ବିନିକା, ୧୩ା୫(ଡି.ଏନ୍.ଏ.): ବିନିକା ବ୍ଲକ ଅଂଚଲରେ ଏହେଦେ ଚାଷୀ ରବିଧାନ ଫସଲ କରିଛନ୍। ଫସଲ ଅମଲ କରବାର ସମିଆ ପାଖେଇ ଆଏଲାନ, ଧାନ ମଥା ନଇଁ ଲପ୍ଲପେଇ ଯାଉଛେ। ଅଂଚଲର ଚାଷୀ ଇଥର ଭଲ ଅମଲ ହେବାର ଆଶ୍ ବାଁଧି ବସିଛେ। ହେଲେ ଏନ୍ତାଥି ଦାଉ ସାଧୁଛନ୍ ଜଂଗଲି ବର୍ହା। ବିନିକା ବ୍ଲକର ସିଂଘିଯୁବା, ଜାମପାଲି, ପାପି, ଭଣ୍ଡାର, ସର୍ଗୁଣା, କଦଲୀପାଲି, ଅମରପାଲି, ଅନ୍ତର୍ଡ଼ା, ମହୁଲପାଲି ଚରଦା, ବାଞ୍ଜିପାଲି, ସିଆଲଜୁରୀ, ନକ୍ଟାମୁଣ୍ଡା, ପଥରଖଣ୍ଡି, ମହଦା, ସିଆଲି, ଅମାମୁଣ୍ଡା ମଉଜାମାନକେ ଜଂଗଲି ବର୍ହା ମାତିଛନ୍। ବର୍ହା ଧାନ୍ଖେତ୍କେ ପସି ମଡ଼ାଦଲା କରବାର ସଂଗେ ଫସଲ ଉଜାଡ଼ି ଦେଉଛନ୍। ଇଥିରଲାଗି ଫିଦିନ ଚାଷୀକର ବଡ଼ଭାରି ନୁକ୍ସାନ ହେଉଛେ। ଅନେକ ଜାଗାରେ ଚାଷୀ ଖେତ୍ମାନକେ ମଚାନ୍ ବଁଧି ଦିନ୍ରାଏତ୍ ବର୍ହା ଖେଦ୍ବାର ଲାଗି ଜୁଗିରହିଛନ୍। ବିଭାଗୀୟ ଅଧ୍କାରୀମାନକୁ ଇ ବାବ୍ଦେ ଯେତେ କହେଲେ ନାଇଁ ଶୁନୁଥିବାର ଚାଷୀ ମହଲରୁ ଅଭିଯୋଗ ହେଉଛେ। ଗଲା ଖରିଫ୍ରେ ବି ବର୍ହା ଉପଦ୍ରବରେ ଅନେକ ଚାଷୀକର ଫସଲ ଖରାପ ହେଇଥିଲା। ହେଲେ ଯେନ୍ହିସାବେ ଚାଷୀକର କ୍ଷତି ହେଇଥିଲା ସେ ହିସାବେ କ୍ଷତିପୂରନ ନାଇଁମିଲି। ଗଲା ଖରିଫ୍ରେ ବର୍ହା ଉପଦ୍ରବର କ୍ଷୟକ୍ଷତି ବାବ୍ଦେ ୫ରୁ ୬ ଏକର ପଟ୍ଟାଧାରୀ ଚାଷୀକୁ ୯ଶହରୁ ୧୨ଶହ ଟଁକା ତକ୍ ମିଲିଥିଲା। ଯେନ୍ଟା ଚାଷୀର କ୍ଷତିର ୫ ଭାଗ୍ ବି ଭରନା ନାଇଁ ହେଇପାରି। ବିନିକା ଅଂଚଲର ଚାଷୀ ଗୁଟେ ପରେ ଗୁଟେ ଅସବିଧାର ସାମନା କରୁଛନ୍। କେତେବେଲେ ପାଏନ୍ ଅଭାବୁ ଚାଷ୍ ମରୁଛେ ତ ଆର କେତେବେଲେ ରୋଗ୍ପୋକ୍, ଜଂଗଲି ବର୍ହାକର ଉତ୍ପାତରେ ଫସଲ ମାଡ଼ ଖାଉଛେ। ଏହେଦେ ରବିଧାନ ଫସଲ ଅମଲ ହେବାର ପାସ ପାସ ହେଲାନ। ଇ ସମିଆରେ ଜଂଗଲ ତରାମାନକେ ଥିବାର ଗଁାମାନ୍କେ ଜଂଗଲି ବର୍ହା ଚାଷୀକର ଫସଲ ଉଜାଡ଼ୁଛନ୍। ବେଲବୁଡ଼ଲେ ଦଲ ଦଲ ବର୍ହା ଖେତ୍ମାନକୁ ପସି ଫସଲ ମାଡ଼ିଦଲି କେଚ୍କେଚା କରିପକଉଛନ୍। ଏନ୍ତାଥି ଫସଲର ବଡ଼ଭାରି ନୁକ୍ସାନ ହେଉଥିବାର ଚାଷୀମାନେ ଅଭିଯୋଗ କରିଛନ୍। ଇ ବାବ୍ଦେ ଚାଷୀ ବିଦ୍ୟାଧର ସାହୁକୁଁ ପଚରାଲାରୁ ଫିବଛର ଧାନ ଫସଲ ଅମଲ କରବାର ଆଗ୍ରୁ ଜଂଗଲି ବର୍ହା ଉପଦ୍ରବ କରୁଛନ୍। ଖରିଫ୍ ଆର ଡାଲୁଅ ଦୁଇ ଫସଲରେ ବର୍ହାକର ଉପଦ୍ରବରେ ବଡ଼ଭାରି ନୁକ୍ସାନ ହେଉଛେ। ହେଲେ ଚାଷୀ ସେ ହିସାବେ କ୍ଷତିପୂରନ ନାଇଁ ପାଏବାର। ସରକାରୀ ନିୟମ ହିସାବେ ଚାଷୀକୁ ୧୫ ଦିନ୍ ଭିତରେ କ୍ଷତିପୂରନ୍ ଯୁଗେଇ ଦେବାର କଥା, ହେଲେ କିଏ କାହାକେ ପଚରଉଛେ ବଲି ସେ କହିଥିଲେ। ସେନ୍ତା ଚାଷୀ ଚୌବନ ସାହୁକେ ପଚରାଲାରୁ ଫିବଛର ଇ ଜଂଗଲି ବର୍ହାକର ଉତ୍ପାତ୍ ଗୁଟେ ମୁଡ଼୍ଦୁଖା ହେଇଗଲାନ ଆଗିଅଁା। ଯାହାକେ କହେଲେ କେହି ନାଇଁ ଶୁନବାର। ଗଲା ବଛର୍ ହେଇଥିବାର କ୍ଷୟକ୍ଷତିର ଟଁକା ଆଏଜ୍ଯାଏ ନୂହେମିଲେ। ଧାନ୍ ଅମଲ କରବାର ଆଗ୍ରୁ ଖେତେ ମଚାନ୍ ବଁାଧି ଦିନ୍କେ ରାଏତ୍ ଜୁଗବାକେ ପଡ଼ୁଛେ ବଲି ସେ କହିଥିଲେ। ଇ ଦିଗେ ବନବିଭାଗ ଦୁରୁଷ୍ଟି ଦେଇ କ୍ଷତିଗ୍ରସ୍ତ ଚାଷୀକୁ ଚିନ୍ହଁଟ କରବାର ସଂଗେ ଯେତେ ଜଲଦି ହେବା କ୍ଷତିପୂରନ ଯୁଗେଇ ଦେବାକେ ଅଂଚଲର ଚାଷୀମାନେ ଦାବି କରିଛନ୍।
