ଖଇରା, ୨୪ା୨ଭୁବନେଶ୍ୱର,(ବ୍ୟୁରୋ): ଜାତୀୟ ଗ୍ରୀନ୍ ଟ୍ରିବ୍ୟୁନାଲଙ୍କ ରୋକ୍ ପରେ ପ୍ରଶାସନ ପକ୍ଷରୁ ୧୪୪ ଧାରା ଜାରି ହୋଇଥିଲା। ଏହାସତ୍ତ୍ୱେ ବାଲେଶ୍ୱର ଜିଲା ଖଇରା ତହସିଲ୍ ଅଧୀନ ଶାରୀଶୁଆ ପାହାଡ଼ରେ ଥିବା ଏକାଧିକ ପଥର ଖଣିରେ ଚାଲିଥିଲା ବେଆଇନ ଖନନ। ପ୍ରଶାସନିକ ଅଧିକାରୀମାନେ ଚେଇଁ ଶୋଇଥିବାବେଳେ ନେତାଙ୍କ ଛତ୍ରଛାୟା ତଳେ ରହି ପାହାଡ଼ରେ ବିସ୍ଫୋରଣ କରି ଦିନରାତି ତାଡ଼ି ଚାଲିଥିଲେ ମାଫିଆ। ଏନେଇ ଖବର ପାଇବା ପରେ ରବିବାର କ୍ରାଇମବ୍ରାଞ୍ଚର ସ୍ପେଶାଲ ଟାସ୍କଫୋର୍ସ (ଏସ୍ଟିଏଫ୍) ଉକ୍ତ ପାହାଡ଼ର ୭୭ ନମ୍ବର ଖଣିରେ ଚଢ଼ାଉ କରି ୫ଜଣଙ୍କୁ ଗିରଫ କରିବା ସହ ପଥର ଚାଲାଣରେ ବ୍ୟବହୃତ ୩ ଗାଡ଼ି ଜବତ କରିଛି। ଗିରଫ ଅଭିଯୁକ୍ତମାନେ ହେଲେ କଇଥଗଡ଼ିଆ ଗ୍ରାମର ଟ୍ରାକ୍ଟର ମାଲିକ ବାସୁଦେବ ରାଉତ, ବାବୁରାମ ଜେନା ଏବଂ ଡ୍ରାଇଭର ଜୟନ୍ତ ଜେନା, ଭାଗୀରଥି ସୋରେନ ଓ ଟୁନା ଜେନା। ଏନେଇ ଏସ୍ଟିଏଫ୍ କେସ୍ ନଂ.୪୧/୨୦ ଦଫା ୪୪୭, ୩୭୯, ୫୧୧, ୧୨୦(ବି)୩୪ ଲଗାଇ ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରିଛି। ତେବେ ଚଢ଼ାଉ ଦେଖି ଖଣି ମାଫିଆମାନେ ପାହାଡ଼ରେ ଲୁଚି ଯାଇଛନ୍ତି। ସେମାନଙ୍କୁ ଧରିବାକୁ ଏସ୍ଟିଏଫ୍ ଉଦ୍ୟମ ଚଳାଇଥିବା ଜଣାପଡ଼ିଛି।
ମିଳିଥିବା ସୂଚନା ଅନୁଯାୟୀ, ଶାରୀଶୁଆ ପାହାଡ଼ରେ ଖଣି ମାଫିଆମାନେ ବିସ୍ଫୋରଣ କରିବା ପରେ ଜେସିବି ଓ ଟ୍ରାକ୍ଟର ସହାୟତାରେ ପଥର ଖନନ କରି ଚାଲାଣ କରିଥାନ୍ତି। ବିସ୍ଫୋରଣ ଯୋଗୁ ଆଖପାଖରେ ଥିବା ଘର ଫାଟିଯିବାରୁ ଲୋକେ ଭୟଭୀତ ଅବସ୍ଥାରେ ରହୁଛନ୍ତି। ସେହିଭଳି ବନ୍ୟପ୍ରାଣୀ ମଧ୍ୟ ବାସହରା ହୋଇ ଗାଁକୁ ପଶି ଆସୁଛନ୍ତି। ଏନେଇ ତହସିଲ୍ଠାରୁ ଜିଲା ପ୍ରଶାସନ ଓ ମୁଖ୍ୟମନ୍ତ୍ରୀଙ୍କ ନିକଟରେ ଅଭିଯୋଗ ସତ୍ତ୍ୱେ କିଛି