ଭଞ୍ଜନଗର,୩୧।୩(ଡି.ଏନ.ଏ)- ଏପ୍ରିଲ୍ ୧୪ ପର୍ଯ୍ୟନ୍ତ ସରକାର ଲକ୍ ଡ଼ାଉନ କଟକଣା ଜାରି କରିଛନ୍ତି। ଏହାଦ୍ୱାରା ଲୋକେ କାମଧନ୍ଦା ହରାଇଛନ୍ତି। ଅନ୍ୟ ରାଜ୍ୟରୁ ଆସି ଭଞ୍ଜନଗର ବ୍ଲକରେ ରହିଯାଇଥିବା ଏକାଧିକ ଅଣଓଡ଼ିଆ ପରିବାରଙ୍କ ଅବସ୍ଥା ଦୟନୀୟ ହୋଇପଡ଼ିଛି। ସରକାରଙ୍କ ମୁଠାଏ ଖାଦ୍ୟକୁ ସେମାନେ ଚାତକ ଭଳି ଚାହିଁ ବସିଛନ୍ତି। ଏଥିସହ ଗ୍ରାମାଞ୍ଚଳର ଅନେକ ଲୋକ ମଧ୍ୟ ସରକାରୀ ଖାଦ୍ୟକୁ ଚାହିଁ ବସିଛନ୍ତି। ଅନ୍ୟପଟେ ଚାଷୀଙ୍କ ଫସଲ ମଧ୍ୟ ଜମିରେ ପଚି ନଷ୍ଟ ହୋଇଯାଉଛି। ଫସଲ ତୋଳିବାକୁ ଶ୍ରମିକ ମିଳୁନାହାନ୍ତି। ଅମଳ କଲେ ମଧ୍ୟ ବଜାରରେ ନେଇ ବିକ୍ରି କରିବା ମଧ୍ୟ ସମ୍ଭବପର ହେଉନାହିଁ। କଟକଣାରୁ ଚାଷୀଙ୍କୁ ବାଦ୍ ଦିଆଯାଇଛି। ତଥାପି କେତେକସ୍ଥାନରେ ପୋଲିସ କର୍ମଚାରୀ କିଛି ବୁଝିବା ଆଗରୁ ମାଡ ମାରୁଛନ୍ତି। ଯାହାକୁ ନେଇ ଚାଷୀ ଆଶଙ୍କାରେ। ଆଉ କେତକ ଚାଷୀ ପରିବା ତୋଳିବା ପରେ ଉପଯୁକ୍ତ ବଜାର ଅଭାବ ଯୋଗୁ ତାକୁ ବିକ୍ରି କରି ନ ପାରି ଗାଈ ଗୋରୁଙ୍କୁ ଖାଇବାକୁ ଦେଇ ଦେଉଛନ୍ତି। ଭଞ୍ଜନଗର ବ୍ଲକ ଘୋଡ଼ାଦାଣ୍ଡିର ଚାଷୀ ଚୈତନ୍ୟ ଗୁଟା ଦୌନନ୍ଦିନ ନିଜ ଜମିରୁ ବାହାରୁଥିତ୍ବା ପରିବାକୁ ବର୍ତମାନ ଗାଈ ଗୋରୁକୁ ଖାଇବାକୁ ଦେଇ ଦେଉଛନ୍ତି। ଫୁଲ ଚାଷୀମାନେ ମଧ୍ୟ ଫୁଲ ଆଉ ତୋଳୁ ନାହାନ୍ତି। ଜମିରେ ଫୁଲ ଫୁଟି ନଷ୍ଟ ହୋଇଯାଉଛି।
