ଉତ୍ତର ପ୍ରଦେଶ ଆଗ୍ରାର ଅଛନେରା ବ୍ଲକ ଛହ ପୋଖରା ଗାଁର ମୁସଲମାନ ପରିବାରର ସଦସ୍ୟମାନେ ସେମାନଙ୍କ ପରିଜନଙ୍କ ମୃତ ଶରୀରକୁ ନିଜ ଘରେ ହିଁ କବର ଦେଉଥିବା ପ୍ରକାଶ କରିଛନ୍ତି। ଗାଁରେ ଏମାନଙ୍କ ପାଇଁ କୌଣସି କବରସ୍ଥାନ ନ ଥିବାରୁ ଏମାନେ ମୃତ ଶରୀରକୁ ଘର ମଧ୍ୟରେ କବର ଦେଉଥିବା କୁହନ୍ତି। ଗାଁର ଶେଷ ମୁଣ୍ଡରେ ହିନ୍ଦୁମାନଙ୍କ ପାଇଁ ଶ୍ମଶାନ ଥିବା ବେଳେ ମୁଲମାନଙ୍କ ପାଇଁ କୌଣସି କବରସ୍ଥାନ ନାହିଁ। ଏନେଇ ଜିଲା ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ମଧ୍ୟ ଏଯାଏଁ କୌଣସି ସୁଫଳ ମିଳି ନ ଥିବା କୁହନ୍ତି ସ୍ଥାନୀୟ ଲୋକେ। ତେବେ ସ୍ଥାନାଭାବ ଯୋଗୁ ଘର ଭିତରେ ବି ଏବେ କବର ଦେବା କଷ୍ଟକର ବ୍ୟାପାର ହୋଇ ପଡିଲାଣି। ରିଙ୍କି ବେଗମ ନାମ ଜଣେ ମହିଳା କୁହନ୍ତି ସ୍ଥାନାଭାବ ଯୋଗୁ ତାଙ୍କବ ବାଡିପଟେ ୫ ଜଣଙ୍କୁ କବର ଦିଆ ସରିଲାଣି। ଏମିତିକି ଏମାନେ ନିତିଦିନ କବର ଉପରେ ଚଢି କାରବାର ହେଉଛନ୍ତି। ଯାହାକି ପୂର୍ବ ପୂରୁଷଙ୍କୁ ଅବମାନନା ବୋଲି ସେମାନେ କୁହନ୍ତି। ପ୍ରଶାସନ ଏମାନଙ୍କୁ ଯେଉଁ ଜାଗା ଖଣ୍ଡିକ ଦେଇଛି ତାହା ଏକ ପୋଖରି ମଝିରେ ହୋଇଥିବାରୁ ସେଠାରେ ବି କବର ଦେବା ଅସମ୍ଭବ। ଏନେଇ ଉକ୍ତ ମୁସଲମାନ ପରିବାର ଗୁଡିକ ଚିନ୍ତିତ ହୋଇପଡିଛନ୍ତି। ଏଠାରେ ଥିବା ଅଧିକାଂଶ ମୁସଲମାନ ପରିବାର ଗରିବ ଓ ଭୂମିହିନ ହୋଇଥିବାରୁ ଏମାନଙ୍କଉ ଏପରି ଅସୁବିଧାର ସାମ୍ନା କରିବାକୁ ପଡୁଛି।
