ତିହିଡ଼ି,୧୯।୨(ଡି.ଏନ.ଏ.)-ଭଦ୍ରକ ଜିଲା ତିହିଡ଼ି ବ୍ଲକରେ ମଧୁବାବୁ ପେନ୍ସନ୍ ଯୋଜନାରେ ମୋଟ ୧୧,୬୦୯ ଜଣ ହିତାଧିକାରୀଙ୍କ ମୋବାଇଲ ନମ୍ବର ସଂଗ୍ରହ କରାଯିବ। ମୋ ସରକାର ଆପ୍ରେ ଏହି ମୋବାଇଲ ନମ୍ବର ସଂଯୋଗ କରାଯିବାକୁ ସ୍ଥିର ହୋଇଛି। ସୋମବାର ସୁଦ୍ଧା ୬,୩୨୦ ଜଣଙ୍କ ନମ୍ବର ସଂଗ୍ରହ କରାଯାଇଛି। ଅବଶିଷ୍ଟ ହିତାଧିକାରୀଙ୍କ ନମ୍ବର ଖୁବ୍ଶୀଘ୍ର ସଂଗ୍ରହ କରାଯିବ ବୋଲି ବ୍ଲକ ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତୀକରଣ ବିଭାଗ କାର୍ଯ୍ୟାଳୟ ସୂତ୍ରରୁ ସୂଚନା ମିଳିଛି।
ହିତାଧିକାରୀଙ୍କ ମୋବାଇଲ ନମ୍ବର ମୋ ସରକାର ଆପ୍ରେ ସଂଯୋଗ ହେଲେ ସରକାରଙ୍କ ପକ୍ଷରୁ ସିଧାସଳଖ ହିତାଧିକାରୀଙ୍କ ସହ ଯୋଗାଯୋଗ କରାଯାଇପାରିବ। ଏହାଦ୍ୱାରା ହିତାଧିକାରୀମାନେ ଠିକ୍ ସମୟରେ ଭତ୍ତା ପାଉଛନ୍ତି କି ନାହିଁ ଏବଂ ସେମାନଙ୍କ ସମସ୍ୟା ସମ୍ପର୍କରେ ସରକାର ଅବଗତ ହୋଇପାରିବେ। ହିତାଧିକାରୀଙ୍କ ମୋବାଇଲ ନମ୍ବର ସଂଗ୍ରହ ପାଇଁ ପଞ୍ଚାୟତିରାଜ ଏବଂ ସାମାଜିକ ସୁରକ୍ଷା ବିଭାଗ ସଚିବଙ୍କ ଯୁଗ୍ମ ନିର୍ଦ୍ଦେଶ ଗତ ୧୩ ତାରିଖରେ ଜିଲାପାଳଙ୍କୁ ଦିଆଯାଇଥିଲା। ଜିଲାପାଳ ବିଡିଓଙ୍କୁ ନିର୍ଦ୍ଦେଶ ଦେବା ପରେ ହିତାଧିକାରୀମାନଙ୍କଠାରୁ ମୋବାଇଲ ନମ୍ବର ସଂଗ୍ରହ କାର୍ଯ୍ୟ ଚାଲୁ ରହିଛି। ଏହି ପରିପ୍ରେକ୍ଷୀରେ ବ୍ଲକ ସାମାଜିକ ସୁରକ୍ଷା ବିଭାଗ କର୍ମଚାରୀମାନେ ବିଭିନ୍ନ ପଞ୍ଚାୟତକୁ ଯାଇ ମୋବାଇଲ ନମ୍ବର ସଂଗ୍ରହ କରୁଛନ୍ତି। ତେବେ କେତେକ ହିତାଧିକାରୀଙ୍କ ମୋବାଇଲ ନ ଥିବାରୁ ସେମାନେ ସରକାରଙ୍କ ପକ୍ଷରୁ ମୋବାଇଲ ଯୋଗାଇ ଦିଆଯାଉ ବୋଲି ଦାବି କରୁଛନ୍ତି। ମାସିକ ୫ ଶହ ଟଙ୍କା ଭତ୍ତାରେ ସେମାନେ ମୋବାଇଲ କିପରି କିଣିପାରିବେ ବୋଲି ପ୍ରଶ୍ନ ଉଠାଇଛନ୍ତି। କେତେଜଣ ହିତାଧିକାରୀ ସରକାରଙ୍କ ଯୋଜନା ସମ୍ପର୍କରେ ଜାଣି ନ ଥିବା କହି ମୋବାଇଲ ନମ୍ବର ଦେବାକୁ ଅରାଜି ହେଉଛନ୍ତି। ଏଥିପାଇଁ କର୍ମଚାରୀମାନଙ୍କୁ ସମସ୍ୟାର ସମ୍ମୁଖୀନ ହେବାକୁ ପଡୁଥିବା ଜଣାଯାଇଛି। ଏହାଛଡ଼ା କେତେକ ପଞ୍ଚାୟତରେ କାର୍ଯ୍ୟନିର୍ବାହୀ ଅଧିକାରୀ ସହଯୋଗ କରୁ ନ ଥିବା ଯୋଗୁ ନମ୍ବର ସଂଗ୍ରହରେ ବିଳମ୍ବ ହୋଇଥିବା କୁହାଯାଇଛି। ଏହିସବୁ କାରଣରୁ ଅଦ୍ୟାବଧି ୫,୨୮୯ ହିତାଧିକାରୀଙ୍କ ନମ୍ବର ସଂଗ୍ରହ ହୋଇପାରି ନାହିଁ। ଆସନ୍ତା ୨୨ ତାରିଖ ସୁଦ୍ଧା ଅବଶିଷ୍ଟ ମୋବାଇଲ ନମ୍ବର ସଂଗ୍ରହ କରାଯାଇ ନାମ ସହ ନମ୍ବର ପଠାଯିବ ବୋଲି ବ୍ଲକ ସାମାଜିକ ସୁରକ୍ଷା ଅଧିକାରୀ ବନମାଳୀ ତ୍ରିପାଠୀ କହିଛନ୍ତି।
