ଭୋପାଳ,୨୪।୮: ସରକାରୀ ଯୋଜନାର ଲାଭ ଉଠାଇବା ପାଇଁ ୩ଜଣ ମହିଳା ନିଜର ମାତୃତ୍ୱ ଭାବନାକୁ ବି ବଳି ପକାଇବାକୁ ପଛଘୁଞ୍ଚା ଦେଇନାହାନ୍ତି। ମା’ ହେବା ଜଣେ ମହିଳାଙ୍କ ପାଇଁ ସର୍ବୋତ୍ତମ ମୁହୂର୍ତ୍ତ ହୋଇଥିବା ବେଳେ ଏବେ କିନ୍ତୁ ଜଣେ ମହିଳା ଶିଶୁଙ୍କୁ ଅସ୍ତ୍ର କରି ଜାଲିଆତି କରିଥିବା ଘଟଣା ମଧ୍ୟପ୍ରଦେଶର ଭୋପାଳରେ ଦେଖିବାକୁ ମିଳିଛି। ସୂଚନାଯୋଗ୍ୟ, ମଙ୍ଗଳବାର ରାତି ଭୋପାଳର କୈଲାଶରାସ ହସ୍ପିଟାଲରେ ୩ମହିଳା ପହିଞ୍ଚିଥିଲେ। ଏକ ନାଲି କପଡ଼ାରେ ଅଟାର ପିଣ୍ଡୁଳାକୁ ଗୁଡ଼ାଇ ତାହା ମୃତ ଶିଶୁ ବୋଲି ମହିଳାଜଣକ ଡାକ୍ତରଙ୍କ ପାଖରେ ଉପସ୍ଥାପିତ କରିଥିଲେ। ଏଥିସହ ତାଙ୍କୁ ମୁଖ୍ୟମନ୍ତ୍ରୀ ମ୍ୟାଟରନିଟି ଆଡ୍ ସ୍କିମରେ ସାମିଲ କରାଯାଉ ବୋଲି କହିଥିଲେ। ଏହାପରେ ଜଣେ ନର୍ସ ତାଙ୍କୁ ମୃତ ଶିଶୁଙ୍କ ମୁହଁ ଦେଖାଇବାକୁ କହିବାରୁ ମହିଳାଜଣଙ୍କ ମନା କରିଥିଲେ। ଦୁଇ ଜଣଙ୍କ ଯୁକ୍ତିତର୍କ ମଧ୍ୟରେ ଅଟା ପିଣ୍ଡୁଳାଟି ତଳକୁ ଖସିପଡ଼ିଥିଲା। ଏନେଇ ଡାକ୍ତର ପୋଲିସକୁ ଖବର ଦେଇଥିଲେ। ପୋଲିସର ପଚରାଉଚରା ସମୟରେ ମୃତ ଶିଶୁର କ୍ଷତିପୂରଣ ପାଇଁ ସେ ଏଭଳି କରିଥିବା ମହିଳାଜଣଙ୍କ ସ୍ବୀକାର କରିବା ସହ କ୍ଷମା ପ୍ରାର୍ଥନା କରିଥିଲେ। ଏହାପରେ ପୋଲିସ ତାଙ୍କୁ ଛାଡିଦେଇଥିବା ଜଣାପଡ଼ିଛି।
