ଢେଙ୍କାନାଳ ଅଫିସ, ୮।୬- ପବିତ୍ର ଶୀତଳ ଷଷ୍ଠୀ ଯାତ୍ରା ପାଇଁ ଉତ୍ସବମୁଖର ହୋଇଉଠିଛି ଢେଙ୍କାନାଳର ଜିଲାର ପ୍ରମୁଖ ଶୈବପୀଠ। ବାଜାବାଣ, ରୋଶଣି ସାଙ୍ଗକୁ ଶିବସ୍ତୋତ୍ରରେ ପରିବେଶ ମୁଖରିତ ହୋଇଉଠିଥିବାବେଳେ ଦବଦମ୍ପତିଙ୍କ ବିବାହରେ ସାମିଲ ହୋଇଥିଲେ ହଜାର ହଜାର ଶ୍ରଦ୍ଧାଳୁ।
କପିଳାସ କ୍ଷେତ୍ରାଧିପତି ଶ୍ରୀ ଚନ୍ଦ୍ରଶେଖରଜୀଉଙ୍କ ବିବାହ ଉତ୍ସବ ପାରମ୍ପରିକ ନୀତି ଅନୁଯାୟୀ ଶୁକ୍ରବାର ସମ୍ପନ୍ନ ହୋଇଛି। ମହାପ୍ରଭୁଙ୍କ ଚଳନ୍ତି ପ୍ରତିମା କପିଳାସ ପାଦଦେଶରେ ଥିବା ଶିବସାଗରରୁ ବାହାରି ମା’ ପାର୍ବତୀଙ୍କ ମନ୍ଦିରରେ ପହଞ୍ଚତ୍ଥିଲା। ଘଣ୍ଟଘଣ୍ଟା, ସଂକୀର୍ତ୍ତନ, ଶଙ୍ଖଧ୍ୱନି ସାଙ୍ଗକୁ ହରହର ମହାଦେବ ଧ୍ୱନିରେ ଦେଓଗଁା ପରିବେଶ କମ୍ପିଉଠିଥିଲା। ସୁସଜ୍ଜିତ ବିମାନ ସାଙ୍ଗକୁ ଆଲୋକମାଳା ଶୋଭାଯାତ୍ରାର ପ୍ରମୁଖ ଆକର୍ଷଣ ପାଲଟିଥିଲା। ଯଥାବିଧି ପୂଜାର୍ଚ୍ଚନା ପରେ ଦେବଦମ୍ପତିଙ୍କ ବିବାହ ଶେଷହୋଇଛି। ଆୟୋଜିତ କାର୍ଯ୍ୟକ୍ରମରେ ଆଖପାଖ ଅଞ୍ଚଳର ହଜାର ହଜାର ଶ୍ରଦ୍ଧାଳୁ ସାମିଲ ହୋଇଥିଲେ। ସମସ୍ତଙ୍କ ପାଇଁ ପ୍ରସାଦସେବନ ବ୍ୟବସ୍ଥା କରାଯାଇଥିଲା।
ସେହିପରି ମୁକ୍ତଦେଈପୁର ଶାସନର ଆରାଧ୍ୟ ଦେବତା ଶ୍ରୀ ସୋମନାଥଶ୍ୱରଙ୍କ ବିବାହ ମହାସମାରୋହରେ ଅନୁଷ୍ଠିତ ହୋଇଛି। ଏହି ପରିପ୍ରେକ୍ଷୀରେ ସୂର୍ଯ୍ୟପୂଜା, ରୁଦ୍ରାଭିଷେକ ଯଥାବିଧି କରାଯାଇଥିଲା। ସନ୍ଧ୍ୟାରେ ଆୟୋଜିତ ବିବାହ ଉତ୍ସବରେ ମା’ ପାର୍ବତୀ, ମହାପ୍ରଭୁ ସୋମନାଥଶ୍ୱର, ଶ୍ରୀକୃଷ୍ଣଙ୍କ ଚଳନ୍ତି ବିଗ୍ରହକୁ ବିମାନ, ବୃଷଭ ଉପରେ ବିରାଜମାନ କରାଯାଇ ମଣ୍ଡପକୁ ଅଣାଯାଇଥିଲା। ମୁକ୍ତଦେଈପୁର ଶାସନ ମହାଜନ ମହସଭା ସଭାପତି ଶଶିମୌଳି ରଥଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ସମସ୍ତ କାର୍ଯ୍ୟକ୍ରମ ପରିଚାଳିତ ହୋଇଥିଲା। ଜଗନ୍ନାଥ ତ୍ରିପାଠୀ ବିବାହ କାର୍ଯ୍ୟ ସମ୍ପାଦନ କରିଥିବାବେଳେ ରାମେଶ୍ୱର ମିଶ୍ର, ମୁରଲି ପାଣି, ଶିବସାଇ ମହାପାତ୍ର ଏଥିରେ ସହଯୋଗ କରିଥିଲେ। ଆୟୋଜିତ ପ୍ରସାଦ ସେବନ କାର୍ଯ୍ୟକ୍ରମରେ ବହୁ ସଂଖ୍ୟାରେ ଶ୍ରଦ୍ଧାଳୁ ସାମିଲ ହୋଇଥିଲେ।
