ନୂଆଦିଲ୍ଲୀ,୧୫-୧: ରିଜର୍ଭ ବ୍ୟାଙ୍କର ଗଭର୍ନର ପଦବୀରେ ଶକ୍ତିକାନ୍ତ ଦାସ କାର୍ଯ୍ୟ କରୁଥିବା ବେଳେ ତାଙ୍କୁ ଟିମ୍ରେ ଡେପୁଟି ଗଭର୍ନର ଭାବେ ଓଡ଼ିଶାର ବିଭୁ ପ୍ରସାଦ କାନୁନଗୋ ରହିଛନ୍ତି। ଏହି ଶୀର୍ଷ ଟିମ୍ରେ ନୂଆ କରି ଆଉ ଜଣେ ଓଡ଼ିଆ ଯୋଗ ଦେଇଛନ୍ତି। ନୂଆ ଡେପୁଟି ଗଭର୍ନର ମାଇକେଲ ଦେବବ୍ରତ ପାତ୍ରଙ୍କୁ ଏହି ଟିମ୍ରେ ସରକାର ସାମିଲ କରିଛନ୍ତି। ପାତ୍ର ଏହା ପୂର୍ବରୁ ରିଜର୍ଭ ବ୍ୟାଙ୍କର କାର୍ଯ୍ୟନିର୍ବାହୀ ନିର୍ଦ୍ଦେଶକ (ଇଡି) ଭାବେ କାର୍ଯ୍ୟରତ ଥିଲେ। ୧୯୮୫ରେ ରିଜର୍ଭ ବ୍ୟାଙ୍କରେ ଯୋଗ ଦେଇଥିବା ପାତ୍ର ବିଭିନ୍ନ ଗୁରୁତ୍ୱପୂର୍ଣ୍ଣ ପଦପଦବୀରେ କାର୍ଯ୍ୟ କରିଛନ୍ତି। ସେ ୩ ବର୍ଷ ଲାଗି ନୂଆ ପଦବୀରେ କାର୍ଯ୍ୟ କରିବେ। ୨୦୦୫ରେ ଆର୍ବିଆଇ ମୁଦ୍ରାନୀତି କମିଟି ବିଭାଗକୁ ଆସିବା ପୂର୍ବରୁ ସେ ଅର୍ଥନୈତିକ ବିଶ୍ଳେଷଣ ଏବଂ ନୀତି ବିଭାଗରେ ପରାମର୍ଶଦାତା ତଥା ଇଣ୍ଟରନ୍ୟାଶନାଲ ଫାଇନାନ୍ସ, ମନି ଆଣ୍ଡ ବ୍ୟାଙ୍କିଙ୍ଗ ବିଭାଗର ଇନଚାର୍ଜ ଭାବେ କାର୍ଯ୍ୟ କରିଛନ୍ତି। ସେ ଇଣ୍ଡିଆନ ଇନଷ୍ଟିଚ୍ୟୁଟ ଅଫ୍ ଟେକ୍ନୋଲୋଜି ମୁମ୍ବାଇରୁ ଅର୍ଥନୀତିରେ ପିଏଚ୍ଡି ହାସଲ କରିଛନ୍ତି। ହାଭାର୍ଡ ବିଶ୍ୱବିଦ୍ୟାଳୟରେ ଆର୍ଥତ୍କ ସ୍ଥିରତା ବିଭାଗରେ ପୋଷ୍ଟ ଡକ୍ଟରାଲ ରିସର୍ଚ୍ଚ ମଧ୍ୟ କରିଛନ୍ତି। ଆଇଏମ୍ଏଫ୍ ଇନଷ୍ଟିଚ୍ୟୁଟ ଅନ୍ ଫାଇନାନ୍ସିଆଲ ପ୍ରୋଗ୍ରାମିଙ୍ଗ ଏବଂ ବ୍ୟାଙ୍କ୍ ଅଫ୍ ଇଂଲଣ୍ଡର ସେଣ୍ଟର ଫର ସେଣ୍ଟ୍ରାଲ ବ୍ୟାଙ୍କିଙ୍ଗ ଷ୍ଟଡିଜରେ ପାତ୍ର ପ୍ରଫେଶନାଲ ତାଲିମ ଗ୍ରହଣ କରିଛନ୍ତି।
ମୁଦ୍ରାସ୍ଫୀତି ଲକ୍ଷ୍ୟ, ନଗଦ ପରିଚାଳନା ଏବଂ ମାକ୍ରୋଇକୋନୋମି ଭଳି ବିଭିନ୍ନ ଦିଗରେ ସେ ବର୍ତ୍ତମାନ ନୂଆ ଦାୟିତ୍ୱରେ କାର୍ଯ୍ୟ କରିବେ। ଗଭର୍ନର ଶକ୍ତିକାନ୍ତ ଦାସଙ୍କ ନେତୃତ୍ୱରେ ୨୦୧୯ରେ ଲଗାତର ରେପୋ ରେଟ ହ୍ରାସ ବେଳେ ସେ ଭୋଟ ଦେଇଥିଲେ। ମାତ୍ର ଡିସେମ୍ବର ମୁଦ୍ରାନୀତି କମିଟି ବୈଠକରେ ସୁଧହାରରେ ବିରତି ନେଇ ପାତ୍ରଙ୍କ ସମେତ କମିଟିର ଅନ୍ୟ ମାନେ ଭୋଟ କରିନଥିବା ଦେଖାଯାଇଥିଲା। ଅର୍ଥ ବ୍ୟବସ୍ଥା ଏବେ ମାନ୍ଦାବସ୍ଥା ଦେଇ ଗତି କରୁଛି। ଖୁଚୁରା ମୁଦ୍ରାସ୍ଫୀତି ସାଢେ ପାଞ୍ଚ ବର୍ଷର ସର୍ବୋଚ୍ଚ ସ୍ତରରେ ରହିଛି। ଦେଶର ଅର୍ଥ ବ୍ୟବସ୍ଥାର ସ୍ଥିତି ଠିକ୍ ନ ଥିବା କାରଣରୁ ୨୦୧୯-୨୦ରେ ଜିଡିପି ହାର ୫% ରହିବ ବୋଲି ଆର୍ବିଆଇ ପୂର୍ବାନୁମାନ କରିଛି। ଏଭଳି ବିଭିନ୍ନ ପ୍ରସଙ୍ଗ ପାତ୍ରଙ୍କ ଲାଗି ଚ୍ୟାଲେଞ୍ଜ ହେବ ବୋଲି କୁହାଯାଇଛି।