ସୁଫଳ ମିଳି ନ ଥିଲା। ଖଣି ନିଲାମ ନେଇଥିବା କହି ନାଲିଆଖି ଦେଖାଇ ଖଣି ମାଫିଆମାନେ ଖୋଳି ଚାଲିଥିଲେ। ଶେଷରେ ୯୭ ଖଣି ବେଆଇନ ଭାବେ ନିଲାମ ଦିଆଯାଇଥିବା ନେଇ ୨ ସ୍ବେଚ୍ଛାସେବୀ ସଂଗଠନ ଜାତୀୟ ଗ୍ରୀନ୍ ଟ୍ରିବ୍ୟୁନାଲର ଦ୍ୱାରସ୍ଥ ହୋଇଥିଲେ। ହାତୀ ଚଲାପଥ ବାଧାପ୍ରାପ୍ତ ହେବା ସହ ପରିବେଶ ନଷ୍ଟ ହେଉଥିବାରୁ ବେଆଇନ ଖଣିକୁ ବନ୍ଦ କରିବାକୁ ଦାବି କରିଥିଲେ। ଜାତୀୟ ଗ୍ରୀନ୍ ଟ୍ରିବ୍ୟୁନାଲ ଉକ୍ତ ଅନିୟମିତତାକୁ ହୃଦୟଙ୍ଗମ କରି ଖଣି ଖନନ ଉପରେ ରହିତାଦେଶ ଲଗାଇଥିଲେ। ଟ୍ରିବ୍ୟୁନାଲଙ୍କ ରାୟକୁ ସମ୍ମାନ ଦେବାକୁ ଯାଇ ପ୍ରଶାସନ ସମସ୍ତ ଖଣିରେ ୧୪୪ ଧାରା ଲଗାଇଥିଲେ ସତ, କିନ୍ତୁ ଏହା କେବଳ କାଗଜପତ୍ରରେ ସୀମିତ ଥିଲା। ପୂର୍ବଭଳି ଖଣି ମାଫିଆମାନେ ସରକାରୀ ଅଧିକାରୀ, ପୋଲିସ ଓ ନେତାଙ୍କୁ ହାତଗୁଞ୍ଜା ଦେଇ ଖୁଲମ୍ଖୁଲା ଦୈନିକ ଟନ୍ ଟନ୍ ପଥର ଖନନ କରି ଚାଲାଣ କରୁଥିଲେ। କିଛିମାସ ତଳେ ପୋଲିସ ବିଭାଗରେ ଅଦଳବଦଳ ଏହି ମାଫିଆଙ୍କୁ ବେଶ୍ ସୁହାଇଥିଲା। ବିଶେଷ ସୂତ୍ରରୁ ଖବରପାଇ କ୍ରାଇମବ୍ରାଞ୍ଚର ଅତିରିକ୍ତ ଏସ୍ପି ତେଜରାଜ ପଟେଲଙ୍କ ନେତୃତ୍ୱରେ ଏସ୍ଟିଏଫ୍ ଟିମ୍ ଶନିବାର ରାତିରେ ଉକ୍ତ ପାହାଡ଼ରେ ଲୁଚିରହି ଡେରା ପକାଇଥିଲେ। ସକାଳୁ ୭୭ ନମ୍ବର ଖଣିରେ ଟ୍ରାକ୍ଟର ଦ୍ୱାରା ପଥର ଚାଲାଣ ହେଉଥିବା ଦେଖି ଏସ୍ଟିଏଫ୍ ଟିମ୍ ସେଠାରେ ଚଢ଼ାଉ ଆରମ୍ଭ କରି ୫ଜଣଙ୍କୁ ଗିରଫ କରିଥିଲା। ତେବେ ଚଢ଼ାଉ ସମୟରେ ଖଣି ମାଫିଆମାନେ ଲୁଚି ଯାଇଥିବାବେଳେ ଅନ୍ୟ ଖଣିରେ ନିୟୋଜିତ ଥିବା ଗାଡ଼ି ସହ ଅନ୍ୟମାନେ ଖସି ପଳାଇଥିଲେ।
ଖଇରା ତହସିଲଦାର ପ୍ରଦୀପ କୁମାର ସାହୁ ଓ ଆଇଆଇସି ସୁବ୍ରତ କୁମାର ବେହେରା ମଧ୍ୟ ଚଢ଼ାଉରେ ସାମିଲ ହୋଇଥିଲେ। ପରେ ଏସ୍ଟିଏଫ୍ ଟିମ୍ ଖଇରା ଥାନାରେ ଦିନତମାମ ରହି ତଦନ୍ତ ଚଳାଇଥିଲା।
