କୋଲକାତା,୧୮।୫: କରୋନା ଭାଇରସ୍ ବ୍ୟାପିବାରୁ ରୋକିବା ପାଇଁ ଦେଶରେ ଲାଗୁ ହୋଇଥିବା ଲକ୍ଡାଉନ ୪.୦ର ସୋମବାର ହେଉଛି ପ୍ରଥମ ଦିନ। ଇତିମଧ୍ୟରେ ପଶ୍ଚିମବଙ୍ଗ ସରକାର ଲକ୍ଡାଉନ ବୃଦ୍ଧି କରିବାକୁ ଘୋଷଣା କରିଛନ୍ତି। କରୋନା ଭାଇରସ୍ ସଂକ୍ରମଣ ବିପଦକୁ ଦେଖି ମୁଖ୍ୟମନ୍ତ୍ରୀ ମମତା ବାନାର୍ଜୀ ରାଜ୍ୟରେ ମେ ୩୧ ଯାଏଁ ଲକ୍ଡାଉନ ଅବଧିକୁ ବୃଦ୍ଧି କରିଛନ୍ତି। ହେଲେ ରାଜ୍ୟରେ ଏହି ସମୟରେ କେତେକ କଟକଣାକୁ କୋହଳ କରାଯାଇଛି। ମେ ୨୧ରୁ ରାଜ୍ୟରେ ବସ୍ ସେବା ଆରମ୍ଭ ହେବାକୁ ଥିବା ବେଳେ ସେଲୁନ୍ ଓ ପାର୍ଲର ଖୋଲାଯିବ। ଏଥିସହ ରାତିରେ ଥିବା କର୍ଫ୍ୟୁ ଉପରେ ମଧ୍ୟ ରୋକୋ ଲଗାଯାଇଛି। କିନ୍ତୁ ସନ୍ଧ୍ୟା ୭ଟା ପରେ ଘରୁ ନ ବାହାରିବା ପାଇଁ ଜନତାଙ୍କୁ ମମତା ନିବେଦନ କରିଛନ୍ତି। ମେ ୨୧ପରେ କେବଳ କଣ୍ଟେନମେଣ୍ଟ ଜୋନକୁ ଛାଡିଦେଲେ ଅନ୍ୟ ସମସ୍ତ ସ୍ଥାନରେ ବଡ଼ ଷ୍ଟୋର ଖୋଲାଯିବ। ସେହିପରି ମେ ୨୭ରୁ ଅଟୋରିକ୍ସା ସେବା ଆରମ୍ଭ ହେବ ବୋଲି ସୂଚନା ରହିଛି। ଏଥିରେ ୨ଜଣ ଲୋକଙ୍କୁ ବସିବା ପାଇଁ ଅନୁମତି ପ୍ରଦାନ କରାଯିବ। ଏଥିସହ ଗୋଟିଏ ଦିନ ଅନ୍ତରରେ ସରକାରୀ ଓ ଘରୋଇ ଅଫିସ୍ ଖୋଲାଯିବ ବୋଲି ରାଜ୍ୟ ସରକାର ଘୋଷଣା କରିଛନ୍ତି । ଅପରପକ୍ଷେ ପ୍ରବାସୀ ଶ୍ରମିକଙ୍କୁ ମମତା ଧର୍ଯ୍ୟ ରଖିବାକୁୁ କହିଛନ୍ତି। ଶ୍ରମିକଙ୍କ ଘର ଲେଉଟାଣି ପାଇଁ ରାଜ୍ୟ ସରକାର ସମସ୍ତ ପ୍ରକାରର ବ୍ୟବସ୍ଥା କରୁଛନ୍ତି ବୋଲି ମୁଖ୍ୟମନ୍ତ୍ରୀ ମମତା ସୂଚନା ଦେଇଛନ୍ତି।
