ଓଡ଼ଗାଁ,୧ା୨(ସ୍ବ.ପ୍ର.)- ନୟାଗଡ଼ ବନଖଣ୍ଡ ଓ ଓଡ଼ଗାଁ ବନାଞ୍ଚଳ ଅନ୍ତର୍ଗତ ଶରଧାପୁର ପଞ୍ଚାୟତ ଜିରିପଡା ଗ୍ରାମରୁ ବନ ବିଭାଗ ଶନିବାର ମଧ୍ୟାହ୍ନରେ ବିପୁଳ ପରିମାଣର ମୂଲ୍ୟବାନ ସାଇଜ୍ ଶାଳକାଠ ଜବତ କରଛି।
ସୂଚନାନୁଯାୟୀ, ସେହି ଗ୍ରାମର କୈଳାସ ପ୍ରଧାନଙ୍କ ଏକ ନୂତନ ଖୋଲା ଛାତଘର ଉପରେ କେତେକ ସାଇଜ୍ ଶାଳକାଠ ମହଜୁଦ ରହିଥିବା ନେଇ ବନାଞ୍ଚଳ ଅଧିକାରୀ ରବୀନ୍ଦ୍ର ନାଥ ପଣ୍ଡା ବିଶ୍ୱସ୍ତ ସୂତ୍ରରୁ ଖବର ପାଇଥିଲେ। ସମ୍ପୃକ୍ତ ଘର ଉପରେ ସେ ବନଖଣ୍ଡ ଅଧିକାରୀ ଧନରାଜ୍ ଧନଧାର ହନୁମନ୍ତେଙ୍କ ନିର୍ଦ୍ଦେଶକ୍ରମେ ମଧ୍ୟାହ୍ନରେ ସଦଳବଳ ଚଢାଉ କରିଥିଲେ। ଚଢ଼ାଉ ସମୟରେ ଅଭିଯୁକ୍ତ କୈଳାସ ଅନୁପସ୍ଥିତ ଥିବା ବେଳେ ବନ ବିଭାଗ କର୍ମଚାରୀମାନେ ଛାତ ଉପରେ ଥିବା ସମସ୍ତ ସାଇଜ୍ ଶାଳକାଠ ଜବତ କରି ବନାଞ୍ଚଳ କାର୍ଯ୍ୟାଳୟକୁ ନେଇଥିଲେ। ଅଭିଯୁକ୍ତ ନିକଟସ୍ଥ ଜଙ୍ଗଲରୁ ଚୋରାରେ କାଠ ଆଣି କାଟିବା ପରେ ବ୍ୟବସାୟ ଉଦ୍ଦେଶ୍ୟରେ ଅନ୍ୟତ୍ର ଚାଲାଣ କରୁଥିବା ବିଭାଗୀୟ ଅଧିକାରୀ ଅବଗତ ହୋଇଥିବା ପ୍ରକାଶ କରିଛନ୍ତି। ରିପୋର୍ଟ ଲେଖା ହେବା ପର୍ଯ୍ୟନ୍ତ ଜବତ କାଠର ମାପଚୁପ ଚାଲିଥିବା ବେଳେ ଏହାର ଆନୁମାନିକ ମୂଲ୍ୟ ଲକ୍ଷାଧିକ ଟଙ୍କା ହେବ ବୋଲି ବନାଞ୍ଚଳ ଅଧିକାରୀ ପଣ୍ଡା ସୂଚନା ଦେଇଛନ୍ତି। ତେବେ ଚଢ଼ାଉରେ ପଣ୍ଡାଙ୍କ ସମେତ ସଦର ବନପାଳ ଜ୍ୟୋତିରଞ୍ଜନ ମାନସିଂ, ବାହାଡ଼ାଝୋଲା ବନପାଳ ସରିତା ବରାଳ, ବନପାଳ ଶୁଭେନ୍ଦୁ ପ୍ରସାଦ ନାୟକ, ବନରକ୍ଷୀ ଧରଣୀଧର ନାୟକ, ଅରବିନ୍ଦ ସାହୁଙ୍କ ସମେତ ପାଟ୍ରୋଲିଂ ବନ ସୁରକ୍ଷା ବଳ ସାମିଲ ହୋଇଥିଲେ ା
