ବାରିପଦା/ମୋରଡା,୧୦/୬(ନୀଳାଦ୍ରି ବିହାରୀ ଦଣ୍ଡପାଟ/ସ୍ମାରକ ମାଜୀ)- ମୟୂରଭଞ୍ଜ ଜିଲା ଶୁଳିଆପଦା ଥାନା ଅଞ୍ଚଳରେ ଏକ ଅଭାବନୀୟ ଘଟଣା ସାମ୍ନାକୁ ଆସିଛି। ଜଣେ ଜ୍ୱାଇଁ ନିଜ ଶାଶୁ ଓ ଶ୍ୱଶୁରଙ୍କୁ ପେଟ୍ରୋଲ ଢାଳି ଜୀବନ୍ତ ଜାଳିଦେବାକୁ ଉଦ୍ୟମ କରିଛି। ଏହି ସଂଘାତିକ ଆକ୍ରମଣରେ ଶାଶୁ ଓ ଶ୍ୱଶୁର ଗୁରୁତର ଭାବେ ଆହତ ହୋଇ ମେଡିକାଲରେ ଜୀବନ ସହ ସଂଗ୍ରାମ କରୁଛନ୍ତି। ଏହି ଘଟଣା ସ୍ଥାନୀୟ ଅଞ୍ଚଳରେ ତୀବ୍ର ଆଲୋଡନ ସୃଷ୍ଟି କରିଛି।
ସୂଚନା ଅନୁଯାୟୀ, ଶୁଳିଆପଦା ଥାନା ଅଧୀନ ନାଉପଦା ଗ୍ରାମର ସେକ ହାରୁନ ଅଲ୍ଲୀ ଏବଂ ସୁହାନା ବିବିଙ୍କ ଝିଅ ସାବାନା ଖାତୁନ, ବାରିପଦା ଭଞ୍ଜପୁର ଥାନା ଅଧୀନ ରଘୁନାଥପୁର (ୱାର୍ଡ ନମ୍ବର ୨୨)ର ସେକ ସଗିରଙ୍କୁ ୫ ବର୍ଷ ତଳେ ପ୍ରେମ ବିବାହ କରିଥିଲେ। ତେବେ ବିବାହର କିଛି ଦିନ ପରେ ସଗିରଙ୍କ ଅସଲ ରୂପ ପଦାକୁ ଆସିଥିଲା। ସେ ପ୍ରତିଦିନ ମଦ୍ୟପାନ କରି ସାବାନାଙ୍କୁ ଅଯଥାରେ ଗାଳିଗୁଲଜ କରିବା ସହ ପ୍ରବଳ ମାରପିଟ କରୁଥିଲେ। ସ୍ୱାମୀର ନିର୍ଦ୍ଦୟ ମାଡ଼ ଯୋଗୁ ସାବାନାଙ୍କ ଡାହାଣ ଗୋଡ଼ ମଧ୍ୟ ଭାଙ୍ଗି ଯାଇଥିଲା।
ସ୍ୱାମୀର ଅତ୍ୟାଚାର ଅସହ୍ୟ ହେବାରୁ ଗତ ୫ ମାସ ହେବ ସାବାନା ନିଜର ପୁଅ ଓ ଝିଅକୁ ଧରି ନାଉପଦାସ୍ଥିତ ବାପଘରକୁ ପଳାଇ ଆସି ରହୁଥିଲେ। ମାତ୍ର ସେଠାରେ ମଧ୍ୟ ତାଙ୍କୁ ସୁରକ୍ଷା ମିଳି ନ ଥିଲା। ଗତ ମେ ୩୧ ତାରିଖ ରାତି ପ୍ରାୟ ୧ଟା ୩୦ ମିନିଟ୍ରେ ସଗିର ମଦ ନିଶାରେ ଚୁର୍ ହୋଇ ସାବାନାଙ୍କ ବାପଘରେ ପହଞ୍ଚିଥିଲେ। ସେଠାରେ ସେ ପେଟ୍ରୋଲ ଢାଳି ଲୁଗାପଟା ଜାଳିଦେବା ସହ ସାବାନା ଓ ତାଙ୍କ ପରିବାର ଲୋକଙ୍କୁ ଜୀବନରୁ ମାରିଦେବାକୁ ଚେଷ୍ଟା କରି ଫେରାର ହୋଇଯାଇଥିଲେ। ଏନେଇ ଥାନାରେ ଅଭିଯୋଗ ହେବା ପରେ ପୁଲିସ ମାମଲା (ନଂ-୭୨/୨୬) ରୁଜୁ କରିଥିଲେ ସୁଦ୍ଧା ଅଭିଯୁକ୍ତ ସଗିର ଫେରାର ଥିଲେ।
ପୁଲିସ ଆଖିରେ ଧୂଳି ଦେଇ ଫେରାର ଥିବା ସଗିର ଗତକାଲି ରାତି ପ୍ରାୟ ୨ଟା ୩୦ ମିନିଟ୍ରେ ପୁଣିଥରେ ନାଉପଦା ଗ୍ରାମରେ ପହଞ୍ଚିଥିଲା। ସମସ୍ତେ ଶୋଇଥିବା ବେଳେ ସେ ସେକ ହାରୁନ (ଶ୍ୱଶୁର) ଏବଂ ସୁହାନା ବିବି (ଶାଶୁ)ଙ୍କ ଉପରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ। ନିଆଁରେ ପୋଡ଼ି ହୋଇ ସେକ ହାରୁନ ଓ ସୁହାନା ବିବି ଗୁରୁତର ଆହତ ହୋଇଛନ୍ତି। ତାଙ୍କୁ ତୁରନ୍ତ ଉଦ୍ଧାର କରାଯାଇ ବାରିପଦାସ୍ଥିତ ପିଆରଏମ (PRM) ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରାଯାଇଛି, ସେଠାରେ ସେମାନଙ୍କ ଚିକିତ୍ସା ଚାଲିଛି।
ଏହି ସଂଘାତିକ କାଣ୍ଡ ସମ୍ପର୍କରେ ଶୁଳିଆପଦା ଥାନା ଅଧିକାରୀ ସତ୍ୟ ନାରାୟଣ ବଳ ସୂଚନା ଦେଇଛନ୍ତି ଯେ, ପୂର୍ବ ଅଭିଯୋଗ ଆଧାରରେ ମାମଲା ରୁଜୁ ହୋଇଛି ଏବଂ ଅଭିଯୁକ୍ତକୁ ଧରିବା ପାଇଁ ଚଢ଼ାଉ ଜାରି ରହିଛି। ତେବେ ଗତକାଲି ରାତିରେ ଘଟିଥିବା ଦ୍ୱିତୀୟ ପେଟ୍ରୋଲ ଆକ୍ରମଣ ସମ୍ପର୍କରେ ବର୍ତ୍ତମାନ ସୁଦ୍ଧା ପରିବାର ପକ୍ଷରୁ ଥାନାରେ କୌଣସି ଲିଖିତ ଅଭିଯୋଗ ହୋଇ ନ ଥିବା ସେ ପ୍ରକାଶ କରିଛନ୍ତି। ପରିବାର ଲୋକେ ବର୍ତ୍ତମାନ ଆହତଙ୍କ ଚିକିତ୍ସାରେ ବ୍ୟସ୍ତ ଥିବା ଜଣାପଡ଼ିଛି।
