ବାହାନଗା, ୧୨ା୭(ଡି.ଏନ.ଏ.)- ବାଲେଶ୍ୱର ଜିଲା ବାହାନଗା ବ୍ଳକ ରୂପଖଣ୍ଡ ଗ୍ରାମରେ ପକ୍ଷାଘାତ େଋାଗୀ ଶୁକମଣି ମହାଳିକଙ୍କ ପରିବାର ଅସହାୟ ସ୍ଥିତିିରେ ଦିନ ବିତାଉଛନ୍ତି। ଶୁକମଣିଙ୍କ ସ୍ବାମୀ ତ୍ରିଲୋଚନ ବାର୍ଦ୍ଧକ୍ୟଜନିତ ଅସୁସ୍ଥତା ଯୋଗୁ ଆଉ କାମଧନ୍ଦା କରିପାରୁ ନାହାନ୍ତି। ଏହି ବୃଦ୍ଧ ଦମ୍ପତିଙ୍କ ଏକମାତ୍ର ପୁତ୍ର ସୁଦର୍ଶନ ମା’ ବାପାଙ୍କ ମୁହଁରେ ଦାନା ଦେବାକୁ କାମଧନ୍ଦା କରି ସଂଘର୍ଷ ଜାରି ରଖିଛନ୍ତି। ଅର୍ଥାଭାବ କାରଣରୁ ରୋଗଣା ମା’ଙ୍କୁ ଡାକ୍ତରଖାନା ନେଇ ଚିକିତ୍ସା କରି ପାରୁ ନ ଥିବାରୁ ସେ ହତାଶ ହୋଇପଡିଛନ୍ତି। ସରକାରଙ୍କଠାରୁ କିଛି ସହାୟତା ପାଇବା ଆଶା ନେଇ ସୁଦର୍ଶନ ନିଜ ରୋଗଣା ମା’ଙ୍କୁ ଧରି ଜିଲାପାଳଙ୍କ ଜନଶୁଣାଣି ଶିବିରକୁ ଆସି ଗୁହାରି ଜଣାଇ ଫେରିଛନ୍ତି। ଏହି ଦୁଃଖୀ, ଅଭାବୀ ପରିବାର ଏବେ ସରକାରୀ ସହାୟତା ଅପେକ୍ଷାରେ ଦିନ ବିତାଉଥିବା କହିଛନ୍ତି।
ମାତ୍ର ୧୦ଗୁଣ୍ଠ ଚାଷ ଜମିକୁ ଛାଡିଦେଲେ ଏହି ପରିବାରର ଅନ୍ୟ କିଛି ସମ୍ବଳ ନାହିଁ ା ସେହି ଜମିକୁ ଚାଷ କରି ଦୁଃଖକଷ୍ଟେ ଚଳନ୍ତି। ୮ବର୍ଷ ତଳେ ଶୁକମଣି ରୋଗାକ୍ରାନ୍ତ ହେବାରୁ ପରିବାର ଲୋକେ ତାଙ୍କୁ ବିଭିନ୍ନ ସରକାରୀ ଚିକିତ୍ସାଳୟକୁ ନେଇ ଡାକ୍ତରଙ୍କୁ ଦେଖାଇଥିଲେ। ରୋଗ ଭଲ ହେବା ବଦଳରେ ଦିନକୁ ଦିନ ସେ ଅଧିକ ଅସୁସ୍ଥ ହୋଇ ଶେଷରେ ପକ୍ଷାଘାତ ରୋଗରେ ଆକ୍ରାନ୍ତ ହୋଇଛନ୍ତି। ତାଙ୍କୁ କଟକ ନେଇ ଚିକିତ୍ସା କରାଇବାକୁ ଡାକ୍ତରମାନେ ପରାମର୍ଶ ଦେଉଥିବା ବେଳେ ପରିବାର ଲୋକେ ଅର୍ଥାଭାବରୁ କଟକ ନେବାକୁ ସମର୍ଥ ହୋଇପାରିନାହାନ୍ତି। ସରକାର ଗରିବ ଲୋକଙ୍କ ଲାଗି ବିଭିନ୍ନ କଲ୍ୟାଣକାରୀ ଯୋଜନା କାର୍ଯ୍ୟକାରୀ କରୁଥିବା ବେଳେ ଏହି ପରିବାର ସେଥିରୁ ବଞ୍ଚିତ ହୋଇଛନ୍ତି। ବର୍ତ୍ତମାନ ବର୍ଷାଦିନେ ସେମାନେ ରହୁଥିବା ସାହିରୁ ମୁଖ୍ୟ ରାସ୍ତାକୁ ବାହାରିବା କଷ୍ଟକର ହୋଇପଡିଛି। ପୂର୍ବରୁ ସାହି ଲୋକେ ଯେଉଁ ସରକାରୀ ଜମି ଦେଇ ଯିବାଆସିବା କରୁଥିଲେ, ତାହା ଜବରଦଖଲ ହୋଇଯାଇଛି। ଏଣୁ ସାହି ଲୋକେ ବିଲହୁଡା ଦେଇ ଯାତାୟାତ କରୁଛନ୍ତି। ଏଭଳି ସ୍ଥିତିରେ ଶୁକମଣିଙ୍କୁ ଚିକିତ୍ସା ଲାଗି କିଭଳି ବାହାରକୁ ନେବେ ଏହି ଚିନ୍ତା ପରିବାରକୁ ଘାରିିିଛି। କୌଣସି ସହୃଦୟ ବ୍ୟକ୍ତି ସହାୟତାର ହାତ ବଢାଇଲେ ସେ ତାଙ୍କ ମା’ ଶୁକମଣିଙ୍କୁ ଚିକିତ୍ସା କରାଇପାରନ୍ତେ ବୋଲି ସୁଦର୍ଶନ କହିଛନ୍ତି।
