାୟୀଙ୍କ ନିକଟରୁ ଜରିମାନା ଆଦାୟ କରାଯାଉଛି। ଲୋକମାନେ ଅମାନିଆ ହୋଇ ହାଉଯାଉ ହେଉଛନ୍ତି। ସେମାନେ ନିଜେ ସଚେତନ ନ ହେଲେ କିଛି କରିହେବ ନାହିଁ ବୋଲି ପୋଲିସ ଅଧିକାରୀ ଜଣକ କହିଛନ୍ତି।
