ସବୁ ହୋଟେଲ ଓ ରେଷ୍ଟୁରାଣ୍ଟ ଗ୍ରାହକଙ୍କ ପସନ୍ଦକୁ ଗୁରୁତ୍ୱ ଦେଇ ଏବେ ଭିନ୍ନ ଭିନ୍ନ ଡିଶ୍ ପରଷୁଛନ୍ତି। କିନ୍ତୁ ଲୋକେ ବ୍ରଏଲର ଅପେକ୍ଷା ଦେଶୀ କୁକୁଡ଼ା ମାଂସର ଘର ତିଆରି ତରକାରି ଭଳି ସ୍ବାଦ ଖୋଜୁଛନ୍ତି। ଏହାକୁ ଦୃଷ୍ଟିରେ ରଖି ବାରିପଦା କେସି ସର୍କଲ ସ୍ଥିତ ହୋଟେଲ ମୟୂରଭଞ୍ଜ ପକ୍ଷରୁ ହୋଟେଲର ଏକବର୍ଷ ପୂର୍ତ୍ତି ଅବସରରେ ସ୍ବତନ୍ତ୍ର ଡିଶ୍ ‘ମାଟି ହାଣ୍ଡି ଚିକେନ ’ ଗ୍ରାହକଙ୍କୁ ପରଷୁଛନ୍ତି। ମାଟିହାଣ୍ଡିରେ ରୋଷେଇ କରି ମାଟିପାତ୍ରରେ ଏହି ଡିଶ୍କୁ ପରଷାଯାଉଛି। ଏହି ଡିଶ୍ର ପ୍ରସ୍ତୁତି ପ୍ରଣାଳୀ ସମ୍ପର୍କରେ ହୋଟେଲର ମାଷ୍ଟର ସେଫ୍ ରିଜଓ୍ବାନ୍ ଅହମ୍ମଦ ଅଲି ଖାନ୍ ଯାହା କୁହନ୍ତି..
ଆବଶ୍ୟକ ସାମଗ୍ରୀ:
(ଗୋଟିଏ ପ୍ଲେଟ୍ ପାଇଁ )
ଦେଶୀ ଚିକେନ୍-୨୫୦ ଗ୍ରାମ୍
ଆଳୁ-୧୦୦ ଗ୍ରାମ୍
ପିଆଜ-୧୫୦
ଅଦା/ରସୁଣ ପେଷ୍ଟ-୭୫ ଗ୍ରାମ୍
ତେଲ-୧୫୦ ଗ୍ରାମ୍
ଆବଶ୍ୟକ ଅନୁସାରେ ଜିରାଗୁଣ୍ଡ, ଧନିଆଗୁଣ୍ଡ, ଲଙ୍କାଗୁଣ୍ଡ, ହଳଦୀଗୁଣ୍ଡ, ଗରମ ମସଲା (ମିକ୍ସ), କଶ୍ମୀରି ପାଉଡ଼ର, ଲୁଣ, ଡାଳଚିନି, ଲବଙ୍ଗ, ତେଜପତ୍ର, ଧନିଆପତ୍ର, କଞ୍ଚାଲଙ୍କା ଓ ଦେଶୀଘିଅ।
ପ୍ରସ୍ତୁତି ପ୍ରଣାଳୀ…
ପ୍ରଥମେ ଗ୍ୟାସ୍ ଚୁଲାରେ ନିଆଁ ସଂଯୋଗ କରି ତା’ଉପରେ ମାଟିହାଣ୍ଡି ବସାନ୍ତୁ। ହାଣ୍ଡି ଗରମ ହେବା ପରେ ସେଥିରେ ତେଲ ପକାନ୍ତୁ। ତେଲ ଗରମ ହେବା ପରେ ଡାଳଚିନି, ତେଜପତ୍ର, ଲବଙ୍ଗ ପକାଇ ଭଲକରି ଭାଜି ତାହା ଉପରେ ପୂର୍ବରୁ କିମା କରି ରଖିଥିବା ପିଆଜ ପକାଇ ଭାଜନ୍ତୁ। ପରେ ଚିକେନକୁ ହାଣ୍ଡିରେ ପକାଇବା ପରେ କଟା ଆଳୁ ପକାଇ ଅଳ୍ପ ପାଣି ଦେଇ ଚିକେନକୁ ସିଝାନ୍ତୁ। ଚିକେନ ଭଲ ଭାବେ ସିଝିଲା ପରେ ଆବଶ୍ୟକ ଅନୁସାରେ କଞ୍ଚା ଲଙ୍କା, ଜିରାଗୁଣ୍ଡ, ଧନିଆଗୁଣ୍ଡ, ଲଙ୍କାଗୁଣ୍ଡ, ହଳଦୀଗୁଣ୍ଡ, ଗରମମସଲା (ମିକ୍ସ), ଲୁଣ ଓ କଶ୍ମୀରୀ ପାଉଡ଼ର ପକାଇ ଅଳ୍ପ ସମୟ ପାଇଁ ଭଲଭାବେ ଘାଣ୍ଟନ୍ତୁ। ଏବେ ତିଆରି ହୋଇଗଲା ମାଟି ହାଣ୍ଡି ଚିକେନ୍। ଏହାକୁ ଏକ ମାଟି ପାତ୍ରରେ ଢ଼ାଳି ଧନିଆ ପତ୍ର ଓ ଅଳ୍ପ ଦେଶୀଘିଅ ପକାଇ ପରଷି ଦିଅନ୍ତୁ। ଏହି ଡିଶ୍କୁ ଆରାମରେ ଘରେ ତିଆରି କରି ପାରିବେ। ନିଜେ ଖାଇ ଅନ୍ୟମାନଙ୍କୁ ବି ଖୁଆଇ ପାରିବେ।
