ରଣପୁର,୧୩।୧୦(ସ୍ବ.ପ୍ର.)-ଜନ୍ମ ଠାରୁ ମୃତ୍ୟୁ ପର୍ଯ୍ୟନ୍ତ ସରକାର ବିଭିନ୍ନ ଯୋଜନା କରିଛନ୍ତି । ତେବେ ଯୋଗ୍ୟ ହିତାଧିକାରୀଙ୍କ ପାଇଁ ସରକାରୀ ଯୋଜନା ନୟାଗଡ ଜିଲା ରଣପୁର ବ୍ଲକରେ ସାତ ସପନ ହୋଇଛି । ଯାହାର ଉଦାହରଣ ରଣପୁର ବ୍ଲକ ଯଶୋଦାପୁର ପଞ୍ଚାୟତର ଧମଡା ଗଁାରେ ଦେଖିବାକୁ ମିଳିଛି। ଉକ୍ତ ଗଁାର ୭୦ ବର୍ଷ ବୟସ୍କା ବୃଦ୍ଧା ବୁଧେଇ ଦେଈ ଆବାସ ଯୋଜନାରେ ଘରଟିଏ ଓ ବିଧବା ଭତ୍ତା ପାଇବା ପାଇଁ ବାରମ୍ବାର ସରପଞ୍ଚ, ବିଡିଓ, ଜିଲାପାଳଙ୍କୁ ଭେଟୁଥିଲେ ମଧ୍ୟ ଏ ଯାଏଁ ସୁଫଳ ମିଳିନି। ଏଭଳିସ୍ଥଳେ ସରକାରୀ ଯୋଜନା କାହା ପାଇଁ ଉଦ୍ଦିଷ୍ଟ ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି।
ଥାଉକି, ଧମଡା ଗଁାର ବୁଧେଇ ଦେଈଙ୍କ ସ୍ବାମୀ ଅନନ୍ତ ସାହୁଙ୍କ ୧୦ ବର୍ଷ ତଳେ ମୃତ୍ୟୁ ହୋଇଛି । ସନ୍ତାନସନ୍ତତି ନ ଥିବାରୁ ସ୍ବାମୀଙ୍କ ମୃତ୍ୟୁ ପରେ ବୁଧେଇ ନିଃସହାୟ ହୋଇପଡିଛନ୍ତି। ସ୍ବାମୀ ବଞ୍ଚତ୍ଥିବାବେଳେ ବୁଧେଇ ବାର୍ଦ୍ଧକ୍ୟ ଭତ୍ତା ପାଇଁ ଓ ଇନ୍ଦିରାଆବାସରେ ଘରଟିଏ ପାଇବାକୁ ଆବେଦନ କରିଥିଲେ। ଏଥିପାଇଁ କେତେ ସରକାରୀ ବାବୁ ଓ ରାଜନେତାଙ୍କୁ ଅନୁରୋଧ କରିଥିଲେ ବି ଶୁଭଦୃଷ୍ଟି ପଡି ନ ଥିଲା । ସ୍ବାମୀଙ୍କ ମୃତ୍ୟୁ ପରେ ବି ବୁଧେଇଙ୍କ ପ୍ରତି କାହାର ଦୟା ହେଲା ନାହିଁ। ସ୍ବାମୀ ଅନନ୍ତଙ୍କ ମୃତ୍ୟୁ ଘଟିବାର ୧୦ ବର୍ଷ ପରେବି ବିଧବା ଭତ୍ତା ହୋଇ ପାରିଲା ନାହିଁ । ଭଙ୍ଗା ଘରେ ରହୁଥିଲେ ବି ପ୍ରଧାନମନ୍ତ୍ରୀ ଆବାସ କିମ୍ବା ବିଜୁ ପକ୍କାଘର ଟିଏ ମଧ୍ୟ ତାଙ୍କୁ ମିଳିଲା ନାହିଁ । କେବଳ ରାଶନ କାର୍ଡ ଅଛି । ରାଶନ କାର୍ଡକୁ ଛାଡିଦେଲେ ଅନ୍ୟ ସରକାରୀ ଯୋଜନା ବୁଧେଇଙ୍କ ପାଇଁ ସତେ ଯେପରି ମନା ହୋଇଛି। ଏ ସମ୍ପର୍କରେ ବୁଧେଇ କୁହନ୍ତି ସରକାରୀ ଯୋଜନାରେ ଘର କି ଭତ୍ତା ପାଇବା ପାଇଁ ଲାଞ୍ଚ ଦେବାକୁ ମୋ ପାଖରେ ଟଙ୍କା ନାହିଁ । ଶୁଣିଛି ବିନା ଟଙ୍କାରେ କୌଣସି କାର୍ଯ୍ୟ ହେଉ ନାହିଁ । ସ୍ବାମୀଙ୍କ ପରି ମୁଁ ମଧ୍ୟ ଦୁଃଖ କଷ୍ଟରେ ମରିଯିବି ବୋଲି କୋହଭରା କଣ୍ଠରେ କହିଥିଲେ ବୁଧେଇ। ଏନେଇ ରଣପୁର ବିଡିଓ ରଶ୍ମିରେଖା ଦାସ କୁହନ୍ତି, ଧମଡା ଗଁାର ବୁଧେଇ ଦେଈ ଭତ୍ତା କି ଆବାସ ଯୋଜନାରେ ଘର ପାଇ ନ ଥିବା ମୁଁ ଅବଗତ ନ ଥିଲି । ଆବଦେନ କରିଥିଲେ ବିଚାରକୁ ନେଇ ତୁରନ୍ତ ପଦକ୍ଷେପ ନେବି ।
