ସତରେ ୟାକୁ ହିଁ କହନ୍ତି ହାତୀ ମୁଣ୍ଡରେ ସୁନା କଳସ ଢାଳିବା। ବ୍ଲକବଷ୍ଟର ‘ବାହୁବଲୀ’ପରେ ପ୍ରଭାସ ପୁଣି ଏବେ ଚର୍ଚ୍ଚାରେ। କାରଣ ଆଉ ଏକ ବିଗ୍ ବଜେଟ୍ ଫିଲ୍ମ ଚଳିତ ବର୍ଷ ଅଗଷ୍ଟ ୩୦ରେ ରିଲିଜ ହେବାକୁ ଯାଉଛି, ଯାହାର ନାୟକ ସାଜିଛନ୍ତି ଏହି ଅଭିନେତା। ତାହା ହେଲା ‘ଶାହୋ’। ଭାରତୀୟ ସିନେମା ଇତିହାସରେ ଏହା ରେକର୍ଡ ସୃଷ୍ଟି କରିବ ବୋଲି ସିନେ ସମୀକ୍ଷକମାନେ ଏବେଠାରୁ ପୂର୍ବାନୁମାନ କଲେଣି। ଅପରପକ୍ଷରେ ଅଫରଟି ମିଳିବା ପରେ ନିଜ ଉପରେ ଶତ ପ୍ରତଶତ ଭରସା ରଖି ହଁ ଭରିଥିଲେ ପ୍ରଭାସ। ବେଶ୍ ସାହସର ସହ ସେ ଏହି ଫିଲ୍ମରେ କେତୋଟି ଷ୍ଟଣ୍ଟ ଶଟ୍ ଦେଇଛନ୍ତି। ସୁଜିତଙ୍କ ନିର୍ଦ୍ଦେଶିତ ଏହି ବ୍ୟୟବହୁଳ ଫିଲ୍ମଟିକୁ ଶୁଟିଂ କରିବାକୁ ଦୁଇବର୍ଷ ସମୟ ଲାଗିଛି। ଖାସ୍ କଥା ହେଲା ଖ୍ୟାତି ସମ୍ପନ୍ନ ପ୍ରଡକ୍ସନ ଡିଜାଇନର ଶାବୁ ସିରିଲ୍ଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏହାର ଶୁଟିଂ ସେଟ୍ ନିର୍ମାଣ କରିବା ପାଇଁ ବ୍ୟୟ ହୋଇଛି ୬୫ କୋଟି। ଏହି ଫିଲ୍ମ ପାଇଁ ଆବୁଧାବିରେ ଏକ ମରୁଭୂମିର ପ୍ରତିକୃତି ନିର୍ମାଣ କରିବାକୁ ପ୍ରଡକ୍ସନ ଡିଜାଇନରଙ୍କୁ ବେଶ୍ ସହାୟତା କରିଥିଲେ ପ୍ରଭାସ। ଏହାକୁ ଚୂଡାନ୍ତ ରୂପ ଦେବାକୁ ୩୦୦ ଟେକ୍ନିସିଆନଙ୍କୁ କାମରେ ନିୟୋଜିତ କରାଯାଇଥିଲା। ହିନ୍ଦୀ, ତାମିଲ ଏବଂ ତେଲୁଗୁ ଭାଷାରେ ନିର୍ମିତ ହେଉଥିବା ଏହି ଚର୍ଚ୍ଚିତ ଫିଲ୍ମରେ ପ୍ରଭାସଙ୍କ ବ୍ୟତୀତ ଶ୍ରଦ୍ଧା କପୁର, ଜ୍ୟାକି ଶ୍ରଫ, ନୀଲ ନୀତୀଶ ମୁକେଶ, ମନ୍ଦିରା ବେଦୀ, ଚଙ୍କି ପାଣ୍ଡେ, ମହେଶ ମଞ୍ଜେରକର, ଅରୁଣ ବିଜୟ ଏବଂ ମୁରଲୀ ଶର୍ମାଙ୍କ ପରି କଳାକାର ଅଭିନୟ କରିଛନ୍ତି।
