ନୂଆଦିଲ୍ଲୀ,୧୫-୯: ନ୍ୟାଶନାଲ ପେମେଣ୍ଟସ କର୍ପୋରେଶନ ଅଫ୍ ଇଣ୍ଡିଆ(ଏନ୍ପିସିଆଇ) ଡିଜିଟାଲ ପେମେଣ୍ଟକୁ ପ୍ରୋତ୍ସାହିତ କରବାକୁ ଯାଇ ରୁପେ ଡେବିଟ୍ କାର୍ଡ ଜରିଆରେ ନେଣଦେଣ ଉପରେ ମର୍ଚ୍ଚେଣ୍ଟ ଡିସ୍କାଉଣ୍ଟ ରେଟ୍(ଏମ୍ଡିଆର୍) ହ୍ରାସ କରିଛି। ନୂଆ ଏମ୍ଡିଆର୍ ଅକ୍ଟୋବର ୨୦ରୁ ଲାଗୁ ହୋଇଯିବ। ଏନ୍ପିସିଆଇର କହିବାନୁଯାୟୀ , ଡେବିଟ୍ କାର୍ଡରେ ନେଣଦେଣରେ ଦିଆଯାଇଥିବା ଛାଡ଼ ସମସ୍ତ ପ୍ରକାର ପଏଣ୍ଟ ଅଫ୍ ସେଲ୍(ପିଓଏସ୍)ରେ ଲାଗୁ ହେବ। ଏହାବ୍ୟତୀତ ଇକମ୍ ଏବଂ ଭାରତକ୍ୟୁଆର୍ କୋଡ୍ ଆଧାରିତ ମର୍ଚ୍ଚେଣ୍ଟ ନେଣଦେଣ ଉପରେ ମଧ୍ୟ ନୂଆ ହାର ଲାଗୁ ହେବ। ପଏଣ୍ଟ ଅଫ୍ ସେଲ୍, ଇକମ୍ ଓ ଭାରତକ୍ୟୁଆର କୋଡ୍ ଆଧାରିତ ବାଣିଜି୍ୟକ ନେଣଦେଣ ଉପରେ ଏମ୍ଡିଆର୍ ସଂଶୋଧିତ ହୋଇଛି। ୨୦୦୦ ଟଙ୍କାରୁ ଅଧିକ ନେଣଦେଣ ଲାଗି ଏମ୍ଡିଆର୍ ୦.୬୦% ପର୍ଯ୍ୟନ୍ତ ସଂଶୋଧିତ ହୋଇଛି। ଯେଉଁଥିରେ ସର୍ବାଧିକ ୧୫୦ ଟଙ୍କା ପ୍ରତି ନେଣଦେଣ ରଖାଯାଇଛି। ବର୍ତ୍ତମାନ ଏହା ୧ହଜାର ଟଙ୍କାର ପ୍ରତି ନେଣଦେଣର ସର୍ବୋଚ୍ଚ ସୀତା ସହିତ ୨ ହଜାର ଟଙ୍କାରୁ ଅଧିକ ନେଣଦେଣ ଲାଗି ୦.୯% ଧାର୍ଯ୍ୟ ହୋଇଥିଲା। ଭାରତ କ୍ୟୁଆର୍ କୋଡ୍ ଆଧାରିତ ନେଣଦେଣ ଉପରେ ଏମ୍ଡିଆର୍କୁ ମଧ୍ୟ କମାଇ ୦.୫% କରାଯାଇଛି। ଏହାର ସର୍ବାଧିକ ଏମ୍ଡିଆର୍ ୧୫୦ ଟଙ୍କା ରଖାଯାଇଛି। ଏନ୍ପିସିଆଇର କହିବାନୁଯାୟୀ ଏମ୍ଡିଆର୍ ହାର କମାଇବା ସହ ସର୍ବାଧିକ ସୀମାକୁ କମାଯିବା ଯୋଗୁ ଲୋକେ ଡେବିଟ କାର୍ଡ ମାଧ୍ୟମରେ ନେଣଦେଣ ଲାଗି ପ୍ରୋତ୍ସାହିତ ହେବେ। ବର୍ତ୍ତମାନ ପର୍ଯ୍ୟନ୍ତ ଅଧିକ ଏମ୍ଡିଆର୍ କାରଣରୁ ଲୋକେ ଡେବିଟ୍ କାର୍ଡ ଜରିଆରେ ନେଣଦେଣ ପାଇଁ ପଛଘୁଞ୍ଚା ଦେଉଛନ୍ତି। ଏଥିପୂର୍ବରୁ ଏନ୍ପିସିଆଇ ଭୀମ୍ ୟୁପିଆଇ ଜରିଆରେ ନେଣଦେଣ ପାଇଁ ଏମ୍ଡିଆର୍କୁ ସଂଶୋଧନ କରିଥିଲେ ଏବଂ ଏହାର ସର୍ବୋଚ୍ଚ ସୀମା ୧୦୦ ଟଙ୍କା ରଖାଯାଇଛି। ସେହିପରି ୧୦୦ ଟଙ୍କାରୁ କମ୍ ୟୁପିଆଇ ନେଣଦେଣ ଉପରେ କ୍ୟୁଆର୍ କୋଡ୍ ସ୍କାନ ଦ୍ୱାରା କରାଯାଉଥିଲେ ଏମ୍ଡିଆର୍କୁ ସମ୍ପୂର୍ଣ୍ଣ ଛାଡ଼ କରାଯାଇଛି।
