ଭୁବନେଶ୍ୱର,୧୪ା୮(ବ୍ୟୁରୋ): ତଦନ୍ତରେ ଉତ୍କର୍ଷ ପାଇଁ ରାଜ୍ୟରେ କାର୍ଯ୍ୟ କରୁଥିବା ଦୁଇ ଆଇପିଏସ୍ ଅଫିସର ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ପୁରସ୍କୃତ ହେବେ। ସେମାନେ ହେଲେ କୋରାପୁଟ ଏସ୍ପି କନ୍ଓ୍ବର ବିଶାଲ ସିଂ ଓ କ୍ରାଇମ୍ବ୍ରାଞ୍ଚ ଏସ୍ପି ମାଡକର ସନ୍ଦୀପ ସମ୍ପତ। ବେଷ୍ଟ ଆଓ୍ବାର୍ଡ ପାଇଁ ସ୍ବରାଷ୍ଟ୍ର ମନ୍ତ୍ରଣାଳୟ ଚୟନ କରିଥିବା ଦେଶର ୯୪ଜଣ ଅଫିସରଙ୍କ ମଧ୍ୟରେ ରାଜ୍ୟର ଏହି ଦୁଇ ଅଫିସର ରହିଛନ୍ତି। ଆସନ୍ତା ଜାନୁୟାରୀ ୨୬ ସାଧାରଣତନ୍ତ୍ର ଦିବସ ଅବସରରେ ଦିଲ୍ଲୀରେ ସେମାନଙ୍କୁ ଭାରତର ରାଷ୍ଟ୍ରପତି ପୁରସ୍କାର ସ୍ବରୂପ ପଦକ ପ୍ରଦାନ କରିବେ ବୋଲି ସୂଚନା ମିଳିଛି।
୨୦୧୩ରେ ଆଇପିଏସ୍ ଅଫିସର ସିଂ ସବ୍ଡିଭିଜନାଲ ଅଧିକାରୀ ଭାବେ କନ୍ଧମାଳ ଜିଲାର ବାଲିଗୁଡାରେ ଥିବାବେଳେ ୩ ନାବାଳିକା ବଳାକତ୍ାର ମାମଲାର ତଦନ୍ତଭାର ନେଇଥିଲେ। ଠିକ୍ ତଦନ୍ତ କରିବା ସହ ଅଭିଯୁକ୍ତଙ୍କୁ ଗିରଫ କରି ତାଙ୍କ ବିରୋଧରେ ଉପଯୁକ୍ତ ପ୍ରମାଣ କୋର୍ଟରେ ଦାଖଲ କରିଥିଲେ। ଫଳରେ ଅଭିଯୁକ୍ତମାନଙ୍କୁ କୋର୍ଟ ଦଣ୍ଡାଦେଶ ଶୁଣାଇଥିଲେ। ସେହିଭଳି କ୍ରାଇମ୍ବ୍ରାଞ୍ଚ ଏଡିଜି ସନ୍ତୋଷ ଉପାଧ୍ୟାୟ କହିଛନ୍ତି, ସମ୍ପତ ୨୦୧୫ରେ ମାଲକାନଗିରି ଜିଲାରେ ସବ୍ଡିଭିଜନାଲ ପୋଲିସ ଅଫିସରଭାବେ ଦାୟିତ୍ୱରେ ଥିବାବେଳେ ଏକ ନାବାଳିକା ବଳାତ୍କାର ମାମଲାରେ ସଫଳତାର ସହ ତଦନ୍ତ କରିଥିଲେ। ଅଭିଯୁକ୍ତକୁ ଗିରଫ କରିବା ସହ କୋର୍ଟରେ ଅଭିଯୁକ୍ତଙ୍କ ବିରୋଧରେ ଦୃଢ଼ ପ୍ରମାଣ ଦାଖଲ କରିବାରୁ ଠିକ୍ ଦଣ୍ଡାଦେଶ ହୋଇପାରିଥିଲା।
ଏନେଇ ପୋଲିସ ଡିଜି ବି.କେ. ଶର୍ମା କହିଛନ୍ତି, ଏହା ଅନ୍ୟମାନଙ୍କୁ ପ୍ରେରଣା ଯୋଗାଇବ। ଗତ ଦୁଇ ସପ୍ତାହ ହେବ ତଦନ୍ତ ଅଧିକାରୀମାନେ ତଦନ୍ତ ପ୍ରକ୍ରିୟାରେ ଉନ୍ନତି ଆଣିଛନ୍ତି। ଆଗକୁ ମଧ୍ୟ ତଦନ୍ତ ପ୍ରକ୍ରିୟାରେ ଆହୁରି ସୁଧାର ଆସିବ। ଏହା ଆମ ନ୍ୟାୟିକ ବ୍ୟବସ୍ଥା ପାଇଁ ଭଲ କଥା ବୋଲି ସେ କହିଛନ୍ତି। ସୂଚନାଯୋଗ୍ୟ, ୨୦୧୮ରୁ ଏହି ପୁରସ୍କାର ପ୍ରଦାନ କରାଯାଉଛି। ତେବେ ଚଳିତବର୍ଷ ଚୟନ ହୋଇଥିବା ପୋଲିସ ଅଫିସରଙ୍କ ମଧ୍ୟରୁ ୧୫ଜଣ ସିବିଆଇରେ କାର୍ଯ୍ୟ କରୁଥିବାବେଳେ ମହାରାଷ୍ଟ୍ର ପୋଲିସର ୧୧ଜଣ, ଉତ୍ତରପ୍ରଦେଶ ପୋଲିସର ୧୦ଜଣ, କେରଳ ପୋଲିସର ୯ଜଣ, ମଧ୍ୟପ୍ରଦେଶ ପୋଲିସର ୮ଜଣ, ଦିଲ୍ଲୀ ପୋଲିସର ୬ଜଣ ରହିଛନ୍ତି। ଏଥିରେ ୧୩ ଜଣ ମହିଳା ପୋଲିସ ଅଧିକାରୀ ମଧ୍ୟ ରହିଛନ୍ତି।
