ଅନୁଗୋଳ ଅଫିସ, ୯।୮-ଅନୁଗୋଳ ସହରରେ ନାହିଁ ଶ୍ମଶାନ ସୁବିଧା। ଅଧିକାଂଶ ଶ୍ମଶାନ ଜମିକୁ ଜବରଦଖଲକାରୀ ମାଡ଼ି ବସିଥିବାବେଳେ ଅନେକ ଅବହେଳିତ ହୋଇ ପଡ଼ିରହିଛି। ହେମସୁରପଡ଼ାରେ ପୌରପାଳିକାର ଶ୍ମଶାନ ନିର୍ମାଣ ଲୋକଙ୍କ ବିରୋଧ ପାଇଁ ଆଗେଇ ପାରି ନାହିଁ। ଏପରିସ୍ଥଳେ କରଡ଼ାଗାଡ଼ିଆ ଶ୍ମଶାନ ଉପରେ ସହରବାସୀଙ୍କୁ ନିର୍ଭର କରିବାକୁ ପଡ଼ୁଛି। ହେଲେ ତାହା ବ୍ୟୟବହୁଳ ହେଉଥିବାରୁ ସହରରେ ଶ୍ମଶାନ ନିର୍ମାଣ ସହ ବିଦ୍ୟୁତ୍ ଚୁଲା ବ୍ୟବସ୍ଥା କରିବାକୁ ଦାବି ହେଉଛି।
ରାଜ୍ୟର ବହୁ ସହରରେ ସରକାରୀ ଶ୍ମଶାନ ସହ ବିଦ୍ୟୁତ୍ ଚୁଲା ବ୍ୟବସ୍ଥା ରହିଛି। କିନ୍ତୁ ଅନୁଗୋଳରେ ଏହି ସୁବିଧା ଆଦୌ ନାହିଁ। ଏଥିଯୋଗୁ ମୃତଦେହ ପୋଡ଼ିବାକୁ ସମ୍ପୃକ୍ତ ପରିବାର ଓ ସମ୍ପର୍କୀୟମାନେ ଅସୁବିଧାର ସମ୍ମୁଖୀନ ହେବା ସହ ଉଚ୍ଚ ଦରରେ କାଠ କିଣି ଅଧିକ ଖର୍ଚ୍ଚାନ୍ତ ହେଉଛନ୍ତି। ଉପକଣ୍ଠରେ ଥିବା ଗ୍ରାମଗୁଡ଼ିକ ସରକାରୀ ଜାଗାରେ ନିଜସ୍ବ ଶ୍ମଶାନ କରିଥିବା ବେଳେ ସହରବାସିନ୍ଦା କିନ୍ତୁ ହଇରାଣ ହେଉଛନ୍ତି। କରଡ଼ାଗାଡ଼ିଆସ୍ଥିତ ଶ୍ମଶାନରେ ମୃତଦେହ ପୋଡ଼ିବା ପାଇଁ ସହରବାସୀ ହଜାର ହଜାର ଟଙ୍କା ଦେଉଥିଲେ ବି ବର୍ଷା ବେଳେ ସଂସ୍କାର କାର୍ଯ୍ୟ କଷ୍ଟକର ହୋଇପଡ଼ୁଛି। ତେଣୁ ସହରରେ ଶ୍ମଶାନ ସହ ବିଦ୍ୟୁତ୍ ଚୁଲା ବ୍ୟବସ୍ଥା କରାଗଲେ କମ୍ ଖର୍ଚ୍ଚରେ ଓ ବିନା ଅସୁବିଧାରେ ମୃତଦେହ ଦାହ ହୋଇପାରନ୍ତା ବୋଲି ସହରବାସୀ ମତବ୍ୟକ୍ତ କରିଛନ୍ତି।
ସହରବାସିନ୍ଦା ବିଶ୍ୱରଞ୍ଜନ ପଟ୍ଟନାୟକ କହିଛନ୍ତି, ପୌରପାଳିକା ପକ୍ଷରୁ ବିଦ୍ୟୁତ୍ ଚୁଲା ଥିବା ଶଶ୍ମାନ ନିର୍ମାଣ କରାଯିବା କଥା। ଅନ୍ୟ ସହରରେ ଏହା ନିର୍ମାଣ କରାଯାଇଛି। ମୃତଦେହ ଦାହ ପାଇଁ କାଠ ବ୍ୟବହାର ବ୍ୟୟବହୁଳ। କାଠର ଦର ବଢ଼ୁଥିବାବେଳେ କରଡ଼ାଗାଡ଼ିଆ ଶ୍ମଶାନ କମିଟି ମୃତଦେହ ପିଛା ୩ରୁ ସାଢ଼େ ୩ ହଜାର ଟଙ୍କା ନେଉଛି। ବିଦ୍ୟୁତ୍ ଚୁଲା ହେଲେ ସ୍ବଳ୍ପ ବ୍ୟୟରେ ଲୋକେ ସୁବିଧା ପାଇବା ସହ ଅଚିହ୍ନା ମୃତଦେହ ମଧ୍ୟ ଏହି ଚୁଲାରେ ଦାହ ହୋଇପାରନ୍ତା। ତେଣୁ ପୌରପାଳିକା ପକ୍ଷରୁ ଏଭଳି ଚୁଲା ନିର୍ମାଣ କରାଯିବାକୁ ସେ ଦାବି କରିଛନ୍ତି।
ଏ ନେଇ ପୌର ନିର୍ବାହୀ ଅଧିକାରୀ ଶୁଭେନ୍ଦୁ କୁମାର ଜେନା କହିଛନ୍ତି, ସହରରେ ଆଦର୍ଶ ଶ୍ମଶାନ ପାଇଁ ସରକାରଙ୍କ ପକ୍ଷରୁ ପ୍ରସ୍ତାବ ଆସିଛି। ତେବେ ହେମସୁରପଡ଼ାରେ ଶ୍ମଶାନ ନିମନ୍ତେ ପୌରପାଳିକା ଜାଗା ଚିହ୍ନଟ କରିଥିଲା। କିନ୍ତୁ ବିରୋଧ ଯୋଗୁ ଉକ୍ତ ସ୍ଥାନରେ କାର୍ଯ୍ୟ ହୋଇପାରିନାହିଁ। କରଡ଼ାଗାଡ଼ିଆ ଶ୍ମଶାନ ଉପରେ ଏଥିପାଇଁ ନିର୍ଭର କରିବାକୁ ପଡ଼ୁଛି। କରଡ଼ାଗାଡ଼ିଆ ପୌରପାଳିକା ଅଧୀନରେ ଆସୁନାହିଁ। ତେଣୁ ସେଠାରେ ଆଦର୍ଶ ଶ୍ମଶାନ କଲେ ସରକାରଙ୍କୁ ଅନୁମତି ମାଗିବାକୁ ପଡ଼ିବ। ଅନୁମତି ମିଳିବା ପରେ ଆଦର୍ଶ ଶ୍ମଶାନ ନିର୍ମାଣ ହେବ। ଏହାପରେ ସେଠାରେ ବିଦ୍ୟୁତ୍ ଚୁଲାର ବ୍ୟବସ୍ଥା କରାଯାଇ ପାରିବ।
