ମାର୍ଶାଘାଇ, ୧୧।୧୨ (ଡି.ଏନ୍.ଏ.):ଶିଶୁ ଓ ମହିଳାଙ୍କ ବିକାଶ ପାଇଁ ସମନ୍ବିତ ଶିଶୁ ବିକାଶ ଯୋଜନା କାର୍ଯ୍ୟକାରୀ ହେଉଛି। ଯୋଜନାକୁ କାର୍ଯ୍ୟକାରୀ କରିବା ପାଇଁ ପ୍ରତି ଗାଁରେ ଅଙ୍ଗନଓ୍ବାଡି କେନ୍ଦ୍ରମାନ ଖୋଲା ଯାଇଥିବା ବେଳେ ଜଣେ ଜଣେ ଅଙ୍ଗନଓ୍ବାଡି କର୍ମୀ ଓ ସହାୟିକାଙ୍କୁ ନିଯୁକ୍ତି ଦିଆଯାଇଛି। ଏଥିସହିତ ବ୍ଲକସ୍ତରରେ ଜଣେ ଲେଖାଏଁ ସିଡିପିଓ (ଶିଶୁ ବିକାଶ ପ୍ରକଳ୍ପ ଅଧିକାରୀ)ଙ୍କୁ ନିଯୁକ୍ତ କରାଯାଇଛି। ତେବେ ମାର୍ଶାଘାଇ ବ୍ଲକ ଅଞ୍ଚଳରେ ଏହି ଯୋଜନାରେ ଅନିୟମିତତା ହେଉଥିବା ପରିଲକ୍ଷିତ ହେଉଛି। କେତେକ ସ୍ଥାନରେ ଅଙ୍ଗନଓ୍ବାଡି ଗୃହ ନ ଥିବାରୁ ପିଲାମାନେ ସ୍ଥାନୀୟ ସ୍କୁଲ ବାରଣ୍ଡାରେ ବସି ପାଠ ପଢ଼ୁଥିବା ବେଳେ କେତେକ କେନ୍ଦ୍ରର କର୍ମୀମାନେ ପିଲାଙ୍କ ପାଇଁ ଆସୁଥିବା ପୁଷ୍ଟିକର ଖାଦ୍ୟ ହଡ଼ପ କରୁଥିବା ଭଳି ଅଭିଯୋଗ ମଧ୍ୟ ହେଉଛି।
ବ୍ଲକ ଅଧୀନରେ ଥିବା ୨୪ ପଞ୍ଚାୟତରେ ମୋଟ ୧୮୩ ଅଙ୍ଗନଓ୍ବାଡି କେନ୍ଦ୍ର ଖୋଲାଯାଇଛି। ସେଥିରୁ ୧୬୪ ଅଙ୍ଗନଓ୍ବାଡି ପାଇଁ ଗୃହ ନିର୍ମାଣ ନିମନ୍ତେ ସରକାର ଅର୍ଥ ମଞ୍ଜୁର କରିଛନ୍ତି। ସେଥିମଧ୍ୟରୁ ୯୨ଟି ଗୃହ ପୂର୍ଣ୍ଣାଙ୍ଗ ହୋଇ କାର୍ଯ୍ୟକ୍ଷମ ହେଉଥିବା ବେଳେ ୪୬ଟି କେନ୍ଦ୍ରର ନିର୍ମାଣ କାର୍ଯ୍ୟ ଚାଲିଛି। ଅବଶିଷ୍ଟ ୨୬ଟି କେନ୍ଦ୍ର ପାଇଁ ଗୃହ ନିର୍ମାଣ ନିମନ୍ତେ ସ୍ଥାନ ନିରୂପଣ ପାଇଁ ତହସିଲଦାରଙ୍କୁ ଆବେଦନ କରାଯାଇଥିଲେ ବି ଏ ଯାଏଁ ଜାଗା ସ୍ଥିର କରାଯାଇପାରିନାହିଁ। ଅନ୍ୟପଟେ କୁନି କୁନି ପିଲା, ଗର୍ଭବତୀ ଓ ପ୍ରସୂତିଙ୍କ ପାଇଁ ସରକାର ଯୋଗାଉ ଥିବା ପୁଷ୍ଟିକର ଖାଦ୍ୟକୁ କର୍ମୀମାନେ ଅଙ୍ଗନଓ୍ବାଡି ଗୃହରେ ନ ରଖି ନିଜ ଘରେ ରଖୁଥିବା ଅଭିଯୋଗ ହୋଇଛି। ଏଥିସହ ଉପସ୍ଥାନ ଖାତାରେ ଅଧିକ ପିଲାଙ୍କ ଉପସ୍ଥାନ ଦର୍ଶାଇ କର୍ମୀମାନେ ପିଲାଙ୍କ ଖାଦ୍ୟ ହଡ଼ପ କରୁଛନ୍ତି। ଅନ୍ୟପଟେ ବ୍ଲକର ୧୮୩ଟି କେନ୍ଦ୍ର ପରିଚାଳନା ଦାୟିତ୍ୱ ସିଡିପିଓଙ୍କ ହାତରେ ରହିଥିବା ବେଳେ ଗତ ୨ ବର୍ଷ ହେଲା ଏହି ପଦବୀ ଖାଲି ପଡ଼ିଥିଲା। ଫଳରେ ବ୍ଲକ ଅଞ୍ଚଳରେ ଏହି କ୍ଷେତ୍ରରେ ନାନା ଅନିୟମିତତା ହେଉଥିଲା ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି। ତେବେ ଗତ ୧୫ ଦିନ ହେବ ଏଠାରେ ସିଡିପିଓଙ୍କୁ ନିଯୁକ୍ତ କରାଯାଇଛି। ଏଥିସହ ସିଡିପିଓ ଅଫିସରେ ୬ ସୁପରଭାଇଜର ପଦବୀ ରହିଥିବା ବେଳେ ୨ ପଦବୀ ଖାଲିପଡିଛି। ଏଥିସହ ପିଅନ ପଦବୀ ମଧ୍ୟ ଖାଲି ପଡିଛି। ସେହିପରି ସରକାରୀ ଗାଡ଼ି ନ ଥିବାରୁ ସିଡିପିଓ ବିଭିନ୍ନ କେନ୍ଦ୍ରକୁ ପରିଦର୍ଶନରେ ଯିବାରେ ଅସୁବିଧା ହେଉଛି। ୨୦୧୪ରୁ ସରକାରୀ ଗାଡି ଅଚଳ ହୋଇ ପଡିଥିବାରୁ ଆବଶ୍ୟକ ସ୍ଥଳେ ସିଡିପିଓ ଘରୋଇ ଗାଡି ଆଣି ବିଭିନ୍ନ କେନ୍ଦ୍ର ପରିଦର୍ଶନରେ ଯାଉଛନ୍ତି। ତେବେ ଶିଶୁବିକାଶ ଯୋଜନାର ସୁପରିଚାଳନା ପାଇଁ ଆବଶ୍ୟକ ଅଙଗନଓ୍ବାଡି ଗୃହ ନିର୍ମାଣ, ସୁପରଭାଇଜର ନିଯୁକ୍ତି ଓ ଗାଡ଼ି ଯୋଗାଇଦେବା ଆଦି ଦିଗରେ ଜିଲାପାଳ ଦୃଷ୍ଟି ଦେବାକୁ ବଛରାଇ ସରପଞ୍ଚ ଗୌରୀରାଣୀ ପ୍ରଧାନ, ଜମପଡ଼ା ସରପଞ୍ଚ ମୋନାଲିସା ପ୍ରଧାନ, ବେରୁହାଁ ସରପଞ୍ଚ ଲାବଣ୍ୟବତୀ ପ୍ରଧାନ, ମଙ୍ଗରାଜପୁର ସରପଞ୍ଚ ପ୍ରଦୀପ ନାୟକ, ଶିଳିପୁର ସରପଞ୍ଚ ଯୁଗଳ କିଶୋର ଦାସ, ଅଙ୍ଗୁଳାଇ ସରପଞ୍ଚ ଦୁର୍ଗାବତୀ ପ୍ରଧାନ ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ ସିଡିପିଓ ଜୋତ୍ସ୍ନା ତ୍ରିପାଠୀଙ୍କୁ ପଚାରିବାରେ ଦୁଇ ସୁପରଭାଇଜର ପଦବୀ ଖାଲି ପଡ଼ିଥିବା ବେଳେ ଗାଡ଼ି ନ ଥିବାରୁ ଅଙ୍ଗନଓ୍ବାଡି କେନ୍ଦ୍ର ପରିଦର୍ଶନ ପାଇଁ ଅସୁବିଧା ହେଉଛି। ବେଳେବେଳେ ଘରୋଇ ଗାଡ଼ି ନେଇ ପରିଦର୍ଶନରେ ଯାଉଛୁ ବୋଲି କହଛନ୍ତି।
