ପୁରୀ ଅଫିସ,୨ା୧୦:ବଳିରେ ବଳି ନ କର କଳି… କାଲି ଆଣି ଦେବୀ ସରୁ ଚକୁଳି…ଏହି ଗୀତରେ ବୁଧବାର ଝଙ୍କୁରିତ ହୋଇଥିଲା ମାର୍କଣ୍ଡ ପୁଷ୍କରିଣୀ କୂଳ। ସେବାୟତ ପରିବାରର କୁମାରୀମାନେ ନେତ ବେଶରେ ସଜେଇ ହୋଇ ଏହି ଗୀତ ବୋଲି ହରପାର୍ବତୀଙ୍କୁ ଆରାଧନା କରିଥିଲେ। ସୁନ୍ଦର ଏବଂ ଯୋଗ୍ୟ ବର ପ୍ରାପ୍ତି ମନାସି ସେମାନେ ଏହି ପୂଜା କରିଥିଲେ।
ଭାଦ୍ରବ ମାସ ପୂର୍ଣ୍ଣମୀଠାରୁ ନେତା ପୂଜା ଆରମ୍ଭ ହୋଇଥାଏ। ୨୧ଦିନ ଦିନ ବ୍ୟାପୀ ସେବାୟତ ପରିବାରର କୁମାରୀମାନେ ସନ୍ଧ୍ୟାରେ ଘରେ ବଳିରେ ବଳି ନ କର କଳି…ଗୀତ ବୋଲି ଶିବ ପାର୍ବତୀଙ୍କୁ ପୂଜା କରିଥାନ୍ତି। ଏହାପରେ ଆଶ୍ୱିନ ଶୁକ୍ଲ ପକ୍ଷ ପଞ୍ଚମୀ ତିଥିଠାରୁ ୪ଦିନ ବ୍ୟାପି ନେତ ବେଶ ହୋଇ ମାର୍କଣ୍ଡ ପୁଷ୍କରିଣୀ କୂଳରେ ପୂଜାର୍ଚ୍ଚନା କରିଥାନ୍ତି। ଏଥିସହ ମାର୍କଣ୍ଡେଶ୍ୱରଙ୍କୁ ଦର୍ଶନ କରି ନିଷ୍ଠାର ସହିତ ବ୍ରତ ପାଳିଥାନ୍ତି। ଏହାକୁ ନେତ ପୂଜା ତଥା ନେତ ପରମ୍ପରା କୁହାଯାଏ। ଏହି ପରମ୍ପରା ଶ୍ରୀକ୍ଷେତ୍ରର ସେବାୟତ ପରିବାରରେ ପାଳିତ ହେଉଥିବା ବେଳେ ଅନ୍ୟତ୍ର ଦେଖିବାକୁ ମିଳେ ନାହିଁ। ବୁଧବାର ପୂର୍ବାହ୍ନରେ ମାର୍କଣ୍ଡ ପୁଷ୍କରିଣୀ କୂଳରେ ସେବାୟତ ଘରର କୁମାରୀଙ୍କ ନେତ ପୂଜା ବେଶ୍ ଆକର୍ଷଣୀୟ ସାଜିଥିଲା। କୁନି କୁନି ଝିଅମାନେ ସୁନା, ରୁପା ଅଳଙ୍କାରରେ ସଜେଇ ହୋଇ ନେତ ବେଶରେ ମାର୍କଣ୍ଡ ପୁଷ୍କରିଣୀକୁ ଆସିଥିଲେ। ପାଦରେ ପାଉଞ୍ଜି, ହାତରେ ପହୁଡ, ମଲ, ଅଣ୍ଟାରେ ବେଙ୍ଗପାଟିଆ, ହାତରେ ବାଜୁବନ୍ଧ, ଖଡୁ, ବେକରେ ହାର ଏବଂ ମଥାରେ ସିନ୍ଥି ଆଦି ଅଳଙ୍କାର ଶୋଭା ପାଉଥିଲା। ସେମାନେ କଛା ମାରି ପାଟ ଲୁଗା ପରିଧାନ କରିଥିଲେ। ପୁଷ୍କରିଣୀ କୂଳରେ ନଡିଆ, ମକା, ଜହ୍ନି, ଲାଉ, କାକୁଡି, ହଳଦୀ ଓ ଗୁଆ ରଖି ଠାକୁରଙ୍କୁ ସ୍ଥାପନା କରିଥିଲେ। ପୂଜାର୍ଚ୍ଚନା କରି ପୁଷ୍ପାଞ୍ଜଳି ପ୍ରଦାନ ପରେ ମାର୍କଣ୍ଡେଶ୍ୱରଙ୍କୁ ଦର୍ଶନ କରି ଘରକୁ ପ୍ରତ୍ୟାବର୍ତ୍ତନ କରିଥିଲେ।
