ଲକ୍ଷ୍ନୌ, ୭।୬: ଦେଶରେ କରୋନା ସଂକ୍ରମଣ ବଢ଼ିଚାଲିଛି। ସଂକ୍ରମଣରୁ ଦୂରେଇ ରହିବା ଲାଗି ସରକାରଙ୍କ ପକ୍ଷରୁ ମାର୍ଗଦର୍ଶିକା ଜାରି କରାଯାଇଛି। ସାମାଜିକ ଦୂରତା ବଜାୟ ରଖିବା, ନିୟମିତ ଅନ୍ତରରେ ହାତ ଧୋଇବା, ବାହାରେ ଛେପ ନ ପକାଇବା, ମାସ୍କ ପିନ୍ଧିବା ଆଦି ଉପରେ ମାର୍ଗଦର୍ଶିକାରେ ଗୁରୁତ୍ୱାରୋପ କରାଯାଇଛି। ବାହାରକୁ ଯିବା ସମୟରେ ମାସ୍କ ପିନ୍ଧିବାକୁ ବାଧ୍ୟତାମୂଳକ କରାଯାଇଛି। ଏହାର ଉଲ୍ଲଂଘନ କରୁଥିବା ବ୍ୟକ୍ତି ବିଶେଷଙ୍କୁ ଜରିମାନା ଦଣ୍ଡାଦେଶ କରାଯିବ ବୋଲି ଘୋଷଣା କରାଯାଇଛି। ଏପରିସ୍ଥଳେ କାନପୁର ଆଇଜି ମୋହିତ ଅଗ୍ରଓ୍ବାଲ ମାସ୍କ ନ ପିନ୍ଧିବାରୁ ୧୦୦ ଟଙ୍କା ଜରିମାନା ଦେଇଛନ୍ତି। ସେ ବାହାରକୁ ଯିବା ସମୟରେ ମାସ୍କ ନ ପିନ୍ଧି ମାର୍ଗଦର୍ଶିକାର ଉଲ୍ଲଂଘନ କରିଥିବା ଦର୍ଶାଇ ବାରା ପୋଲିସ ଷ୍ଟେଶନ ଅଧିକାରୀ ରଣଜିତ୍ ସିଂଙ୍କୁ ଜରିମାନା ଆଦାୟ କରିବା ଲାଗି କହିଛନ୍ତି। ରଣଜିତ୍ ସିଂ ଆଇଜିଙ୍କୁ ଚାଲାଣ ରସିଦ୍ ଦେବା ସହିତ ଜରିମାନା ଆଦାୟ କରିଛନ୍ତି। ସୂଚନାଯୋଗ୍ୟ, ଆଇଜି ବାରା ଅଞ୍ଚଳର ଅନୁଧ୍ୟାନ କରିବା ଲାଗି ଯାଇଥିଲେ। ତେବେ ସେ ମାସ୍କ ନ ପିନ୍ଧି ଗାଡ଼ିରୁ ବାହାରକୁ ଯାଇଥିଲେ।
