ଆରଡ଼ି, ୧୧।୧୧ (ଡି.ଏନ.ଏ.)- ଭଦ୍ରକ ଜିଲା ଧାମନଗର ବ୍ଲକ ଅନ୍ତର୍ଗତ ପାଳସାହି ସମବାୟ ସମିତି ଅଧୀନ ଚାଷୀମାନଙ୍କୁ ପୂର୍ବବର୍ଷର ବୀମାରାଶି ଏଯାଏ ମିଳିନାହିଁ। ଏହାକୁ ନେଇ ଚାଷୀ ମହଲରେ ଅସନ୍ତୋଷ ପ୍ରକାଶ ପାଇଛି। ବାରମ୍ବାର ଏ ନେଇ ଆଲୋଚନା କରାଯାଉଥିଲେ ମଧ୍ୟ କୌଣସି ସୁଫଳ ମିଳୁ ନ ଥିବା ଚାଷୀମାନେ ଅଭିଯୋଗ କରିଛନ୍ତି। ଫଳରେ ବାଧ୍ୟହୋଇ ସେମାନେ ଆନ୍ଦୋଳନାତ୍ମକ ପନ୍ଥା ଆପଣାଇବେ ବୋଲି ଏହି ସମିତି ଅଧୀନରେ ଥିବା ପାଳସାହି ଓ ରଇପୁର ପଞ୍ଚାୟତର ଚାଷୀମାନେ ଚେତାବନୀ ଦେଇଛନ୍ତି। ଏ ସମ୍ପର୍କରେ ଏକ ଦାବିପତ୍ର ସେମାନେ ସୋମବାର ସମିତି ସମ୍ପାଦକଙ୍କୁ ପ୍ରଦାନ କରିଛନ୍ତି। ଆସନ୍ତା ୧୮ ତାରିଖ ସୁଦ୍ଧା ବୀମାରାଶି ପ୍ରଦାନ କରା ନ ଗଲେ ସେମାନେ ଆଇନ ହାତକୁ ନେବା ସହ ଆଖଣ୍ଡଳମଣି-ଭଦ୍ରକ ରାସ୍ତା ଅବରୋଧ କରିବେ ବୋଲି ଦାବିପତ୍ରରେ ଦର୍ଶାଯାଇଛି। ଦାବିପତ୍ର ପ୍ରଦାନ ବେଳେ ପାଳସାହିର ପୂର୍ବତନ ସରପଞ୍ଚ ସୁଶାନ୍ତ ନାୟକ, ସୁବୋଧ ଚନ୍ଦ୍ର ରାଉତ, ସଞ୍ଜୟ ସ୍ବାଇଁ, ହୃଦାନନ୍ଦ ଜେନା, ଯଶୋବନ୍ତ ବାରିକ, ଦିଲୀପ ପାଢ଼ୀ, ବିନୋଦ ମହାଳିକ, ସୁଶାନ୍ତ ଖଟୁଆ ପ୍ରମୁଖ ଶତାଧିକ ଚାଷୀ ଉପସ୍ଥିତ ଥିଲେ। ଏ ସମ୍ପର୍କରେ ଉକ୍ତ ସମବାୟ ସମିତି ସମ୍ପାଦକ ରଞ୍ଜନ କୁମାର ମାଝୀଙ୍କୁ ପଚାରିବାରୁ କହିଛନ୍ତି, ଆଇନ ଅନୁଯାୟୀ ସମସ୍ତଙ୍କୁ ବୀମାରାଶି ପ୍ରଦାନ କରାଯିବ। ଏବେ ସରକାରଙ୍କ ନିର୍ଦ୍ଦେଶ ଅନୁସାରେ ଚାଷୀମାନେ ବ୍ୟାଙ୍କ ଆଉ ସମବାୟ କେନ୍ଦ୍ରରେ ଥିବା ନିଜ ଆକାଉଣ୍ଟରେ ଆଧାର କାର୍ଡ ସଂଯୋଗ କଲେ ଏହି ବୀମାରାଶି ମିଳିବା ସହଜ ହେବ।
