ରାସ୍ତାରେ ଢ଼େଉ ମାରୁଛି ଡ୍ରେନ୍‌ପାଣି
9:38 amDecember 30, 2019 / 21

ଚୌଦ୍ୱାର,୩୦।୧୨(ଡି.ଏନ.ଏ): ୫୫ ନମ୍ବର ଜାତୀୟ ରାଜପଥକୁ ସଂଯୋଗ କରୁଥିବା କଳିଙ୍ଗ ଛକ-ଶଙ୍କରପୁର ରାସ୍ତାର କଳିଙ୍ଗଛକ ନିକଟରେ ରାସ୍ତାରେ ହମ୍ପ୍‌ସ ନିର୍ମାଣ ଯୋଗୁ ଆଖପାଖ ରାସ୍ତାରେ ନିୟମିତ ପାଣି ଜମି ରହୁଥିବା ଦେଖିବାକୁ ମିଳିଛି । ରାସ୍ତାରେ ଭାରିଯାନ ସବୁବେଳେ ଚଳାଚଳ କରିଥାଏ। ଏଣୁ ଛୋଟବଡ଼ ଖାଲଖମା ସୃଷ୍ଟି ହେଲାଣି। ସାଧାରଣ ଯାତାୟତରେ ବାଧାସୃଷ୍ଟି ହେଉଛି। ଦୈନିକ ଦୁର୍ଘଟଣା ଘଟୁଛି। ଏସମ୍ପର୍କରେ ସ୍ଥାନୀୟ ନାଗରିକମାନଙ୍କ ତରଫରୁ ବହୁବାର ଅଭିଯୋଗ କରାଯାଇଛି। ହେଲେ ରାସ୍ତା ପ୍ରତି ବିଭାଗୀୟ କର୍ତ୍ତୃପକ୍ଷଙ୍କ ଦୃଷ୍ଟିପଡ଼ୁ ନ ଥିବାରୁ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ସୁଚନାଯୋଗ୍ୟ ଯେ, କଳିଙ୍ଗଛକ ନିକଟରେ ଏହି ହମ୍ପ୍‌ସ ଓ ରାସ୍ତାରେ ପାଣି ଚାଲୁଥିବା ଯୋଗୁ ପିଚୁ ଉଠିଯାଇ ରାସ୍ତା ଅବସ୍ଥା ଶୋଚନୀୟ ହୋଇପଡ଼ିଛି। ରାସ୍ତା କଡ଼ରେ ନିର୍ମାଣ ହୋଇଥିବା ଡ୍ରେନଗୁଡିକ ମଧ୍ୟ ପୋତି ହୋଇଗଲାଣି। ଘର ଏବଂ ଦୋକାନରୁ ଆବର୍ଜନା ପାଣି ଡ୍ରେନରେ ଯାଇ ନ ପାରି ହମ୍ସରେ ଜମି ରହୁଛି। ଦୀର୍ଘଦିନ ଧରି ପାଣି ଜମିରହି ଦୁର୍ଗନ୍ଧ ସହ ଅସ୍ବାସ୍ଥ୍ୟକର ପରିବେଶ ସୃଷ୍ଟି ହେଉଛି। ଉକ୍ତ ରାସ୍ତାକୁ ଲାଗି ଲକ୍ଷ୍ମୀ ମନ୍ଦିର ରହିଛି। ହେଲେ ଲୋକମାନେ ଏହି ରାସ୍ତାରେ ଯିବାକୁ ନାପସନ୍ଦ କରୁଛନ୍ତି। ବ୍ୟସ୍ତବହୁଳ ଏହି ରାସ୍ତାଟିକୁ ବିଭାଗୀୟ କର୍ତ୍ତୃପକ୍ଷ ତୁରନ୍ତ ମରାମତି କରିବା ପାଇଁ ଅଞ୍ଚଳବାସୀଙ୍କ ତରଫରୁ ବରିଷ୍ଠ ନାଗରିକ କୈଳାଶ ଚନ୍ଦ୍ର ବରାଳ, ଶରତ କୁମାର ଖୁଣ୍ଟିଆ, କେ.ସି.ପ୍ରତାପ ସିଂ, ବସନ୍ତ କୁମାର ଦାସ, ଦିଲ୍ଲିପ କୁମାର ସାହୁ, ସହଦେବ ବରାଳ, ଚୈତନ୍ୟ ସାହୁ, କରୁଣାକର ସାହୁ, ସ୍ମୃତିରଞ୍ଜନ ମହାପାତ୍ର, ଶରତ କୁମାର ନାୟକ ପ୍ରମୁଖ ଦାବି କରିଛନ୍ତି।