ଦିଗପହଣ୍ଡି,୧୦ା୪(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ନିକଟ ମୌଳାଭଣଞ୍ଜା ରାଧାନଗର ଗ୍ରାମର ରାଶନ ଦୋକାନୀ କବିରାଜ ବିଷୋୟୀଙ୍କୁ ଦିଗପହଣ୍ଡି ପୋଲିସ ଶୁକ୍ରବାର କେସ୍ ନଂ. ୭୫/୨୦ ଅନୁଯାୟୀ କୋର୍ଟ ଚାଲାଣ କରିଛନ୍ତି। କବିରାଜଙ୍କ ରାଶନ ଦୋକାନକୁ ସାନଖେମୁଣ୍ଡି ଏକ୍ଜିକ୍ୟୁଟିଭ୍ ମାଜିଷ୍ଟ୍ରେଟ ତଥା ତହସିଲଦାର ଅମିୟ କୁମାର ନାୟକଙ୍କ ଉପସ୍ଥିତିରେ ଦିଗପହଣ୍ଡି ପୋଲିସ ସିଲ୍ କରିଦେଇଥିବା ଜଣାପଡ଼ିଛି। ରାଶନ ଦୋକାନରେ ବେଆଇନ ମଦ ବିକ୍ରି ହେଉଥିବା ଅଭିଯୋଗ ମିଳିବା ପରେ ଦିଗପହଣ୍ଡି ଥାନା ଆଇଆଇସି ବସନ୍ତ କୁମାର ସେଠୀ ଗୁରୁବାର ସଦଳବଳ ଚଢ଼ାଉ କରିଥିଲେ।
ସେହିପରି ସାନଡୁମ୍ବୁଳା ଗ୍ରାମର କେ. ଲିଙ୍ଗରାଜ ଦାସଙ୍କୁ ପୋଲିସ ଗିରଫ କରି ଶୁକ୍ରବାର କୋର୍ଟ ଚାଲାଣ କରିଛି। ଗୁରୁବାର ସନ୍ଧ୍ୟାରେ ଲିଙ୍ଗରାଜ ଗାଁ ରାସ୍ତାର ଏକ ବିଦ୍ୟୁତ୍ ଖୁଣ୍ଟ ତଳେ ବେଆଇନ ଭାବେ ମଦ ବିକ୍ରି କରୁଥିଲେ। ଖବର ପାଇ ପୋଲିସ ଟିମ୍ ସେଠାରେ ପହଞ୍ଚି ଲିଙ୍ଗରାଜଙ୍କ ବ୍ୟାଗ୍ରୁ ୨୦ଟି ବିଦେଶୀ ମଦ ବୋତଲ ଓ ୪୭ଟି ଦେଶୀ ମଦ ପାଉଚ ଜବତ କରିଥିଲା। କେସ୍ ନଂ. ୭୬/୨୦ରେ ଅନୁଯାୟୀ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ତଦନ୍ତକାରୀ ପୋଲିସ ଅଧିକାରୀ ଏସ୍ଆଇ ମାଧବ ଚନ୍ଦ୍ର ଟାକରି କହିଛନ୍ତି।
