ଅନୁଗୋଳ ଅଫିସ,୨୫ା୪ – ଲକ୍ଡାଉନ୍ ଯୋଗୁ ଅନୁଗୋଳ ସହରର ସମସ୍ତ ମଦ ଦୋକାନ ବନ୍ଦ ଥିଲେ ବି କିଛିଦିନ ହେଲା ଚଢ଼ା ଦରରେ ଚାଲିଥିଲା ଚୋରା କାରବାର। ଏ ନେଇ ଗତ ୨୧ ତାରିଖରେ ‘ଦୋକାନରେ ତାଲା, ଚୋରାରେ ଖୋଲାମେଲା’ ଖବର ‘ଧରିତ୍ରୀ’ରେ ପ୍ରକାଶ ପରେ ଅନୁଗୋଳ ପୋଲିସ ତଦନ୍ତକୁ ଜୋରଦାର କରିବା ସହ ଗୁରୁବାର ବିଳମ୍ବିତ ରାତିରେ ଉକ୍ତ ଚୋରା କାରବାର ଚେରର ସନ୍ଧାନ ପାଇଛି। ସହର ଉପକଣ୍ଠ କରଡାଗାଡିଆରେ ଥିବା ଏକ ମଦ ଭାଟି ଉପରେ ଚଢ଼ାଉ କରି ତାହାକୁ ସିଲ୍ କରିଛି। ଲାଇସେନ୍ସ ପାଇଥିଲେ ବି ସେଠାରେ ଚୋରା କାରବାର କରୁଥିବା ଅଭିଯୋଗରେ ଭାଟି ମାଲିକ ତଥା ସହରର ଜଣାଶୁଣା ବ୍ୟବସାୟୀ ବିକ୍ରମ କିଶୋର ସାହୁଙ୍କ ସହ ମୋଟ୍ ୪୩ଜଣଙ୍କୁ ପୋଲିସ ଗିରଫ କରିଛି। ବିକ୍ରମଙ୍କର ଏକ ଦାମୀ ଚାରିଚକିଆ ଗାଡ଼ି, ଗୋଟିଏ ଅଟୋ ରିକ୍ସା, ୧୮ ବାଇକ୍ ଓ ୪୪୪୦ ଲିଟର ଦେଶୀ ମଦ ପାଉଚ, ୬ ହଜାର ଲିଟର ପୋଚ ଜବତ କରାଯାଇଥିବା ପୋଲିସ କହିଛି।
ଅନୁଗୋଳ ଏସ୍ପି ଜଗମୋହନ ମୀନାଙ୍କ ନିର୍ଦ୍ଦେଶକ୍ରମେ ଏସ୍ଡିପିଓ ଅଶ୍ବିନୀ ସାହୁ, ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ, ଏସ୍ଆଇ ପ୍ରକାଶ ମାଝି, ବିପ୍ଳବ ସାହୁ ପ୍ରମୁଖ ଭୋର୍ ପ୍ରାୟ ୩ଟାରେ ଭାଟି ଉପରେ ଚଢାଉ କରିଥିଲେ। ଦେଶୀମଦ ପ୍ରସ୍ତୁତ ପାଇଁ ବିକ୍ରମଙ୍କୁ ଲାଇଲେନ୍ସ ଦିଆଯାଇଥିବା ବେଳେ ଭାଟିରେ ଚୋରାରେ ମଦ ପ୍ରସ୍ତୁତ କରି ପୋଚର (ଚୋରା ବ୍ୟବସାୟୀ)ଙ୍କ ସହାୟତାରେ ବଜାରରେ ବିକ୍ରି କରୁଥିବା ଅଭିଯୋଗ ହୋଇଥିଲା। ବିଶ୍ୱସ୍ତସୂତ୍ରରୁ ପୋଲିସ ଖବରପାଇବା ପରେ ଏକ ପ୍ଲାଟୁନ ଫୋର୍ସ ସହ ଉକ୍ତ ଭାଟି ଉପରେ ଚଢାଉ କରାଯାଇଥିଲା। ଜବତ ସମସ୍ତ ସାମଗ୍ରୀ ଥାନାକୁ ନିଆଯାଇଛି। ଗିରଫଙ୍କ ମଧ୍ୟରେ ୩୦ ଜଣ ପୋଚର ଓ ୧୨ ଜଣ ମଦ ଭାଟି କର୍ମଚାରୀ ରହିଥିବା ଏସ୍ଡିପିଓ ସାହୁ ସୂଚନା ଦେଇଛନ୍ତି। ତେବେ ଗିରଫ ଭାଟି ମାଲିକ ବିକ୍ରମ କିଶୋର ସାହୁ ଅସୁସ୍ଥ ଅନୁଭବ କରିବାରୁ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି।
ଥାନା ପରିସରରେ ଗାଡ଼ିରେ ଲଗାଗଲା ନମ୍ବର
ବାସଭବନରୁ ଗିରଫ ହୋଇଥିବା ଭାଟି ମାଲିକ ବିକ୍ରମ କିଶୋର ସାହୁଙ୍କ ଏକ ଦାମୀ ଗାଡିକୁ ପୋଲିସ ଜବତ କରି ଥାନାକୁ ଆଣିଥିଲା। ହେଲେ ଉକ୍ତ ଗାଡ଼ିରେ ନମ୍ବର ନ ଥିଲା। ପରେ ତାଙ୍କ ସମ୍ପର୍କୀୟ ଆସି ଥାନା ପରିସରରେ ରଖାଯାଇଥିବା ଗାଡିରେ ସେଲୋ ଟେପ ଦେଇ ଓଡି୧୯ କ୍ୟୁ-୮୮୮୮ ନମ୍ବର ଲଗାଇଥିଲେ। ଏ ନେଇ ପୋଲିସ ନିକଟରେ କୌଣସି ସୂଚନା ନ ଥିବା କୁହାଯାଇଛି।
